16 shlokas
- 1
ज्योतिर्यज्ञस्य पवते मधु प्रियम् इति षष्ठस्याह्नः प्रतिपद्भवति
jyotiryajñasya pavate madhu priyam iti ṣaṣṭhasyāhnaḥ pratipadbhavati
- 2
ज्योतिर्वै गायत्री छन्दसां ज्योतिः रेवती साम्नां ज्योतिस्त्रयस्त्रिंशः स्तोमानां ज्योतिर् एव तत्सम्यक्संदधात्य् अपि ह पुत्रस्य पुत्रो ज्योतिष्मान्भवति
jyotirvai gāyatrī chandasāṃ jyotiḥ revatī sāmnāṃ jyotistrayastriṃśaḥ stomānāṃ jyotir eva tatsamyaksaṃdadhāty api ha putrasya putro jyotiṣmānbhavati
- 3
मधु प्रियम् इति पशवो वै रेवत्यो मधु प्रियं तद् एव तद् अभिवदति
madhu priyam iti paśavo vai revatyo madhu priyaṃ tad eva tad abhivadati
- 4
मदिन्तमो मत्सर इन्द्रियो रस इतीन्द्रियं वै वीर्यं रसः पशवस्तद् एव तद् अभिवदति
madintamo matsara indriyo rasa itīndriyaṃ vai vīryaṃ rasaḥ paśavastad eva tad abhivadati
- 5
असृक्षत प्र वाजिन इत्य् अनुरूपो भवति
asṛkṣata pra vājina ity anurūpo bhavati
- 6
सृष्टानीव ह्य् एतर्ह्य् अहानि
sṛṣṭānīva hy etarhy ahāni
- 7
पूर्वम् उ चैव तद्रूपम् अपरेण रूपेणानुवदति यत्पूर्वं रूपम् अपरेण रूपेणानुवदति तद् अनुरूपस्यानुरूपत्वम् अनुरूप एनं पुत्रो जायते य एवं वेद स्तोत्रीयानुरूपौ तृचौ भवतः प्राणापानानाम् अवरुद्ध्यै
pūrvam u caiva tadrūpam apareṇa rūpeṇānuvadati yatpūrvaṃ rūpam apareṇa rūpeṇānuvadati tad anurūpasyānurūpatvam anurūpa enaṃ putro jāyate ya evaṃ veda stotrīyānurūpau tṛcau bhavataḥ prāṇāpānānām avaruddhyai
- 8
दशर्चौ भवतो दशाक्षरा विराट्वैराजम् अन्नम् अन्नाद्यस्यावरुद्ध्यै
daśarcau bhavato daśākṣarā virāṭvairājam annam annādyasyāvaruddhyai
- 9
उत्तरो दशर्चो भवति सोदर्क इन्द्रियस्य वीर्यस्य रसस्यानतिक्षाराय
uttaro daśarco bhavati sodarka indriyasya vīryasya rasasyānatikṣārāya
- 10
यत्र वै देवा इन्द्रियं वीर्यं रसम् अपश्यंस्तद् अनुन्यतुदन्
yatra vai devā indriyaṃ vīryaṃ rasam apaśyaṃstad anunyatudan
- 11
चतुरृचो भवति प्रतिष्ठायै
caturṛco bhavati pratiṣṭhāyai
- 12
ध्वस्रे वै पुरुषन्ती तरन्तपुरुमीढाभ्यां वैददश्विभ्यां सहस्राण्य् अदित्सतां ताव् ऐक्षेतां कथं नाव् इदम् आत्तम् अप्रतिगृहीतं स्याद् इति तौ प्रत्य् एतां ध्वस्रयोः पुरुषन्त्योर् आ सहस्राणि दद्महे तरत्स मन्दी धावतीति ततो वै तत्तयोर् आत्तम् अप्रतिगृहीतम् अभवत्
dhvasre vai puruṣantī tarantapurumīḍhābhyāṃ vaidadaśvibhyāṃ sahasrāṇy aditsatāṃ tāv aikṣetāṃ kathaṃ nāv idam āttam apratigṛhītaṃ syād iti tau praty etāṃ dhvasrayoḥ puruṣantyor ā sahasrāṇi dadmahe taratsa mandī dhāvatīti tato vai tattayor āttam apratigṛhītam abhavat
- 13
आत्तम् अस्याप्रतिगृहीतं भवति य एवं वेद
āttam asyāpratigṛhītaṃ bhavati ya evaṃ veda
- 14
विनाराशंसो भवत्य् उभयस्यान्नाद्यस्यावरुद्ध्यै मानुषस्य च दैवस्य च
vinārāśaṃso bhavaty ubhayasyānnādyasyāvaruddhyai mānuṣasya ca daivasya ca
- 15
तृच उत्तमो भवति येनैव प्राणेन प्रयन्ति तम् अभ्युद्यन्ति
tṛca uttamo bhavati yenaiva prāṇena prayanti tam abhyudyanti
- 16
त्रयस्त्रिंश एव स्तोमो भवति प्रतिष्ठायै देवतासु वा एष प्रतिष्ठितः
trayastriṃśa eva stomo bhavati pratiṣṭhāyai devatāsu vā eṣa pratiṣṭhitaḥ

