30 shlokas
- 1
चुम्बननखदशनच्छेद्यानां न पौर्वापर्यम् अस्ति
रागयोगात्
प्राक्संयोगाद् एषां प्राधान्येन प्रयोगः
प्रहणनशीत्कृतयोश्च संप्रयोगे
cumbananakhadaśanacchedyānāṃ na paurvāparyam asti
rāgayogāt
prāksaṃyogād eṣāṃ prādhānyena prayogaḥ
prahaṇanaśītkṛtayośca saṃprayoge
- 2
सर्वं सर्वत्र
रागस्यानपेक्षितत्वात्
इति वात्स्यायनः
sarvaṃ sarvatra
rāgasyānapekṣitatvāt
iti vātsyāyanaḥ
- 3
तानि प्रथमरते नातिव्यक्तानि विश्रब्धिकायां विकल्पेन च प्रयुञ्जीत
तथाभूतत्वाद्रागस्य
ततः परम् अतित्वरया विशेषवत्समुच्चयेन रागसंधुक्षणार्थम्
tāni prathamarate nātivyaktāni viśrabdhikāyāṃ vikalpena ca prayuñjīta
tathābhūtatvādrāgasya
tataḥ param atitvarayā viśeṣavatsamuccayena rāgasaṃdhukṣaṇārtham
- 4
ललाटालककपोलनयनवक्षःस्तनौष्ठान्तर्मुखेषु चुम्बनम्
ऊरुसंधिबाहुनाभिमूलयोर्लाटानाम्
रागवशाद्देशप्रवृत्तेश्च सन्ति तानि तानि स्थानानि न तु सर्वजनप्रयोज्यानीति वात्स्यायनः
lalāṭālakakapolanayanavakṣaḥstanauṣṭhāntarmukheṣu cumbanam
ūrusaṃdhibāhunābhimūlayorlāṭānām
rāgavaśāddeśapravṛtteśca santi tāni tāni sthānāni na tu sarvajanaprayojyānīti vātsyāyanaḥ
- 5
तद्यथा
निमित्तकं स्फुरितकं घट्टितकम् इति त्रीणि कन्याचुम्बनानि
tadyathā
nimittakaṃ sphuritakaṃ ghaṭṭitakam iti trīṇi kanyācumbanāni
- 6
बलात्कारेण नियुक्ता मुखे मुखम् आधत्ते न तु विचेष्टत इति निमित्तकम्
balātkāreṇa niyuktā mukhe mukham ādhatte na tu viceṣṭata iti nimittakam
- 7
वदने प्रवेशितं चौष्ठं मनागपत्रपावग्रहीतुम् इच्छन्ती स्यन्दयति स्वम् ओष्ठं नोत्तरम् उत्सहत इति स्फुरितकम्
vadane praveśitaṃ cauṣṭhaṃ manāgapatrapāvagrahītum icchantī syandayati svam oṣṭhaṃ nottaram utsahata iti sphuritakam
- 8
ईषत्परिगृह्य विनिमीलितनयना करेण च तस्य नयने अवच्छादयन्ती जिह्वाग्रेण घट्टयति इति घट्टितकम्
īṣatparigṛhya vinimīlitanayanā kareṇa ca tasya nayane avacchādayantī jihvāgreṇa ghaṭṭayati iti ghaṭṭitakam
- 9
समं तिर्यग् उद्भ्रान्तम् अवपीडितकम् इति चतुर्विधम् अपरे
samaṃ tiryag udbhrāntam avapīḍitakam iti caturvidham apare
- 10
अङ्गुलिसंपुटेन पिण्डीकृत्य निर्दशनम् ओष्ठपुटेनावपीडयेद् इत्यवपीडितकं पञ्चमम् अपि करणम्
aṅgulisaṃpuṭena piṇḍīkṛtya nirdaśanam oṣṭhapuṭenāvapīḍayed ityavapīḍitakaṃ pañcamam api karaṇam
- 11
द्यूतं चात्र प्रवर्तयेत्
dyūtaṃ cātra pravartayet
- 12
पूर्वम् अधरसंपादनेन जितम् इदं स्यात्
pūrvam adharasaṃpādanena jitam idaṃ syāt
- 13
तत्र जिता सार्धरुदितं करं विधुनुयात्प्रणुदेद्दशेत्परिवर्तयेद्बलाद् आहृता विवदेत्पुनर् अप्यस्तु पण इति ब्रूयात्
तत्रापि जिता द्विगुणम् आयस्येत्
tatra jitā sārdharuditaṃ karaṃ vidhunuyātpraṇudeddaśetparivartayedbalād āhṛtā vivadetpunar apyastu paṇa iti brūyāt
tatrāpi jitā dviguṇam āyasyet
- 14
विश्रब्धस्य प्रमत्तस्य वाधरम् अवगृह्य दशनान्तर्गतम् अनिर्गमं कृत्वा हसेद् उत्क्रोशेत्तर्जयेद्वल्गेद् आह्वयेन्नृत्येत्प्रनर्तितभ्रुणा च विचलनयनेन मुखेन विहसन्ती तानि तानि च ब्रूयात्
इति चुम्बनद्यूतकलहः
