11 shlokas
- 1
विराजं च स्वराजं चाभिष्टीर्या च नो गृहे
लक्ष्मी राष्ट्रस्य या मुखे तया मा संसृजामसीति कुण्डले प्रतिहरते दक्षिणे कर्णे दक्षिणं सव्ये सव्यम्
virājaṃ ca svarājaṃ cābhiṣṭīryā ca no gṛhe
lakṣmī rāṣṭrasya yā mukhe tayā mā saṃsṛjāmasīti kuṇḍale pratiharate dakṣiṇe karṇe dakṣiṇaṃ savye savyam
- 2
ऋतुभिष्ट्वार्तवैर् आयुषे वर्चसे
संवत्सरस्य धायसा तेन सन्ननुगृह्णासीति कुण्डले संगृह्णीते
ṛtubhiṣṭvārtavair āyuṣe varcase
saṃvatsarasya dhāyasā tena sannanugṛhṇāsīti kuṇḍale saṃgṛhṇīte
- 3
इयमोषधे त्रायमाणा सहमाना सहस्वती
सा मा हिरण्यवर्चसं करोतु पूरुषु प्रियं ब्रह्मवर्चसिनं मा करोत्व् अपाशो ऽसीति ग्रीवायां मणिं प्रतिमुञ्चते
iyamoṣadhe trāyamāṇā sahamānā sahasvatī
sā mā hiraṇyavarcasaṃ karotu pūruṣu priyaṃ brahmavarcasinaṃ mā karotv apāśo 'sīti grīvāyāṃ maṇiṃ pratimuñcate
- 4
शुभिके शुभमारोह शोभयन्ती मुखं मम
मुखं च मम शोभय भूयांसं च भगं कुरु
यामाहरज्जमदग्निः श्रद्धायै कामायास्यै
इमां तां प्रतिमुञ्चे ऽहं भगेन सह वर्चसा
इति द्वाभ्यां स्रजं प्रतिमुञ्चते
śubhike śubhamāroha śobhayantī mukhaṃ mama
mukhaṃ ca mama śobhaya bhūyāṃsaṃ ca bhagaṃ kuru
yāmāharajjamadagniḥ śraddhāyai kāmāyāsyai
imāṃ tāṃ pratimuñce 'haṃ bhagena saha varcasā
iti dvābhyāṃ srajaṃ pratimuñcate
- 5
यदाञ्जनं त्रैककुदं जातं हिमवत उपरि
तेन वाम् आञ्जे ऽहं भगेन सह वर्चसा
मयि पर्वतपूरुषम्
इति त्रैककुदेनाञ्जनेनाङ्क्ते तस्मिन्न् अविद्यमाने येनैव केनचित्
yadāñjanaṃ traikakudaṃ jātaṃ himavata upari
tena vām āñje 'haṃ bhagena saha varcasā
mayi parvatapūruṣam
iti traikakudenāñjanenāṅkte tasminn avidyamāne yenaiva kenacit
- 6
यन्मे मनः परागतम्
इत्यादर्शे ऽवेक्षते
yanme manaḥ parāgatam
ityādarśe 'vekṣate
- 7
देवस्य त्वा
इति वैणवं दण्डं प्रतिगृह्य
इन्द्रस्य वज्रो ऽस्य् अश्विनौ मा पातम्
इति त्रिरूर्ध्वमुन्मार्ष्टि
devasya tvā
iti vaiṇavaṃ daṇḍaṃ pratigṛhya
indrasya vajro 'sy aśvinau mā pātam
iti trirūrdhvamunmārṣṭi
- 8
वेग वेजयास्मद्द्विषतस्तस्करान्सरीसृपाञ्छ्वापदान्रक्षांसि पिशाचान्पौरुषेयाद्भयान्नो दण्ड रक्ष विश्वस्माद्भयाद्रक्ष सर्वतो जहि तस्करान्
अनग्नः सर्ववृक्षेषु जायसे त्वं सपत्नहा
जहि शत्रुगणान्सर्वान्समन्तं मघवानिव
इति त्रिः प्रदक्षिणमुपर्युपरि शिरः प्रतिहरते
vega vejayāsmaddviṣatastaskarānsarīsṛpāñchvāpadānrakṣāṃsi piśācānpauruṣeyādbhayānno daṇḍa rakṣa viśvasmādbhayādrakṣa sarvato jahi taskarān
anagnaḥ sarvavṛkṣeṣu jāyase tvaṃ sapatnahā
jahi śatrugaṇānsarvānsamantaṃ maghavāniva
iti triḥ pradakṣiṇamuparyupari śiraḥ pratiharate
- 9
प्रतिष्ठे स्थो देवते मा मा संताप्तम्
इत्युपानहाव् अध्यवरोहति
pratiṣṭhe stho devate mā mā saṃtāptam
ityupānahāv adhyavarohati
- 10
प्रजापतेः शरणमसि ब्रह्मणश्छदिः
इति छत्त्रं प्रतिगृह्णाति
prajāpateḥ śaraṇamasi brahmaṇaśchadiḥ
iti chattraṃ pratigṛhṇāti
- 11
यो मे दण्डः परापतद्विहायसो ऽधि भूम्याम्
इमं तं पुनराददेयमायुषे च बलाय च
इति दण्डं पुनरादत्ते यद्यस्य हस्तात्पतति
yo me daṇḍaḥ parāpatadvihāyaso 'dhi bhūmyām
imaṃ taṃ punarādadeyamāyuṣe ca balāya ca
iti daṇḍaṃ punarādatte yadyasya hastātpatati

