29 shlokas
- 1
इन्द्रायेन्दो मरुत्वत इति मरुत्वत्यो गायत्र्यो भवन्ति
indrāyendo marutvata iti marutvatyo gāyatryo bhavanti
- 2
मरुत्वद्धि माध्यन्दिनं सवनम्
marutvaddhi mādhyandinaṃ savanam
- 3
मृज्यमानः सुहस्त्य इति सिमानां रूपम्
mṛjyamānaḥ suhastya iti simānāṃ rūpam
- 4
समानं वै सिमानां रूपं रेवतीनां च सिमाभ्यो ह्य् अधि रेवत्यः प्रजायन्ते
samānaṃ vai simānāṃ rūpaṃ revatīnāṃ ca simābhyo hy adhi revatyaḥ prajāyante
- 5
एतम् उ त्यं दश क्षिप इत्य् आदित्या आदित्या वा इमाः प्रजास्तासाम् एव मध्यतः प्रतितिष्ठति
etam u tyaṃ daśa kṣipa ity ādityā ādityā vā imāḥ prajāstāsām eva madhyataḥ pratitiṣṭhati
- 6
गायत्र्यः सत्यस्त्रिष्टुभो रूपेण तस्मात्त्रिष्टुभां लोके क्रियन्ते
gāyatryaḥ satyastriṣṭubho rūpeṇa tasmāttriṣṭubhāṃ loke kriyante
- 7
गायत्रं भवति यद् एव गायत्रस्य ब्राह्मणम्
gāyatraṃ bhavati yad eva gāyatrasya brāhmaṇam
- 8
इषोवृधीयं भवति
iṣovṛdhīyaṃ bhavati
- 9
पशवो वा इषोवृधीयं पशूनाम् अवरुद्ध्या इषे वै पञ्चमम् अहर्वृधे षष्ठम् अवर्धन्त ह्य् एतर्हि यजमानम् एवैतेन वर्धयन्ति
paśavo vā iṣovṛdhīyaṃ paśūnām avaruddhyā iṣe vai pañcamam aharvṛdhe ṣaṣṭham avardhanta hy etarhi yajamānam evaitena vardhayanti
- 10
क्रौञ्चं भवति
krauñcaṃ bhavati
- 11
क्रुङ्ङ् एष्यम् अहर् अविन्दद् एष्यम् इव वै षष्ठम् अहर् अहर् एवैतेन विन्दन्ति
kruṅṅ eṣyam ahar avindad eṣyam iva vai ṣaṣṭham ahar ahar evaitena vindanti
- 12
वाजदावर्यो भवन्ति
vājadāvaryo bhavanti
- 13
अन्नं वै वाजो ऽन्नाद्यस्यावरुद्ध्यै यदा हि वा अन्नम् अथ गौर् अथाश्वो ऽथ पुरुषो वाजी
annaṃ vai vājo 'nnādyasyāvaruddhyai yadā hi vā annam atha gaur athāśvo 'tha puruṣo vājī
- 14
रेवत्यो भवन्ति प्रतिष्ठायै
revatyo bhavanti pratiṣṭhāyai
- 15
षण्णिधनी षड्रात्रस्य धृत्यै
ṣaṇṇidhanī ṣaḍrātrasya dhṛtyai
- 16
आपो वै रेवत्यस्ता यत्पृष्ठं कुर्युर् अपशुर्यजमानः स्यात्पशून् अस्य निर्दहेयुर्यत्र वा आपो विवर्तन्ते तद् ओषधयो जायन्ते ऽथ यत्रावतिष्ठन्ते निर्मृतुकास्तत्र भवन्ति तस्मात्पवमाने कुर्वन्ति पराचा हि पवमानेन स्तुवते
āpo vai revatyastā yatpṛṣṭhaṃ kuryur apaśuryajamānaḥ syātpaśūn asya nirdaheyuryatra vā āpo vivartante tad oṣadhayo jāyante 'tha yatrāvatiṣṭhante nirmṛtukāstatra bhavanti tasmātpavamāne kurvanti parācā hi pavamānena stuvate
- 17
मेथी वा इषोवृधीयं रज्जुः क्रौञ्चं वत्सो वाजदावर्यो रेवत्यो मातरो यद् एतान्य् एवं सामानि क्रियन्त एवम् एव प्रत्तां दुग्धे
methī vā iṣovṛdhīyaṃ rajjuḥ krauñcaṃ vatso vājadāvaryo revatyo mātaro yad etāny evaṃ sāmāni kriyanta evam eva prattāṃ dugdhe
- 18
औक्ष्णोरन्ध्रे भवतः
aukṣṇorandhre bhavataḥ
- 19
उक्ष्णोरन्ध्रो वा एताभ्यां काव्यो ऽञ्जसा स्वर्गं लोकम् अपश्यत्स्वर्गस्य लोकस्यानुख्यात्यै स्वर्गाल्लोकान्न च्यवते तुष्टुवानः
ukṣṇorandhro vā etābhyāṃ kāvyo 'ñjasā svargaṃ lokam apaśyatsvargasya lokasyānukhyātyai svargāllokānna cyavate tuṣṭuvānaḥ
- 20
वाजजिद्भवति सर्वस्याप्त्यै सर्वस्य जित्यै सर्वं वा एते वाजं जयन्ति ये षष्ठम् अहर् आगच्छन्ति
vājajidbhavati sarvasyāptyai sarvasya jityai sarvaṃ vā ete vājaṃ jayanti ye ṣaṣṭham ahar āgacchanti
- 21
अन्नं वै वाजो ऽन्नाद्यस्यावरुद्ध्यै
annaṃ vai vājo 'nnādyasyāvaruddhyai
- 22
वरुणसाम भवति
varuṇasāma bhavati
- 23
एतेन वै वरुणो राज्यम् आधिपत्यम् अगच्छद्राज्यम् आधिपत्यं गच्छति वरुणसाम्ना तुष्टुवानः
etena vai varuṇo rājyam ādhipatyam agacchadrājyam ādhipatyaṃ gacchati varuṇasāmnā tuṣṭuvānaḥ
- 24
अङ्गिरसां गोष्ठो भवति
aṅgirasāṃ goṣṭho bhavati
- 25
पशवो वै रेवत्यो गोष्ठम् एव तत्पशुभ्यः पर्यस्यन्ति तम् एवैनान्प्रवर्तयन्त्य् अविस्रंसाय
paśavo vai revatyo goṣṭham eva tatpaśubhyaḥ paryasyanti tam evainānpravartayanty avisraṃsāya
- 26
इहवद्वामदेव्यं भवति
ihavadvāmadevyaṃ bhavati
- 27
एतेन वै वामदेवो ऽन्नस्य पुरोधाम् अगच्छद् अन्नं वै ब्रह्मणः पुरोधान्नस्यावरुद्ध्यै
etena vai vāmadevo 'nnasya purodhām agacchad annaṃ vai brahmaṇaḥ purodhānnasyāvaruddhyai
- 28
गायत्रीषु स्तुवन्ति प्रतिष्ठायै ब्रह्मवर्चसाय येनैव प्राणेन प्रयन्ति तम् अभ्युद्यन्ति
gāyatrīṣu stuvanti pratiṣṭhāyai brahmavarcasāya yenaiva prāṇena prayanti tam abhyudyanti
- 29
मरुत्वत्यो गायत्र्यो भवन्ति तद् उ त्रैष्टुभाद्रूपान्न यन्ति स्तोमः
marutvatyo gāyatryo bhavanti tad u traiṣṭubhādrūpānna yanti stomaḥ

