16 shlokas
- 1
आ ते अग्न इधीमहि इति
ā te agna idhīmahi iti
- 2
अपच्छिद् इव वा एतद्यज्ञकाण्डं यद् उक्थानि यद् एति सलोमत्वायैव
apacchid iva vā etadyajñakāṇḍaṃ yad ukthāni yad eti salomatvāyaiva
- 3
इन्द्राय साम गायतेति पूर्णाः ककुभस्तेनानशनायुको भवति
indrāya sāma gāyateti pūrṇāḥ kakubhastenānaśanāyuko bhavati
- 4
पुरुषो वै ककुप्पुरुषम् एव तन्मध्यतः प्रीणाति
puruṣo vai kakuppuruṣam eva tanmadhyataḥ prīṇāti
- 5
असावि सोम इन्द्र त इति सिमानां रूपं स्वेनैवैनांस्तद्रूपेण समर्धयति
asāvi soma indra ta iti simānāṃ rūpaṃ svenaivaināṃstadrūpeṇa samardhayati
- 6
संजयं भवति
saṃjayaṃ bhavati
- 7
देवाश्च वा असुराश्च समदधत यतरे नः संजयांस्तेषां नः पशवो ऽसान् इति ते देवा असुरान्संजयेन समजयन्यत्समजयंस्तस्मात्संजयं पशूनाम् अवरुद्ध्यै संजयं क्रियते
devāśca vā asurāśca samadadhata yatare naḥ saṃjayāṃsteṣāṃ naḥ paśavo 'sān iti te devā asurānsaṃjayena samajayanyatsamajayaṃstasmātsaṃjayaṃ paśūnām avaruddhyai saṃjayaṃ kriyate
- 8
सौमित्रं भवति
saumitraṃ bhavati
- 9
दीर्घजिह्वी वा इदं रक्षो यज्ञहा यज्ञियान् अवलिहत्य् अचरत्ताम् इन्द्रः कयाचन मायया हन्तुं नाशंसताथ ह सुमित्रः कुत्सः कल्याण आस तम् अब्रवीद् इमाम् अच्छाब्रूष्वेति ताम् अच्छाब्रूत सैनम् अब्रवीन्नाहैतन्न शुश्रुव प्रियम् इव तु मे हृदयस्येति ताम् अज्ञपयत्तां संस्कृते ऽहतां तद्वाव तौ तर्ह्य् अकामयेतां कामसनि साम सौमित्रं कामम् एवैतेनावरुन्द्धे
dīrghajihvī vā idaṃ rakṣo yajñahā yajñiyān avalihaty acarattām indraḥ kayācana māyayā hantuṃ nāśaṃsatātha ha sumitraḥ kutsaḥ kalyāṇa āsa tam abravīd imām acchābrūṣveti tām acchābrūta sainam abravīnnāhaitanna śuśruva priyam iva tu me hṛdayasyeti tām ajñapayattāṃ saṃskṛte 'hatāṃ tadvāva tau tarhy akāmayetāṃ kāmasani sāma saumitraṃ kāmam evaitenāvarunddhe
- 10
सुमित्रः सन्क्रूरम् अकर् इत्य् एनं वाग् अभ्यवदत्तं शुग् आर्छत्स तपो ऽतप्यत स एतत्सौमित्रम् अपश्यत्तेन शुचम् अपाहताप शुचं हते सौमित्रेण तुष्टुवानः
sumitraḥ sankrūram akar ity enaṃ vāg abhyavadattaṃ śug ārchatsa tapo 'tapyata sa etatsaumitram apaśyattena śucam apāhatāpa śucaṃ hate saumitreṇa tuṣṭuvānaḥ
- 11
महावैश्वामित्रं भवति
mahāvaiśvāmitraṃ bhavati
- 12
पाप्मानं हत्वा यद् अमहीयन्त तन्महावैश्वामित्रस्य महावैश्वामित्रत्वम्
pāpmānaṃ hatvā yad amahīyanta tanmahāvaiśvāmitrasya mahāvaiśvāmitratvam
- 13
हाया इहया ओहा ओहेति पशून् एवैतेन न्यौहन्त
hāyā ihayā ohā oheti paśūn evaitena nyauhanta
- 14
त्रीडं भवति त्रिरात्रस्य धृत्यै
trīḍaṃ bhavati trirātrasya dhṛtyai
- 15
द्रवन्तीम् इडाम् उत्तमाम् उपयन्ति षष्ठस्याह्नः सन्तत्यै
dravantīm iḍām uttamām upayanti ṣaṣṭhasyāhnaḥ santatyai
- 16
त्रिणव एव स्तोमो भवति प्रतिष्ठायै पुष्ट्यै त्रिवृद्वा एष पुष्टः
triṇava eva stomo bhavati pratiṣṭhāyai puṣṭyai trivṛdvā eṣa puṣṭaḥ

