29 shlokas
- 1
मुषितसंनिधौ बाह्यानाम् अभ्यन्तराणां च साक्षिणाम् अभिशस्तस्य देशजातिगोत्रनामकर्मसारसहायनिवासान् अनुयुञ्जीत
muṣitasaṃnidhau bāhyānām abhyantarāṇāṃ ca sākṣiṇām abhiśastasya deśajātigotranāmakarmasārasahāyanivāsān anuyuñjīta
- 2
तांश्चापदेशैः प्रतिसमानयेत्
tāṃścāpadeśaiḥ pratisamānayet
- 3
ततः पूर्वस्याह्नः प्रचारं रात्रौ निवासं च ग्रहणाद् इत्यनुयुञ्जीत
tataḥ pūrvasyāhnaḥ pracāraṃ rātrau nivāsaṃ ca grahaṇād ityanuyuñjīta
- 4
तस्यापसारप्रतिसंधाने शुद्धः स्यात् अन्यथा कर्मप्राप्तः
tasyāpasārapratisaṃdhāne śuddhaḥ syāt anyathā karmaprāptaḥ
- 5
त्रिरात्राद् ऊर्ध्वम् अग्राह्यः शङ्कितकः पृच्छाभावाद् अन्यत्रोपकरणदर्शनात्
trirātrād ūrdhvam agrāhyaḥ śaṅkitakaḥ pṛcchābhāvād anyatropakaraṇadarśanāt
- 6
अचोरं चोर इत्यभिव्याहरतश्चोरसमो दण्डश्चोरं प्रच्छादयतश्च
acoraṃ cora ityabhivyāharataścorasamo daṇḍaścoraṃ pracchādayataśca
- 7
चोरेणाभिशस्तो वैरद्वेषाभ्याम् अपदिष्टकः शुद्धः स्यात्
coreṇābhiśasto vairadveṣābhyām apadiṣṭakaḥ śuddhaḥ syāt
- 8
शुद्धं परिवासयतः पूर्वः साहसदण्डः
śuddhaṃ parivāsayataḥ pūrvaḥ sāhasadaṇḍaḥ
- 9
शङ्कानिष्पन्नम् उपकरणमन्त्रिसहायरूपवैयावृत्यकरान्निष्पादयेत्
śaṅkāniṣpannam upakaraṇamantrisahāyarūpavaiyāvṛtyakarānniṣpādayet
- 10
कर्मणश्च प्रदेशद्रव्यादानांशविभागैः प्रतिसमानयेत्
karmaṇaśca pradeśadravyādānāṃśavibhāgaiḥ pratisamānayet
- 11
एतेषां कारणानाम् अनभिसंधाने विप्रलपन्तम् अचोरं विद्यात्
eteṣāṃ kāraṇānām anabhisaṃdhāne vipralapantam acoraṃ vidyāt
- 12
दृश्यते ह्यचोरो ऽपि चोरमार्गे यदृच्छया संनिपाते चोरवेषशस्त्रभाण्डसामान्येन गृह्यमाणश्चोरभाण्डस्योपवासेन वा यथाणिमाण्डव्यः कर्मक्लेशभयाद् अचोरः चोरो ऽस्मि इति ब्रुवाणः
dṛśyate hyacoro 'pi coramārge yadṛcchayā saṃnipāte coraveṣaśastrabhāṇḍasāmānyena gṛhyamāṇaścorabhāṇḍasyopavāsena vā yathāṇimāṇḍavyaḥ karmakleśabhayād acoraḥ coro 'smi iti bruvāṇaḥ
- 13
तस्मात्समाप्तकरणं नियमयेत्
tasmātsamāptakaraṇaṃ niyamayet
- 14
मन्दापराधं बालं वृद्धं व्याधितं मत्तम् उन्मत्तं क्षुत्पिपासाध्वक्लान्तम् अत्याशितम् आमकाशितं दुर्बलं वा न कर्म कारयेत्
mandāparādhaṃ bālaṃ vṛddhaṃ vyādhitaṃ mattam unmattaṃ kṣutpipāsādhvaklāntam atyāśitam āmakāśitaṃ durbalaṃ vā na karma kārayet
- 15
तुल्यशीलपुंश्चलीप्रापाविककथावकाशभोजनदातृभिर् अपसर्पयेत्
tulyaśīlapuṃścalīprāpāvikakathāvakāśabhojanadātṛbhir apasarpayet
- 16
एवम् अतिसंदध्याद्यथा वा निक्षेपापहारे व्याख्यातम्
