43 shlokas
- 1
ब्राह्मणम् अपेयम् अभक्ष्यं वा ग्रासयत उत्तमो दण्डः क्षत्रियं मध्यमः वैश्यं पूर्वः साहसदण्डः शूद्रं चतुष्पञ्चाशत्पणो दण्डः
brāhmaṇam apeyam abhakṣyaṃ vā grāsayata uttamo daṇḍaḥ kṣatriyaṃ madhyamaḥ vaiśyaṃ pūrvaḥ sāhasadaṇḍaḥ śūdraṃ catuṣpañcāśatpaṇo daṇḍaḥ
- 2
स्वयं ग्रसितारो निर्विषयाः कार्याः
svayaṃ grasitāro nirviṣayāḥ kāryāḥ
- 3
परगृहाभिगमने दिवा पूर्वः साहसदण्डो रात्रौ मध्यमः
paragṛhābhigamane divā pūrvaḥ sāhasadaṇḍo rātrau madhyamaḥ
- 4
दिवा रात्रौ वा सशस्त्रस्य प्रविशत उत्तमो दण्डः
divā rātrau vā saśastrasya praviśata uttamo daṇḍaḥ
- 5
भिक्षुकवैदेहकौ मत्तोन्मत्तौ बलाद् आपदि चातिसंनिकृष्टाः प्रवृत्तप्रवेशाश्चादण्ड्याः अन्यत्र प्रतिषेधात्
bhikṣukavaidehakau mattonmattau balād āpadi cātisaṃnikṛṣṭāḥ pravṛttapraveśāścādaṇḍyāḥ anyatra pratiṣedhāt
- 6
स्ववेश्मनो विरात्राद् ऊर्ध्वं परिवारम् आरोहतः पूर्वः साहसदण्डः परवेश्मनो मध्यमः ग्रामारामवाटभेदिनश्च
svaveśmano virātrād ūrdhvaṃ parivāram ārohataḥ pūrvaḥ sāhasadaṇḍaḥ paraveśmano madhyamaḥ grāmārāmavāṭabhedinaśca
- 7
ग्रामेष्वन्तः सार्थिका ज्ञातसारा वसेयुः
grāmeṣvantaḥ sārthikā jñātasārā vaseyuḥ
- 8
मुषितं प्रवासितं चैषाम् अनिर्गतं रात्रौ ग्रामस्वामी दद्यात्
muṣitaṃ pravāsitaṃ caiṣām anirgataṃ rātrau grāmasvāmī dadyāt
- 9
ग्रामान्तरेषु वा मुषितं प्रवासितं विवीताध्यक्षो दद्यात्
grāmāntareṣu vā muṣitaṃ pravāsitaṃ vivītādhyakṣo dadyāt
- 10
अविवीतानां चोररज्जुकः
avivītānāṃ corarajjukaḥ
- 11
तथाप्यगुप्तानां सीमावरोधेन विचयं दद्युः
tathāpyaguptānāṃ sīmāvarodhena vicayaṃ dadyuḥ
- 12
असीमावरोधे पञ्चग्रामी दशग्रामी वा
asīmāvarodhe pañcagrāmī daśagrāmī vā
- 13
दुर्बलं वेश्म शकटम् अनुत्तब्धमूर्धस्तंभं शस्त्रम् अनपाश्रयम् अप्रतिच्छन्नं श्वभ्रं कूपं कूटावपातं वा कृत्वा हिंसायां दण्डपारुष्यं विद्यात्
durbalaṃ veśma śakaṭam anuttabdhamūrdhastaṃbhaṃ śastram anapāśrayam apraticchannaṃ śvabhraṃ kūpaṃ kūṭāvapātaṃ vā kṛtvā hiṃsāyāṃ daṇḍapāruṣyaṃ vidyāt
- 14
वृक्षच्छेदने दम्यरश्मिहरणे चतुष्पदानाम् अदान्तसेवने वाहने वा काष्ठलोष्टपाषाणदण्डबाणबाहुविक्षेपणेषु याने हस्तिना च संघट्टने अपेहि इति प्रक्रोशन्न् अदण्ड्यः
vṛkṣacchedane damyaraśmiharaṇe catuṣpadānām adāntasevane vāhane vā kāṣṭhaloṣṭapāṣāṇadaṇḍabāṇabāhuvikṣepaṇeṣu yāne hastinā ca saṃghaṭṭane apehi iti prakrośann adaṇḍyaḥ
- 15
हस्तिना रोषितेन हतो द्रोणान्नं मद्यकुंभं माल्यानुलेपनं दन्तप्रमार्जनं च पटं दद्यात्
