11 shlokas
- 1
वैशंपायन उवाच
षट्त्रिंशे त्वथ सम्प्राप्ते वर्षे कौरवनन्दनः
ददर्श विपरीतानि निमित्तानि युधिष्ठिरः
vaiśaṃpāyana uvāca
ṣaṭtriṃśe tvatha samprāpte varṣe kauravanandanaḥ
dadarśa viparītāni nimittāni yudhiṣṭhiraḥ
- 2
ववुर्वाताः सनिर्घाता रूक्षाः शर्करवर्षिणः
अपसव्यानि शकुना मण्डलानि प्रचक्रिरे
vavurvātāḥ sanirghātā rūkṣāḥ śarkaravarṣiṇaḥ
apasavyāni śakunā maṇḍalāni pracakrire
- 3
प्रत्यगूहुर्महानद्यो दिशो नीहारसंवृताः
उल्काश्चाङ्गारवर्षिण्यः प्रपेतुर्गगनाद्भुवि
pratyagūhurmahānadyo diśo nīhārasaṃvṛtāḥ
ulkāścāṅgāravarṣiṇyaḥ prapeturgaganādbhuvi
- 4
आदित्यो रजसा राजन्समवच्छन्नमण्डलः
विरश्मिर् उदये नित्यं कबन्धैः समदृश्यत
ādityo rajasā rājansamavacchannamaṇḍalaḥ
viraśmir udaye nityaṃ kabandhaiḥ samadṛśyata
- 5
परिवेषाश्च दृश्यन्ते दारुणाः चन्द्रसूर्ययोः
त्रिवर्णाः श्यामरूक्षान्तास्तथा भस्मारुणप्रभाः
pariveṣāśca dṛśyante dāruṇāḥ candrasūryayoḥ
trivarṇāḥ śyāmarūkṣāntāstathā bhasmāruṇaprabhāḥ
- 6
एते चान्ये च बहव उत्पाता भयशंसिनः
दृश्यन्ते ऽहर् अहो राजन्हृदयोद्वेगकारकाः
ete cānye ca bahava utpātā bhayaśaṃsinaḥ
dṛśyante 'har aho rājanhṛdayodvegakārakāḥ
- 7
कस्यचित्त्वथ कालस्य कुरुराजो युधिष्ठिरः
शुश्राव वृष्णिचक्रस्य मौसले कदनं कृतम्
kasyacittvatha kālasya kururājo yudhiṣṭhiraḥ
śuśrāva vṛṣṇicakrasya mausale kadanaṃ kṛtam
- 8
विमुक्तं वासुदेवं च श्रुत्वा रामं च पाण्डवः
समानीयाब्रवीद्भ्रातॄन्किं करिष्याम इत्युत
vimuktaṃ vāsudevaṃ ca śrutvā rāmaṃ ca pāṇḍavaḥ
samānīyābravīdbhrātṝnkiṃ kariṣyāma ityuta
- 9
परस्परं समासाद्य ब्रह्मदण्डबलात्कृतान्
वृष्णीन्विनष्टांस्ते श्रुत्वा व्यथिताः पाण्डवाभवन्
parasparaṃ samāsādya brahmadaṇḍabalātkṛtān
vṛṣṇīnvinaṣṭāṃste śrutvā vyathitāḥ pāṇḍavābhavan
- 10
निधनं वासुदेवस्य समुद्रस्येव शोषणम्
वीरा न श्रद्दधुस्तस्य विनाशं शार्ङ्गधन्वनः
nidhanaṃ vāsudevasya samudrasyeva śoṣaṇam
vīrā na śraddadhustasya vināśaṃ śārṅgadhanvanaḥ
- 11
मौसलं ते परिश्रुत्य दुःखशोकसमन्विताः
विषण्णा हतसंकल्पाः पाण्डवाः समुपाविशन्
mausalaṃ te pariśrutya duḥkhaśokasamanvitāḥ
viṣaṇṇā hatasaṃkalpāḥ pāṇḍavāḥ samupāviśan

