28 shlokas
- 1
असाव्य् अंशुर्मदायेति गायत्री भवति मदवद्वै रसवत्तृतीयसवनं मदम् एव तद्रसं दधाति
asāvy aṃśurmadāyeti gāyatrī bhavati madavadvai rasavattṛtīyasavanaṃ madam eva tadrasaṃ dadhāti
- 2
अभि द्युम्नं बृहद्यश इत्य् अभीति रथन्तरस्य रूपं बृहद् इति बृहत उभयोः सह रूपम् उपैत्युभौ हि वर्णावेतद् अहः
abhi dyumnaṃ bṛhadyaśa ity abhīti rathantarasya rūpaṃ bṛhad iti bṛhata ubhayoḥ saha rūpam upaityubhau hi varṇāvetad ahaḥ
- 3
प्राणा शिशुर्महीनाम् इति सिमानां रूपं मह्यो हि सिमाः स्वेनैवैनास्तद्रूपेण समर्धयति
prāṇā śiśurmahīnām iti simānāṃ rūpaṃ mahyo hi simāḥ svenaivaināstadrūpeṇa samardhayati
- 4
पवस्व वाजसातय इति वैष्णव्यो ऽनुष्टुभो भवन्ति
pavasva vājasātaya iti vaiṣṇavyo 'nuṣṭubho bhavanti
- 5
यज्ञो वै विष्णुर्यद् अत्र नापि क्रियते तद्विष्णुना यज्ञेनापि करोति
yajño vai viṣṇuryad atra nāpi kriyate tadviṣṇunā yajñenāpi karoti
- 6
इन्दुर्वाजी पवते गोन्योघा इति सिमानां रूपं स्वेनैवैनास्तद्रूपेण समर्धयति
indurvājī pavate gonyoghā iti simānāṃ rūpaṃ svenaivaināstadrūpeṇa samardhayati
- 7
त्रिष्टुभः सत्यो जगत्यो रूपेण तस्माज्जगतीनां लोके क्रियन्ते
triṣṭubhaḥ satyo jagatyo rūpeṇa tasmājjagatīnāṃ loke kriyante
- 8
गायत्रं भवति यद् एव गायत्रस्य ब्राह्मणम्
gāyatraṃ bhavati yad eva gāyatrasya brāhmaṇam
- 9
संतनि भवति पञ्चमस्याह्नस्सन्तत्यै
saṃtani bhavati pañcamasyāhnassantatyai
- 10
वाग्वा एषा प्रतता यद्द्वादशाहस्तस्या एष विषुवान्यत्पञ्चमम् अहस्ताम् एवैतेन संतनोति
vāgvā eṣā pratatā yaddvādaśāhastasyā eṣa viṣuvānyatpañcamam ahastām evaitena saṃtanoti
- 11
च्यावनं भवति
cyāvanaṃ bhavati
- 12
प्रजातिर्वै च्यावनं प्रजायते बहुर्भवति च्यावनेन तुष्टुवानः
prajātirvai cyāvanaṃ prajāyate bahurbhavati cyāvanena tuṣṭuvānaḥ
- 13
एभ्यो वै लोकेभ्यो वृष्टिर् अपाक्रामत्तां प्रजापतिश्च्यावनेनाच्यावयद्यद् अच्यावयत्तच्च्यावनस्य च्यावनत्वं च्यावयति वृष्टिं च्यावनेन तुष्टुवानः
ebhyo vai lokebhyo vṛṣṭir apākrāmattāṃ prajāpatiścyāvanenācyāvayadyad acyāvayattaccyāvanasya cyāvanatvaṃ cyāvayati vṛṣṭiṃ cyāvanena tuṣṭuvānaḥ
- 14
क्रोशं भवति
krośaṃ bhavati
- 15
एतेन वा इन्द्र इन्द्रक्रोशे विश्वामित्रजमदग्नी इमा गाव इत्याक्रोशत्पशूनाम् अवरुद्ध्यै क्रोशं क्रियते
etena vā indra indrakrośe viśvāmitrajamadagnī imā gāva ityākrośatpaśūnām avaruddhyai krośaṃ kriyate
- 16
गौरीवितं भवति यद् एव गौरीवितस्य ब्राह्मणम्
gaurīvitaṃ bhavati yad eva gaurīvitasya brāhmaṇam
- 17
ऋषभः शाक्वरो भवति
ṛṣabhaḥ śākvaro bhavati
- 18
पशवो वै शक्वर्यः पशुष्वेव तन्मिथुनम् अप्यर्जति प्रजात्यै न ह वा अनृषभाः पशवः प्रजायन्ते
paśavo vai śakvaryaḥ paśuṣveva tanmithunam apyarjati prajātyai na ha vā anṛṣabhāḥ paśavaḥ prajāyante
- 19
पार्थं भवति
pārthaṃ bhavati
- 20
एतेन वै पृथी वैन्य उभयेषां पशूनाम् आधिपत्यम् आश्नुतोभयेषां पशूनाम् आधिपत्यम् अश्नुते पार्थेन तुष्टुवानः
etena vai pṛthī vainya ubhayeṣāṃ paśūnām ādhipatyam āśnutobhayeṣāṃ paśūnām ādhipatyam aśnute pārthena tuṣṭuvānaḥ
- 21
अष्टेडः पदस्तोभो भवति
aṣṭeḍaḥ padastobho bhavati
- 22
इन्द्रो वृत्राय वज्रम् उदयच्छत्तं षोडशभिर्भोगैः पर्यभुजत्स एतं पदस्तोभम् अपश्यत्तेनापावेष्टयद् अपवेष्टयन्न् इव गायेत्पाप्मनो ऽपहत्यै
indro vṛtrāya vajram udayacchattaṃ ṣoḍaśabhirbhogaiḥ paryabhujatsa etaṃ padastobham apaśyattenāpāveṣṭayad apaveṣṭayann iva gāyetpāpmano 'pahatyai
- 23
पाप्मा वाव स तम् अगृह्णात्तं पदस्तोभेनापाहताप पाप्मानं हते पदस्तोभेन तुष्टुवानः
pāpmā vāva sa tam agṛhṇāttaṃ padastobhenāpāhatāpa pāpmānaṃ hate padastobhena tuṣṭuvānaḥ
- 24
पदोर् उत्तमम् अपश्यत्तत्पदस्तोभस्य पदस्तोभत्वम्
pador uttamam apaśyattatpadastobhasya padastobhatvam
- 25
द्वादशनिधनो भवति प्रतिष्ठायै
dvādaśanidhano bhavati pratiṣṭhāyai
- 26
दाशस्पत्यं भवति
dāśaspatyaṃ bhavati
- 27
यां वै गां प्रशंसन्ति दाशस्पत्येति तां प्रशंसन्त्य् अहर् एवैतेन प्रशंसन्ति
yāṃ vai gāṃ praśaṃsanti dāśaspatyeti tāṃ praśaṃsanty ahar evaitena praśaṃsanti
- 28
निधनान्ताः पवमाना भवन्त्य् अह्नो धृत्यै स्तोमः
nidhanāntāḥ pavamānā bhavanty ahno dhṛtyai stomaḥ