hastinā roṣitena hato droṇānnaṃ madyakuṃbhaṃ mālyānulepanaṃ dantapramārjanaṃ ca paṭaṃ dadyāt
- 16
अश्वमेधावभृथस्नानेन तुल्यो हस्तिना वध इति पादप्रक्षालनम्
aśvamedhāvabhṛthasnānena tulyo hastinā vadha iti pādaprakṣālanam
- 17
उदासीनवधे यातुर् उत्तमो दण्डः
udāsīnavadhe yātur uttamo daṇḍaḥ
- 18
शृङ्गिणा दंष्ट्रिणा वा हिंस्यमानम् अमोक्षयतः स्वामिनः पूर्वः साहसदण्डः प्रतिक्रुष्टस्य द्विगुणः
śṛṅgiṇā daṃṣṭriṇā vā hiṃsyamānam amokṣayataḥ svāminaḥ pūrvaḥ sāhasadaṇḍaḥ pratikruṣṭasya dviguṇaḥ
- 19
शृङ्गिदंष्ट्रिभ्याम् अन्योन्यं घातयतस्तच्च तावच्च दण्डः
śṛṅgidaṃṣṭribhyām anyonyaṃ ghātayatastacca tāvacca daṇḍaḥ
- 20
देवपशुम् ऋषभम् उक्षाणं गोकुमारीं वा वाहयतः पञ्चशतो दण्डः प्रवासयत उत्तमः
devapaśum ṛṣabham ukṣāṇaṃ gokumārīṃ vā vāhayataḥ pañcaśato daṇḍaḥ pravāsayata uttamaḥ
- 21
लोमदोहवाहनप्रजननोपकारिणां क्षुद्रपशूनाम् आदाने तच्च तावच्च दण्डः प्रवासने च अन्यत्र देवपितृकार्येभ्यः
lomadohavāhanaprajananopakāriṇāṃ kṣudrapaśūnām ādāne tacca tāvacca daṇḍaḥ pravāsane ca anyatra devapitṛkāryebhyaḥ
- 22
छिन्ननस्यं भग्नयुगं तिर्यक्प्रतिमुखागतं प्रत्यासरद्वा चक्रयुक्तं याता पशुमनुष्यसंबाधे वा हिंसायाम् अदण्ड्यः
chinnanasyaṃ bhagnayugaṃ tiryakpratimukhāgataṃ pratyāsaradvā cakrayuktaṃ yātā paśumanuṣyasaṃbādhe vā hiṃsāyām adaṇḍyaḥ
- 23
अन्यथा यथोक्तं मानुषप्राणिहिंसायां दण्डम् अभ्यावहेत्
anyathā yathoktaṃ mānuṣaprāṇihiṃsāyāṃ daṇḍam abhyāvahet
- 24
अमानुषप्राणिवधे प्राणिदानं च
amānuṣaprāṇivadhe prāṇidānaṃ ca
- 25
बाले यातरि यानस्थः स्वामी दण्ड्यो ऽस्वामिनि यानस्थः प्राप्तव्यवहारो वा याता
bāle yātari yānasthaḥ svāmī daṇḍyo 'svāmini yānasthaḥ prāptavyavahāro vā yātā
- 26
बालाधिष्ठितम् अपुरुषं वा यानं राजा हरेत्
bālādhiṣṭhitam apuruṣaṃ vā yānaṃ rājā haret
- 27
कृत्याभिचाराभ्यां यत्परम् आपादयेत्तदापादयितव्यः
kṛtyābhicārābhyāṃ yatparam āpādayettadāpādayitavyaḥ
- 28
कामं भार्यायाम् अनिच्छन्त्यां कन्यायां वा दारार्थिनो भर्तरि भार्याया वा संवदनकरणम्
kāmaṃ bhāryāyām anicchantyāṃ kanyāyāṃ vā dārārthino bhartari bhāryāyā vā saṃvadanakaraṇam
- 29
अन्यथाहिंसायां मध्यमः साहसदण्डः
anyathāhiṃsāyāṃ madhyamaḥ sāhasadaṇḍaḥ
- 30
मातापित्रोर्भगिनीं मातुलानीम् आचार्याणीं स्नुषां दुहितरं भगिनीं वाधिचरतस्त्रिलिङ्गच्छेदनं वधश्च
mātāpitrorbhaginīṃ mātulānīm ācāryāṇīṃ snuṣāṃ duhitaraṃ bhaginīṃ vādhicaratastriliṅgacchedanaṃ vadhaśca