evam atisaṃdadhyādyathā vā nikṣepāpahāre vyākhyātam
- 17
आप्तदोषं कर्म कारयेन्न त्वेव स्त्रियं गर्भिणीं सूतिकां वा मासावरप्रजाताम्
āptadoṣaṃ karma kārayenna tveva striyaṃ garbhiṇīṃ sūtikāṃ vā māsāvaraprajātām
- 18
स्त्रियास्त्वर्धकर्म वाक्यानुयोगो वा
striyāstvardhakarma vākyānuyogo vā
- 19
ब्राह्मणस्य सत्त्रिपरिग्रहः श्रुतवतस्तपस्विनश्च
brāhmaṇasya sattriparigrahaḥ śrutavatastapasvinaśca
- 20
तस्यातिक्रम उत्तमो दण्डः कर्तुः कारयितुश्च कर्मणा व्यापादनेन च
tasyātikrama uttamo daṇḍaḥ kartuḥ kārayituśca karmaṇā vyāpādanena ca
- 21
व्यावहारिकं कर्मचतुष्कं षड्दण्डाः सप्त कशाः द्वाव् उपरिनिबन्धौ उदकनालिका च
vyāvahārikaṃ karmacatuṣkaṃ ṣaḍdaṇḍāḥ sapta kaśāḥ dvāv uparinibandhau udakanālikā ca
- 22
परं पापकर्मणां नव वेत्रलताः द्वादश कशाः द्वाव् ऊरुवेष्टौ विंशतिर्नक्तमाललताः द्वात्रिंशत्तलाः द्वौ वृश्चिकबन्धौ उल्लम्बने च द्वे सूची हस्तस्य यवागूपीतस्य एकपर्वदहनम् अङ्गुल्याः स्नेहपीतस्य प्रतापनम् एकम् अहः शिशिररात्रौ बल्बजाग्रशय्या च
paraṃ pāpakarmaṇāṃ nava vetralatāḥ dvādaśa kaśāḥ dvāv ūruveṣṭau viṃśatirnaktamālalatāḥ dvātriṃśattalāḥ dvau vṛścikabandhau ullambane ca dve sūcī hastasya yavāgūpītasya ekaparvadahanam aṅgulyāḥ snehapītasya pratāpanam ekam ahaḥ śiśirarātrau balbajāgraśayyā ca
- 23
इत्यष्टादशकं कर्म
ityaṣṭādaśakaṃ karma
- 24
तस्योपकरणं प्रमाणं प्रहरणं प्रधारणम् अवधारणं च खरपट्टाद् आगमयेत्
tasyopakaraṇaṃ pramāṇaṃ praharaṇaṃ pradhāraṇam avadhāraṇaṃ ca kharapaṭṭād āgamayet
- 25
दिवसान्तरम् एकैकं च कर्म कारयेत्
divasāntaram ekaikaṃ ca karma kārayet
- 26
पूर्वकृतापदानं प्रतिज्ञायापहरन्तम् एकदेशदृष्टद्रव्यं कर्मणा रूपेण वा गृहीतं राजकोशम् अवस्तृणन्तं कर्मवध्यं वा राजवचनात्समस्तं व्यस्तम् अभ्यस्तं वा कर्म कारयेत्
pūrvakṛtāpadānaṃ pratijñāyāpaharantam ekadeśadṛṣṭadravyaṃ karmaṇā rūpeṇa vā gṛhītaṃ rājakośam avastṛṇantaṃ karmavadhyaṃ vā rājavacanātsamastaṃ vyastam abhyastaṃ vā karma kārayet
- 27
सर्वापराधेष्वपीडनीयो ब्राह्मणः
sarvāparādheṣvapīḍanīyo brāhmaṇaḥ
- 28
तस्याभिशस्ताङ्को ललाटे स्याद्व्यवहारपतनाय स्तेये श्वा मनुष्यवधे कबन्धो गुरुतल्पे भगं सुरापाने मद्यध्वजः
tasyābhiśastāṅko lalāṭe syādvyavahārapatanāya steye śvā manuṣyavadhe kabandho gurutalpe bhagaṃ surāpāne madyadhvajaḥ
- 29
ब्राह्मणं पापकर्माणम् उद्घुष्याङ्ककृतव्रणम्
कुर्यान्निर्विषयं राजा वासयेद् आकरेषु वा
brāhmaṇaṃ pāpakarmāṇam udghuṣyāṅkakṛtavraṇam
kuryānnirviṣayaṃ rājā vāsayed ākareṣu vā

