24 shlokas
- 1
परिस्वानो गिरिष्ठा इति परिवत्यो गायत्र्यो भवन्ति सर्वस्य पर्याप्त्यै
parisvāno giriṣṭhā iti parivatyo gāyatryo bhavanti sarvasya paryāptyai
- 2
समुन्वेयो वसूनाम् इति पशवो वै वसु पशूनाम् अवरुद्ध्यै
samunveyo vasūnām iti paśavo vai vasu paśūnām avaruddhyai
- 3
तं वः सखायो मदायेति वालखिल्याः
taṃ vaḥ sakhāyo madāyeti vālakhilyāḥ
- 4
वालखिल्याव् एतौ तृचौ षष्ठे चाहनि सप्तमे च
vālakhilyāv etau tṛcau ṣaṣṭhe cāhani saptame ca
- 5
यद् एतौ वालखिल्यौ तृचौ भवतो ऽह्नोर् एव व्यतिषङ्गायाव्यवस्रंसाय सन्तत्यै
yad etau vālakhilyau tṛcau bhavato 'hnor eva vyatiṣaṅgāyāvyavasraṃsāya santatyai
- 6
सोमाः पवन्त इन्दव इत्य् अनुष्टुभो निभसदो भवन्ति प्रतिष्ठायै
somāḥ pavanta indava ity anuṣṭubho nibhasado bhavanti pratiṣṭhāyai
- 7
अया पवा पवस्वैना वसूनीति त्रिष्टुभस्सत्यो जगत्यो रूपेण तस्माज्जगतीनां लोके क्रियन्ते
ayā pavā pavasvainā vasūnīti triṣṭubhassatyo jagatyo rūpeṇa tasmājjagatīnāṃ loke kriyante
- 8
गायत्रं भवति यद् एव गायत्रस्य ब्राह्मणम्
gāyatraṃ bhavati yad eva gāyatrasya brāhmaṇam
- 9
वैदन्वतानि भवन्ति
vaidanvatāni bhavanti
- 10
विदन्वान्वै भार्गव इन्द्रस्य प्रत्यहंस्तं शुग् आर्छत्स तपो ऽतप्यत स एतानि वैदन्वतान्य् अपश्यत्तैः शुचम् अपाहताप शुचं हते वैदन्वतैस्तुष्टुवानः
vidanvānvai bhārgava indrasya pratyahaṃstaṃ śug ārchatsa tapo 'tapyata sa etāni vaidanvatāny apaśyattaiḥ śucam apāhatāpa śucaṃ hate vaidanvataistuṣṭuvānaḥ
- 11
भरद्वाजस्य लोम भवति पशवो वै लोम पशूनाम् अवरुद्ध्यै
bharadvājasya loma bhavati paśavo vai loma paśūnām avaruddhyai
- 12
तद् उ दीर्घम् इत्य् आहुर् आयुर्वै दीर्घम् आयुषो ऽवरुद्ध्यै
tad u dīrgham ity āhur āyurvai dīrgham āyuṣo 'varuddhyai
- 13
कार्णश्रवसं भवति शृण्वन्ति तुष्टुवानम्
kārṇaśravasaṃ bhavati śṛṇvanti tuṣṭuvānam
- 14
कर्णश्रवा वा एतद् आङ्गिरसः पशुकामः सामापश्यत्तेन सहस्रं पशून् असृजत यद् एतत्साम भवति पशूनां पुष्ट्यै
karṇaśravā vā etad āṅgirasaḥ paśukāmaḥ sāmāpaśyattena sahasraṃ paśūn asṛjata yad etatsāma bhavati paśūnāṃ puṣṭyai
- 15
गौरीवितं भवति गौरीवितस्य ब्राह्मणम्
gaurīvitaṃ bhavati gaurīvitasya brāhmaṇam
- 16
मधुश्च्युन्निधनं भवति
madhuścyunnidhanaṃ bhavati
- 17
परमस्यान्नाद्यस्यावरुद्ध्यै परमं वा एतद् अन्नाद्यं यन्मधु
paramasyānnādyasyāvaruddhyai paramaṃ vā etad annādyaṃ yanmadhu
- 18
प्रजापतेर्वा एतौ स्तनौ यद्घृतश्च्युन्निधनं च मधुश्च्युन्निधनं च यज्ञो वै प्रजापतिस्तम् एताभ्यां दुग्धे यं कामं कामयते तं दुग्धे
prajāpatervā etau stanau yadghṛtaścyunnidhanaṃ ca madhuścyunnidhanaṃ ca yajño vai prajāpatistam etābhyāṃ dugdhe yaṃ kāmaṃ kāmayate taṃ dugdhe
- 19
क्रौञ्चे भवतः
krauñce bhavataḥ
- 20
क्रुङ्ङ् एष्यम् अहर् अविन्दद् एष्यमिव वै षष्ठम् अहर् अहरेवैताभ्याम्विन्दति
kruṅṅ eṣyam ahar avindad eṣyamiva vai ṣaṣṭham ahar aharevaitābhyāmvindati
- 21
श्नौष्टं भवति
śnauṣṭaṃ bhavati
- 22
श्नुष्टिर्वा एतेनाङ्गिरसो ऽञ्जसा स्वर्गं लोकम् अपश्यत्स्वर्गस्य लोकस्यानुख्यात्यै स्वर्गात्लोकान्न च्यवते तुष्टुवानः
śnuṣṭirvā etenāṅgiraso 'ñjasā svargaṃ lokam apaśyatsvargasya lokasyānukhyātyai svargātlokānna cyavate tuṣṭuvānaḥ
- 23
अग्नेर्वा एतद्वैश्वानरस्य साम दीदिहीति निधनम् उपयन्ति दीदायेव ह्य् अग्निर्वैश्वानरः
agnervā etadvaiśvānarasya sāma dīdihīti nidhanam upayanti dīdāyeva hy agnirvaiśvānaraḥ
- 24
निधनान्ताः पवमाना भवन्त्य् अह्नो धृत्यै स्तोमः
nidhanāntāḥ pavamānā bhavanty ahno dhṛtyai stomaḥ

