10 shlokas
- 1
यद्य् अपि च भवेद् अन्नकरणं हेतुर्दर्विपिठरप्रकाराणां तथापि सूर्प एवावतिष्ठेत
yady api ca bhaved annakaraṇaṃ heturdarvipiṭharaprakārāṇāṃ tathāpi sūrpa evāvatiṣṭheta
- 2
शब्दाद् अन्नकरणं हेतुर् इति विज्ञायते
śabdād annakaraṇaṃ hetur iti vijñāyate
- 3
शब्दश्च सूर्पस्याह न दर्वीपिठरादीनाम्
śabdaśca sūrpasyāha na darvīpiṭharādīnām
- 4
तद्धि निर्दिश्यते यस्मात्सूर्पेणान्नं क्रियते तस्मात्सूर्पेण जुहोतीति
taddhi nirdiśyate yasmātsūrpeṇānnaṃ kriyate tasmātsūrpeṇa juhotīti
- 5
यथा यस्माद्बलवद् उपध्मातो ऽग्निस्तेन मे गृहं दग्धम् इति नानग्निर् अपि बलवद् उपध्मातो दहतीति गम्यते
yathā yasmādbalavad upadhmāto 'gnistena me gṛhaṃ dagdham iti nānagnir api balavad upadhmāto dahatīti gamyate
- 6
अथ मतं येन येनान्नं क्रियते प्रणाड्या सूर्पाद् अन्येनापि तेन तेनापि होमः क्रियत इति
atha mataṃ yena yenānnaṃ kriyate praṇāḍyā sūrpād anyenāpi tena tenāpi homaḥ kriyata iti
- 7
अव्यवस्था विधीनां स्यान्न केनचित्प्रणाड्यान्नं क्रियते
avyavasthā vidhīnāṃ syānna kenacitpraṇāḍyānnaṃ kriyate
- 8
तत्र यावद् उक्तं स्याज्जुहोतीति तावद् एवान्नकरणेन जुहोतीति
tatra yāvad uktaṃ syājjuhotīti tāvad evānnakaraṇena juhotīti
- 9
अस्मत्पक्षे पुनः सूर्पं स्तूयते तेन ह्य् अन्नं क्रियत इति वृत्तान्तान्वाख्यानं न च वृत्तान्तज्ञापनाय किं तर्हि प्ररोचनायैव
asmatpakṣe punaḥ sūrpaṃ stūyate tena hy annaṃ kriyata iti vṛttāntānvākhyānaṃ na ca vṛttāntajñāpanāya kiṃ tarhi prarocanāyaiva
- 10
तस्माद्धेतुवन्निगदस्यापि स्तुतिर् एव कार्यम् इति
tasmāddhetuvannigadasyāpi stutir eva kāryam iti