viśrabdhasya pramattasya vādharam avagṛhya daśanāntargatam anirgamaṃ kṛtvā hased utkrośettarjayedvalged āhvayennṛtyetpranartitabhruṇā ca vicalanayanena mukhena vihasantī tāni tāni ca brūyāt
iti cumbanadyūtakalahaḥ
- 15
एतेन नखदशनच्छेद्यप्रहणनद्यूतकलहा व्याख्याताः
etena nakhadaśanacchedyaprahaṇanadyūtakalahā vyākhyātāḥ
- 16
चण्डवेगयोर् एव त्वेषां प्रयोगः
तत्सात्म्यात्
caṇḍavegayor eva tveṣāṃ prayogaḥ
tatsātmyāt
- 17
तस्यां चुम्बन्त्यामयम् अप्युत्तरं गृह्णीयात्
इत्युत्तरचुम्बितम्
tasyāṃ cumbantyāmayam apyuttaraṃ gṛhṇīyāt
ityuttaracumbitam
- 18
ओष्ठसंदंशेनावगृह्यौष्ठद्वयम् अपि चुम्बेत
इति संपुटकं स्त्रियाः पुंसो वा अजातव्यञ्जनस्य
oṣṭhasaṃdaṃśenāvagṛhyauṣṭhadvayam api cumbeta
iti saṃpuṭakaṃ striyāḥ puṃso vā ajātavyañjanasya
- 19
तस्मिन्न् इतरो ऽपि जिह्वयास्या दशनान्घट्टयेत्तालु जिह्वां चेति जिह्वायुद्धम्
tasminn itaro 'pi jihvayāsyā daśanānghaṭṭayettālu jihvāṃ ceti jihvāyuddham
- 20
एतेन बलाद्वदनरदनग्रहणं दानं च व्याख्यातम्
etena balādvadanaradanagrahaṇaṃ dānaṃ ca vyākhyātam
- 21
समं पीडितम् अञ्चितं मृदु शेषाङ्गेषु चुम्बनं स्थानविशेषयोगात्
इति चुम्बनविशेषाः
samaṃ pīḍitam añcitaṃ mṛdu śeṣāṅgeṣu cumbanaṃ sthānaviśeṣayogāt
iti cumbanaviśeṣāḥ
- 22
सुप्तस्य मुखम् अवलोकयन्त्याः स्वाभिप्रायेण चुम्बनं रागदीपनम्
suptasya mukham avalokayantyāḥ svābhiprāyeṇa cumbanaṃ rāgadīpanam
- 23
प्रमत्तस्य विवदमानस्य वा अन्यतो ऽभिमुखस्य सुप्ताभिमुखस्य वा निद्राव्याघातार्थं चलितकम्
pramattasya vivadamānasya vā anyato 'bhimukhasya suptābhimukhasya vā nidrāvyāghātārthaṃ calitakam
- 24
चिररात्राव् आगतस्य शयनसुप्तायाः स्वाभिप्रायचुम्बनं प्रातिबोधिकम्
cirarātrāv āgatasya śayanasuptāyāḥ svābhiprāyacumbanaṃ prātibodhikam
- 25
सापि तु भावजिज्ञासार्थिनी नायकस्यागमनकालं संलक्ष्य व्याजेन सुप्ता स्यात्
sāpi tu bhāvajijñāsārthinī nāyakasyāgamanakālaṃ saṃlakṣya vyājena suptā syāt
- 26
आदर्शे कुड्ये सलिले वा प्रयोज्यायाश्छायाचुम्बनम् आकारप्रदर्शनार्थम् एव कार्यम्
ādarśe kuḍye salile vā prayojyāyāśchāyācumbanam ākārapradarśanārtham eva kāryam
- 27
बालस्य चित्रकर्मणः प्रतिमायाश्च चुम्बनं संक्रान्तकम् आलिङ्गनं च
bālasya citrakarmaṇaḥ pratimāyāśca cumbanaṃ saṃkrāntakam āliṅganaṃ ca
- 28
तथा निशि प्रेक्षणके स्वजनसमाजे वा समीपे गतस्य प्रयोज्याया हस्ताङ्गुलिचुम्बनं संविष्टस्य वा पादाङ्गुलिचुम्बनम्
tathā niśi prekṣaṇake svajanasamāje vā samīpe gatasya prayojyāyā hastāṅgulicumbanaṃ saṃviṣṭasya vā pādāṅgulicumbanam
- 29
संवाहिकायास्तु नायकम् आकारयन्त्या निद्रावशाद् अकामाया इव तस्योर्वोर्वदनस्य निधानम् ऊरुचुम्बनं पादाङ्गुष्ठचुम्बनं चेत्याभियोगिकानि
saṃvāhikāyāstu nāyakam ākārayantyā nidrāvaśād akāmāyā iva tasyorvorvadanasya nidhānam ūrucumbanaṃ pādāṅguṣṭhacumbanaṃ cetyābhiyogikāni
- 30
भवति चात्र श्लोकः
कृते प्रतिकृतं कुर्यात्ताडिते प्रतिताडितम्
करणेन च तेनैव चुम्बिते प्रतिचुम्बितम्
bhavati cātra ślokaḥ
kṛte pratikṛtaṃ kuryāttāḍite pratitāḍitam
karaṇena ca tenaiva cumbite praticumbitam

