65 shlokas
- 1
प्रदेष्टारस्त्रयस्त्रयो ऽमात्याः कण्टकशोधनं कुर्युः
pradeṣṭārastrayastrayo 'mātyāḥ kaṇṭakaśodhanaṃ kuryuḥ
- 2
अर्थ्यप्रतीकाराः कारुशासितारः संनिक्षेप्तारः स्ववित्तकारवः श्रेणीप्रमाणा निक्षेपं गृह्णीयुः
arthyapratīkārāḥ kāruśāsitāraḥ saṃnikṣeptāraḥ svavittakāravaḥ śreṇīpramāṇā nikṣepaṃ gṛhṇīyuḥ
- 3
विपत्तौ श्रेणी निक्षेपं भजेत
vipattau śreṇī nikṣepaṃ bhajeta
- 4
निर्दिष्टदेशकालकार्यं च कर्म कुर्युः अनिर्दिष्टदेशकालं कार्यापदेशम्
nirdiṣṭadeśakālakāryaṃ ca karma kuryuḥ anirdiṣṭadeśakālaṃ kāryāpadeśam
- 5
कालातिपातने पादहीनं वेतनं तद्द्विगुणश्च दण्डः
kālātipātane pādahīnaṃ vetanaṃ taddviguṇaśca daṇḍaḥ
- 6
अन्यत्र भ्रेषोपनिपाताभ्यां नष्टं विनष्टं वाभ्यावहेयुः
anyatra bhreṣopanipātābhyāṃ naṣṭaṃ vinaṣṭaṃ vābhyāvaheyuḥ
- 7
कार्यस्यान्यथाकरणे वेतननाशस्तद्द्विगुणश्च दण्डः
kāryasyānyathākaraṇe vetananāśastaddviguṇaśca daṇḍaḥ
- 8
तन्तुवाया दशैकादशिकं सूत्रं वर्धयेयुः
tantuvāyā daśaikādaśikaṃ sūtraṃ vardhayeyuḥ
- 9
वृद्धिच्छेदे छेदद्विगुणो दण्डः
vṛddhicchede chedadviguṇo daṇḍaḥ
- 10
सूत्रमूल्यं वानवेतनं क्षौमकौशेयानाम् अध्यर्धगुणं पत्त्रोर्णाकम्बलदुकूलानां द्विगुणम्
sūtramūlyaṃ vānavetanaṃ kṣaumakauśeyānām adhyardhaguṇaṃ pattrorṇākambaladukūlānāṃ dviguṇam
- 11
मानहीने हीनावहीनं वेतनं तद्द्विगुणश्च दण्डस्तुलाहीने हीनचतुर्गुणो दण्डः सूत्रपरिवर्तने मूल्यद्विगुणः
mānahīne hīnāvahīnaṃ vetanaṃ taddviguṇaśca daṇḍastulāhīne hīnacaturguṇo daṇḍaḥ sūtraparivartane mūlyadviguṇaḥ
- 12
तेन द्विपटवानं व्याख्यातम्
tena dvipaṭavānaṃ vyākhyātam
- 13
ऊर्णातुलायाः पञ्चपलिको विहननच्छेदो रोमच्छेदश्च
ūrṇātulāyāḥ pañcapaliko vihananacchedo romacchedaśca
- 14
रजकाः काष्ठफलकश्लक्ष्णशिलासु वस्त्राणि नेनिज्युः
rajakāḥ kāṣṭhaphalakaślakṣṇaśilāsu vastrāṇi nenijyuḥ
- 15
अन्यत्र नेनिजतो वस्त्रोपघातं षट्पणं च दण्डं दद्युः
anyatra nenijato vastropaghātaṃ ṣaṭpaṇaṃ ca daṇḍaṃ dadyuḥ
- 16
मुद्गराङ्काद् अन्यद्वासः परिदधानास्त्रिपणं दण्डं दद्युः
mudgarāṅkād anyadvāsaḥ paridadhānāstripaṇaṃ daṇḍaṃ dadyuḥ
- 17
