20 shlokas
- 1
स पाश्चात्यो वेदेर्मध्यमः शङ्कुस्तस्मात्पुरस्तात्प्रक्रमेषु षट्त्रिंशति शङ्कुः पौरस्त्यः
sa pāścātyo vedermadhyamaḥ śaṅkustasmātpurastātprakrameṣu ṣaṭtriṃśati śaṅkuḥ paurastyaḥ
- 2
पाश्चात्याद्दक्षिणोत्तरौ पञ्चदशसु पञ्चदशसु शङ्कू तौ श्रोण्यौ पौरस्त्याद्द्वादशसु द्वादशसु शङ्कू ताव् अंसौ
pāścātyāddakṣiṇottarau pañcadaśasu pañcadaśasu śaṅkū tau śroṇyau paurastyāddvādaśasu dvādaśasu śaṅkū tāv aṃsau
- 3
अक्ष्णयामानं विधाय सर्वं स्पन्द्यया शक्तिविषये दक्षिणावृत्तया प्रदक्षिणं विमिमे त्वा पयस्वतीम् इति वेदिं परिमिमीते
akṣṇayāmānaṃ vidhāya sarvaṃ spandyayā śaktiviṣaye dakṣiṇāvṛttayā pradakṣiṇaṃ vimime tvā payasvatīm iti vediṃ parimimīte
- 4
मध्ये प्रागग्रां पृष्ठ्यां करोति
madhye prāgagrāṃ pṛṣṭhyāṃ karoti
- 5
इदं तस्मै वेदेन वेदिम् इत्य् अभिमर्शनसंमार्गौ
idaṃ tasmai vedena vedim ity abhimarśanasaṃmārgau
- 6
पौरस्त्यात्पश्चात्प्रक्रम उत्तरवेदेः पौरस्त्यात्पश्चाद्दशमे पदे शङ्कुर् उत्तरवेदेः पाश्चात्यः
paurastyātpaścātprakrama uttaravedeḥ paurastyātpaścāddaśame pade śaṅkur uttaravedeḥ pāścātyaḥ
- 7
ततः षष्ठात्पदाद्दक्षिणतः सप्तम उपरवदेशः
tataḥ ṣaṣṭhātpadāddakṣiṇataḥ saptama uparavadeśaḥ
- 8
तस्मात्स्तम्बयजुर्हरति
tasmātstambayajurharati
- 9
उत्तराद् अंसात्पश्चिमे द्वादशाद् उत्तरतः प्रक्रम उत्करदेशे नमो दिव इत्य् आग्नीध्रो ऽञ्जलिं कृत्वोपविशति
uttarād aṃsātpaścime dvādaśād uttarataḥ prakrama utkaradeśe namo diva ity āgnīdhro 'ñjaliṃ kṛtvopaviśati
- 10
तदञ्जलौ स्तम्बयजुर्व्याख्यातम्
tadañjalau stambayajurvyākhyātam
- 11
स उत्करः
sa utkaraḥ
- 12
तदंसस्योत्तरेण प्रक्रमे चात्वालः
tadaṃsasyottareṇa prakrame cātvālaḥ
- 13
इमां नराः कृणुत वेदिम् एत्य् एति संप्रेष्यति
imāṃ narāḥ kṛṇuta vedim ety eti saṃpreṣyati
- 14
व्याख्यातं खननम्
vyākhyātaṃ khananam
- 15
चतुःशिखण्डा युवतिः सुपेशा घृतप्रतीका भुवनस्य मध्ये
catuḥśikhaṇḍā yuvatiḥ supeśā ghṛtapratīkā bhuvanasya madhye
- 16
तस्यां सुपर्णाव् अधि यौ निविष्टौ तयोर्देवानाम् अधि भागधेयम् इति वेदिम् अभिमन्त्र्योत्तरवेद्यावृता दशपदाम् उत्तरवेदिं पुरस्ताद् अंहीयसीं करोति
tasyāṃ suparṇāv adhi yau niviṣṭau tayordevānām adhi bhāgadheyam iti vedim abhimantryottaravedyāvṛtā daśapadām uttaravediṃ purastād aṃhīyasīṃ karoti
- 17
उदुम्बरशाखाभिः शतशाखाभिर्वा प्रच्छन्नां कृत्वापराह्णिक्यौ श्वोभूते चरमे पूर्वाह्णिक्यौ
udumbaraśākhābhiḥ śataśākhābhirvā pracchannāṃ kṛtvāparāhṇikyau śvobhūte carame pūrvāhṇikyau
- 18
व्रतार्धं प्रयच्छति सर्वं वा
vratārdhaṃ prayacchati sarvaṃ vā
- 19
तथैवापराह्णिक्यौ समस्य प्रवर्ग्यम् उद्वास्योपसदं कुर्याद्यदि पूर्वः प्रवर्ग्यः
tathaivāparāhṇikyau samasya pravargyam udvāsyopasadaṃ kuryādyadi pūrvaḥ pravargyaḥ
- 20
पशुबन्धे ऽग्निप्रणयनं व्याख्यातम्
paśubandhe 'gnipraṇayanaṃ vyākhyātam

