26 shlokas
- 1
अर्षा सोम द्युमत्तम इति विष्णुमत्यो गायत्र्यो भवन्ति
arṣā soma dyumattama iti viṣṇumatyo gāyatryo bhavanti
- 2
ब्रह्म वै गायत्री यज्ञो विष्णुर्ब्रह्मण्य् एव तद्यज्ञं प्रतिष्ठापयति
brahma vai gāyatrī yajño viṣṇurbrahmaṇy eva tadyajñaṃ pratiṣṭhāpayati
- 3
सोम उष्वाण स्तोतृभिर् इति सिमानां रूपं स्वेनैवैतास्तद्रूपेण समर्धयति
soma uṣvāṇa stotṛbhir iti simānāṃ rūpaṃ svenaivaitāstadrūpeṇa samardhayati
- 4
यत्सोम चित्रम् उक्थ्यम् इति गायत्र्यः सत्यस्त्रिष्टुभो रूपेण तस्मात्त्रिष्टुभां लोके क्रियन्ते
yatsoma citram ukthyam iti gāyatryaḥ satyastriṣṭubho rūpeṇa tasmāttriṣṭubhāṃ loke kriyante
- 5
गायत्रं भवति यद् एव गायत्रस्य ब्राह्मणम्
gāyatraṃ bhavati yad eva gāyatrasya brāhmaṇam
- 6
यण्वं भवति पशवो वै यण्वं पशूनाम् अवरुद्ध्यै
yaṇvaṃ bhavati paśavo vai yaṇvaṃ paśūnām avaruddhyai
- 7
सन्ततं गायति यज्ञस्य संतत्यै
santataṃ gāyati yajñasya saṃtatyai
- 8
अध्यर्धेडं तथा ह्य् एतस्याह्नो रूपम्
adhyardheḍaṃ tathā hy etasyāhno rūpam
- 9
शाकलं भवति
śākalaṃ bhavati
- 10
एतेन वै शकलः पञ्चमे ऽहनि प्रत्यतिष्ठत्प्रतितिष्ठति शाकलेन तुष्टुवानः
etena vai śakalaḥ pañcame 'hani pratyatiṣṭhatpratitiṣṭhati śākalena tuṣṭuvānaḥ
- 11
वार्शं भवति
vārśaṃ bhavati
- 12
वृशो वैजानस्त्र्यरुणस्य त्रैधातवस्यैक्ष्वाकस्य पुरोहित आसीत्स ऐक्ष्वाको ऽधावयत्ब्राह्मणकुमारं रथेन व्यछिनत्स पुरोहितम् अब्रवीत्तव मा पुरोधायाम् इदम् ईदृग् उपागाद् इति तम् एतेन साम्ना समैरयत्तद्वाव स तर्ह्य् अकामयत कामसनि साम वार्शं कामम् एवैतेनावरुन्द्धे
vṛśo vaijānastryaruṇasya traidhātavasyaikṣvākasya purohita āsītsa aikṣvāko 'dhāvayatbrāhmaṇakumāraṃ rathena vyachinatsa purohitam abravīttava mā purodhāyām idam īdṛg upāgād iti tam etena sāmnā samairayattadvāva sa tarhy akāmayata kāmasani sāma vārśaṃ kāmam evaitenāvarunddhe
- 13
अध्यर्धेडं तथा ह्य् एतस्याह्नो रूपम्
adhyardheḍaṃ tathā hy etasyāhno rūpam
- 14
मानवं भवति
mānavaṃ bhavati
- 15
एतेन वै मनुः प्रजातिं भूमानम् अगच्छत्प्रजायते बहुर्भवति मानवेन तुष्टुवानः
etena vai manuḥ prajātiṃ bhūmānam agacchatprajāyate bahurbhavati mānavena tuṣṭuvānaḥ
- 16
आनूपं भवति
ānūpaṃ bhavati
- 17
एतेन वै वध्र्यश्व आनूपः पशूनां भूमानम् आश्नुत पशूनां भूमानम् अश्नुत आनूपेन तुष्टुवानः
etena vai vadhryaśva ānūpaḥ paśūnāṃ bhūmānam āśnuta paśūnāṃ bhūmānam aśnuta ānūpena tuṣṭuvānaḥ
- 18
वाम्रं भवति
vāmraṃ bhavati
- 19
सामार्षेयेण प्रशस्तं यं वै गाम् अश्वं पुरुषं प्रशंसन्ति वाम इति तं प्रशंसन्त्य् अहर् एवैतेन प्रशंसन्ति
sāmārṣeyeṇa praśastaṃ yaṃ vai gām aśvaṃ puruṣaṃ praśaṃsanti vāma iti taṃ praśaṃsanty ahar evaitena praśaṃsanti
- 20
अध्यर्धेडं तथा ह्य् एतस्याह्नो रूपम्
adhyardheḍaṃ tathā hy etasyāhno rūpam
- 21
त्रिणिधनम् आग्नेयं भवति प्रतिष्ठायै
triṇidhanam āgneyaṃ bhavati pratiṣṭhāyai
- 22
अग्निः सृष्टो नोददीप्यत तं प्रजापतिर् एतेन साम्नोपाधमत्स उददीप्यत दीप्तिश्च वा एतत्साम ब्रह्मवर्चसं च दीप्तिं चैवैतेन ब्रह्मवर्चसं चावरुन्द्धे
agniḥ sṛṣṭo nodadīpyata taṃ prajāpatir etena sāmnopādhamatsa udadīpyata dīptiśca vā etatsāma brahmavarcasaṃ ca dīptiṃ caivaitena brahmavarcasaṃ cāvarunddhe
- 23
शैशवं भवति
śaiśavaṃ bhavati
- 24
शिशुर्वा आङ्गिरसो मन्त्रकृतां मन्त्रकृद् आसीत्स पितॄन्पुत्रका इत्य् आमन्त्रयत तं पितरो ऽब्रुवन्न धर्मं करोषि यो नः पितॄन्सतः पुत्रका इत्य् आमन्त्रयस इति सो ऽब्रवीद् अहं वाव वः पितास्मि यो मन्त्रकृद् अस्मीति ते देवेष्व् अपृच्छन्त ते देवा अब्रुवन्न् एष वाव पिता यो मन्त्रकृद् इति तद्वै स उदजयद् उज्जयति शैशवेन तुष्टुवानः
śiśurvā āṅgiraso mantrakṛtāṃ mantrakṛd āsītsa pitṝnputrakā ity āmantrayata taṃ pitaro 'bruvanna dharmaṃ karoṣi yo naḥ pitṝnsataḥ putrakā ity āmantrayasa iti so 'bravīd ahaṃ vāva vaḥ pitāsmi yo mantrakṛd asmīti te deveṣv apṛcchanta te devā abruvann eṣa vāva pitā yo mantrakṛd iti tadvai sa udajayad ujjayati śaiśavena tuṣṭuvānaḥ
- 25
गायत्रीषु स्तुवन्ति प्रतिष्ठायै ब्रह्मवर्चसाय येनैव प्राणेन प्रयन्ति तम् अभ्युद्यन्ति
gāyatrīṣu stuvanti pratiṣṭhāyai brahmavarcasāya yenaiva prāṇena prayanti tam abhyudyanti
- 26
विष्णुमत्यो गायत्र्यो भवन्ति तद् उ त्रैष्टुभाद्रूपान्न यन्ति स्तोमः
viṣṇumatyo gāyatryo bhavanti tad u traiṣṭubhādrūpānna yanti stomaḥ