परवस्त्रविक्रयावक्रयाधानेषु च द्वादशपणो दण्डः परिवर्तने मूल्यद्विगुणो वस्त्रदानं च
paravastravikrayāvakrayādhāneṣu ca dvādaśapaṇo daṇḍaḥ parivartane mūlyadviguṇo vastradānaṃ ca
- 18
मुकुलावदातं शिलापट्टशुद्धं धौतसूत्रवर्णं प्रमृष्टश्वेतं चैकरात्रोत्तरं दद्युः
mukulāvadātaṃ śilāpaṭṭaśuddhaṃ dhautasūtravarṇaṃ pramṛṣṭaśvetaṃ caikarātrottaraṃ dadyuḥ
- 19
पञ्चरात्रिकं तनुरागं षड्रात्रिकं नीलं पुष्पलाक्षामञ्जिष्ठारक्तं गुरुपरिकर्म यत्नोपचार्यं जात्यं वासः सप्तरात्रिकम्
pañcarātrikaṃ tanurāgaṃ ṣaḍrātrikaṃ nīlaṃ puṣpalākṣāmañjiṣṭhāraktaṃ guruparikarma yatnopacāryaṃ jātyaṃ vāsaḥ saptarātrikam
- 20
ततः परं वेतनहानिं प्राप्नुयुः
tataḥ paraṃ vetanahāniṃ prāpnuyuḥ
- 21
श्रद्धेया रागविवादेषु वेतनं कुशलाः कल्पयेयुः
śraddheyā rāgavivādeṣu vetanaṃ kuśalāḥ kalpayeyuḥ
- 22
परार्ध्यानां पणो वेतनं मध्यमानाम् अर्धपणः प्रत्यवराणां पादः स्थूलकानां माषकद्विमाषकं द्विगुणं रक्तकानाम्
parārdhyānāṃ paṇo vetanaṃ madhyamānām ardhapaṇaḥ pratyavarāṇāṃ pādaḥ sthūlakānāṃ māṣakadvimāṣakaṃ dviguṇaṃ raktakānām
- 23
प्रथमनेजने चतुर्भागः क्षयः द्वितीये पञ्चभागः
prathamanejane caturbhāgaḥ kṣayaḥ dvitīye pañcabhāgaḥ
- 24
तेनोत्तरं व्याख्यातम्
tenottaraṃ vyākhyātam
- 25
रजकैस्तुन्नवाया व्याख्याताः
rajakaistunnavāyā vyākhyātāḥ
- 26
सुवर्णकाराणाम् अशुचिहस्ताद्रूप्यं सुवर्णम् अनाख्याय सरूपं क्रीणतां द्वादशपणो दण्डो विरूपं चतुर्विंशतिपणश्चोरहस्ताद् अष्टचत्वारिंशत्पणः
suvarṇakārāṇām aśucihastādrūpyaṃ suvarṇam anākhyāya sarūpaṃ krīṇatāṃ dvādaśapaṇo daṇḍo virūpaṃ caturviṃśatipaṇaścorahastād aṣṭacatvāriṃśatpaṇaḥ
- 27
प्रच्छन्नविरूपमूल्यहीनक्रयेषु स्तेयदण्डः कृतभाण्डोपधौ च
pracchannavirūpamūlyahīnakrayeṣu steyadaṇḍaḥ kṛtabhāṇḍopadhau ca
- 28
सुवर्णान्माषकम् अपहरतो द्विशतो दण्डः रूप्यधरणान्माषकम् अपहरतो द्वादशपणः
suvarṇānmāṣakam apaharato dviśato daṇḍaḥ rūpyadharaṇānmāṣakam apaharato dvādaśapaṇaḥ
- 29
तेनोत्तरं व्याख्यातम्
tenottaraṃ vyākhyātam
- 30
वर्णोत्कर्षम् अपसारणं योगं वा साधयतः पञ्चशतो दण्डः
varṇotkarṣam apasāraṇaṃ yogaṃ vā sādhayataḥ pañcaśato daṇḍaḥ

