18 shlokas
- 1
यातयामान्य् अन्यानि छन्दांस्य् अयातयामा गायत्री तस्माद्गायत्रीषु स्तुवन्ति
yātayāmāny anyāni chandāṃsy ayātayāmā gāyatrī tasmādgāyatrīṣu stuvanti
- 2
सुरूपकृत्नुम् ऊतय इत्य् अभ्यारम्भेण षट्पदाः षष्ठस्याह्नो रूपं तेन षष्ठम् अहर् आरभन्ते सन्तत्यै
surūpakṛtnum ūtaya ity abhyārambheṇa ṣaṭpadāḥ ṣaṣṭhasyāhno rūpaṃ tena ṣaṣṭham ahar ārabhante santatyai
- 3
उभे यद् इन्द्र रोदसी इति षट्पदाः षष्ठस्याह्नो रूपं तेन षष्ठम् अहर् आरभन्ते सन्तत्यै
ubhe yad indra rodasī iti ṣaṭpadāḥ ṣaṣṭhasyāhno rūpaṃ tena ṣaṣṭham ahar ārabhante santatyai
- 4
रेवतीषु वारवन्तीयं पृष्ठं भवति
revatīṣu vāravantīyaṃ pṛṣṭhaṃ bhavati
- 5
अपां वा एष रसो यद्रेवत्यो रेवतीनां रसो यद्वारवन्तीयं सरसा एव तद्रेवतीः प्रयुङ्क्ते यद्वारवन्तीयेन पृष्ठेन स्तुवते
apāṃ vā eṣa raso yadrevatyo revatīnāṃ raso yadvāravantīyaṃ sarasā eva tadrevatīḥ prayuṅkte yadvāravantīyena pṛṣṭhena stuvate
- 6
रेवद्वा एतद्रैवत्यं यद्वारवन्तीयम् अस्य रेवान्रैवत्यो जायते
revadvā etadraivatyaṃ yadvāravantīyam asya revānraivatyo jāyate
- 7
रेवान्भवति य एवं वेद
revānbhavati ya evaṃ veda
- 8
केशिने वा एतद्दाल्भ्याय सामाविरभवत्तद् एनम् अब्रवीद् अगातारो मा गायन्ति मा मयोद्गासिषुर् इति कथं त आगा भगव इत्य् अब्रवीद् आगेयम् एवास्म्य् आगायन्न् इव गायेत्प्रतिष्ठायै तद् अलम्मं पारिजानतं पश्चादक्षं शयानम् एताम् आगां गायन्तम् अजानात्तम् अब्रवीत्पुरस्त्वा दधा इति तम् अब्रुवन्को न्व् अयं कस्मा अलम् इत्य् अलं नु वै मह्यम् इति तद् अलम्मस्यालम्मत्वम्
keśine vā etaddālbhyāya sāmāvirabhavattad enam abravīd agātāro mā gāyanti mā mayodgāsiṣur iti kathaṃ ta āgā bhagava ity abravīd āgeyam evāsmy āgāyann iva gāyetpratiṣṭhāyai tad alammaṃ pārijānataṃ paścādakṣaṃ śayānam etām āgāṃ gāyantam ajānāttam abravītpurastvā dadhā iti tam abruvanko nv ayaṃ kasmā alam ity alaṃ nu vai mahyam iti tad alammasyālammatvam
- 9
इहेहेति गायेत्प्रतिष्ठायै
iheheti gāyetpratiṣṭhāyai
- 10
ऋषभो रैवतो भवति
ṛṣabho raivato bhavati
- 11
पशवो वै रैवत्यः पशुष्व् एव तन्मिथुनम् अप्यर्जति प्रजात्यै न ह वा अनृषभाः पशवः प्रजायन्ते
paśavo vai raivatyaḥ paśuṣv eva tanmithunam apyarjati prajātyai na ha vā anṛṣabhāḥ paśavaḥ prajāyante
- 12
श्येनो भवति
śyeno bhavati
- 13
श्येनो ह वै पूर्वप्रेतानि वयांस्य् आप्नोति पूर्वप्रेतानीव वै पूर्वाण्य् अहानि तेषाम् आप्त्यै श्येनः क्रियते
śyeno ha vai pūrvapretāni vayāṃsy āpnoti pūrvapretānīva vai pūrvāṇy ahāni teṣām āptyai śyenaḥ kriyate
- 14
श्येनो वा एतद् अहः संपारयितुम् अर्हति स हि वयसाम् आशिष्ठस्तस्यानपहननाय सम्पारणायैतत्क्रियते ऽन्तो हि षष्ठं चाहः सप्तमं च
śyeno vā etad ahaḥ saṃpārayitum arhati sa hi vayasām āśiṣṭhastasyānapahananāya sampāraṇāyaitatkriyate 'nto hi ṣaṣṭhaṃ cāhaḥ saptamaṃ ca
- 15
ब्रह्मवादिनो वदन्ति यद्बृहदायतनानि पृष्ठान्य् अथैते द्वे गायत्र्यौ द्वे जगत्यौ क्व तर्हि बृहत्यो भवन्तीति
brahmavādino vadanti yadbṛhadāyatanāni pṛṣṭhāny athaite dve gāyatryau dve jagatyau kva tarhi bṛhatyo bhavantīti
- 16
ये द्वे जगत्योः पदे ते गायत्र्या उपसंपद्येते तत्सर्वा बृहत्यो भवन्त्य् आयतने पृष्ठानि यातयत्यायतनवान्भवति
ye dve jagatyoḥ pade te gāyatryā upasaṃpadyete tatsarvā bṛhatyo bhavanty āyatane pṛṣṭhāni yātayatyāyatanavānbhavati
- 17
षट्पदासु स्तुवन्ति षड्रात्रस्य धृत्यै
ṣaṭpadāsu stuvanti ṣaḍrātrasya dhṛtyai
- 18
सप्तपदया यजति सप्तमस्याह्नः सन्तत्यै स्तोमः
saptapadayā yajati saptamasyāhnaḥ santatyai stomaḥ

