18 shlokas
- 1
सत्त्रिप्रयोगाद् ऊर्ध्वं सिद्धव्यञ्जना माणवान्माणवविद्याभिः प्रलोभयेयुः प्रस्वापनान्तर्धानद्वारापोहमन्त्रेण प्रतिरोधकान्संवदनमन्त्रेण पारतल्पिकान्
sattriprayogād ūrdhvaṃ siddhavyañjanā māṇavānmāṇavavidyābhiḥ pralobhayeyuḥ prasvāpanāntardhānadvārāpohamantreṇa pratirodhakānsaṃvadanamantreṇa pāratalpikān
- 2
तेषां कृतोत्साहानां महान्तं संघम् आदाय रात्रावन्यं ग्रामम् उद्दिश्यान्यं ग्रामं कृतकस्त्रीपुरुषं गत्वा ब्रूयुः इहैव विद्याप्रभावो दृश्यतां कृच्छ्रः परग्रामो गन्तुम् इति
teṣāṃ kṛtotsāhānāṃ mahāntaṃ saṃgham ādāya rātrāvanyaṃ grāmam uddiśyānyaṃ grāmaṃ kṛtakastrīpuruṣaṃ gatvā brūyuḥ ihaiva vidyāprabhāvo dṛśyatāṃ kṛcchraḥ paragrāmo gantum iti
- 3
ततो द्वारापोहमन्त्रेण द्वाराण्यपोह्य प्रविश्यताम् इति ब्रूयुः
tato dvārāpohamantreṇa dvārāṇyapohya praviśyatām iti brūyuḥ
- 4
अन्तर्धानमन्त्रेण जाग्रताम् आरक्षिणां मध्येन माणवान् अतिक्रामयेयुः
antardhānamantreṇa jāgratām ārakṣiṇāṃ madhyena māṇavān atikrāmayeyuḥ
- 5
प्रस्वापनमन्त्रेण प्रस्वापयित्वा रक्षिणः शयाभिर्माणवैः संचारयेयुः
prasvāpanamantreṇa prasvāpayitvā rakṣiṇaḥ śayābhirmāṇavaiḥ saṃcārayeyuḥ
- 6
संवदनमन्त्रेण भार्याव्यञ्जनाः परेषां माणवैः संमोदयेयुः
saṃvadanamantreṇa bhāryāvyañjanāḥ pareṣāṃ māṇavaiḥ saṃmodayeyuḥ
- 7
उपलब्धविद्याप्रभावाणां पुरश्चरणाद्यादिशेयुर् अभिज्ञानार्थम्
upalabdhavidyāprabhāvāṇāṃ puraścaraṇādyādiśeyur abhijñānārtham
- 8
कृतलक्षणद्रव्येषु वा वेश्मसु कर्म कारयेयुः
kṛtalakṣaṇadravyeṣu vā veśmasu karma kārayeyuḥ
- 9
अनुप्रविष्टा वैकत्र ग्राहयेयुः
anupraviṣṭā vaikatra grāhayeyuḥ
- 10
कृतलक्षणद्रव्यक्रयविक्रयाधानेषु योगसुरामत्तान्वा ग्राहयेयुः
kṛtalakṣaṇadravyakrayavikrayādhāneṣu yogasurāmattānvā grāhayeyuḥ
- 11
गृहीतान्पूर्वापदानसहायान् अनुयुञ्जीत
gṛhītānpūrvāpadānasahāyān anuyuñjīta
- 12
पुराणचोरव्यञ्जना वा चोरान् अनुप्रविष्टास्तथैव कर्म कारयेयुर्ग्राहयेयुश्च
purāṇacoravyañjanā vā corān anupraviṣṭāstathaiva karma kārayeyurgrāhayeyuśca
- 13
गृहीतान्समाहर्ता पौरजानपदानां दर्शयेत्चोरग्रहणीं विद्याम् अधीते राजा तस्योपदेशाद् इमे चोरा गृहीताः भूयश्च ग्रहीष्यामि वारयितव्यो वः स्वजनः पापाचार इति
gṛhītānsamāhartā paurajānapadānāṃ darśayetcoragrahaṇīṃ vidyām adhīte rājā tasyopadeśād ime corā gṛhītāḥ bhūyaśca grahīṣyāmi vārayitavyo vaḥ svajanaḥ pāpācāra iti
- 14
यं चात्रापसर्पोपदेशेन शम्याप्रतोदादीनाम् अपहर्तारं जानीयात्तम् एषां प्रत्यादिशेद् एष राज्ञः प्रभावः इति
yaṃ cātrāpasarpopadeśena śamyāpratodādīnām apahartāraṃ jānīyāttam eṣāṃ pratyādiśed eṣa rājñaḥ prabhāvaḥ iti
- 15
पुराणचोरगोपालकव्याधश्वगणिनश्च वनचोराटविकान् अनुप्रविष्टाः प्रभूतकूटहिरण्यकुप्यभाण्डेषु सार्थव्रजग्रामेष्वेनान् अभियोजयेयुः
purāṇacoragopālakavyādhaśvagaṇinaśca vanacorāṭavikān anupraviṣṭāḥ prabhūtakūṭahiraṇyakupyabhāṇḍeṣu sārthavrajagrāmeṣvenān abhiyojayeyuḥ
- 16
अभियोगे गूढबलैर्घातयेयुः मदनरसयुक्तेन वा पथ्यदनेन
abhiyoge gūḍhabalairghātayeyuḥ madanarasayuktena vā pathyadanena
- 17
गृहीतलोप्त्रभारान् आयतगतपरिश्रान्तान्प्रस्वपतः प्रहवणेषु योगसुरामत्तान्वा ग्राहयेयुः
gṛhītaloptrabhārān āyatagatapariśrāntānprasvapataḥ prahavaṇeṣu yogasurāmattānvā grāhayeyuḥ
- 18
पूर्ववच्च गृहीत्वैनान्समाहर्ता प्ररूपयेत्
सर्वज्ञख्यापनं राज्ञः कारयन्राष्ट्रवासिषु
pūrvavacca gṛhītvainānsamāhartā prarūpayet
sarvajñakhyāpanaṃ rājñaḥ kārayanrāṣṭravāsiṣu

