18 shlokas
- 1
तीर्थघातग्रन्थिभेदोर्ध्वकराणां प्रथमे ऽपराधे संदेशच्छेदनं चतुष्पञ्चाशत्पणो वा दण्डः द्वितीये छेदनं पणस्य शत्यो वा दण्डस्तृतीये दक्षिणहस्तवधश्चतुःशतो वा दण्डश्चतुर्थे यथाकामी वधः
tīrthaghātagranthibhedordhvakarāṇāṃ prathame 'parādhe saṃdeśacchedanaṃ catuṣpañcāśatpaṇo vā daṇḍaḥ dvitīye chedanaṃ paṇasya śatyo vā daṇḍastṛtīye dakṣiṇahastavadhaścatuḥśato vā daṇḍaścaturthe yathākāmī vadhaḥ
- 2
पञ्चविंशतिपणावरेषु कुक्कुटनकुलमार्जारश्वसूकरस्तेयेषु हिंसायां वा चतुष्पञ्चाशत्पणो दण्डो नासाग्रच्छेदनं वा चण्डालारण्यचराणाम् अर्धदण्डाः
pañcaviṃśatipaṇāvareṣu kukkuṭanakulamārjāraśvasūkarasteyeṣu hiṃsāyāṃ vā catuṣpañcāśatpaṇo daṇḍo nāsāgracchedanaṃ vā caṇḍālāraṇyacarāṇām ardhadaṇḍāḥ
- 3
पाशजालकूटावपातेषु बद्धानां मृगपशुपक्षिव्यालमत्स्यानाम् आदाने तच्च तावच्च दण्डः
pāśajālakūṭāvapāteṣu baddhānāṃ mṛgapaśupakṣivyālamatsyānām ādāne tacca tāvacca daṇḍaḥ
- 4
मृगद्रव्यवनान्मृगद्रव्यापहारे शत्यो दण्डः
mṛgadravyavanānmṛgadravyāpahāre śatyo daṇḍaḥ
- 5
बिंबविहारमृगपक्षिस्तेये हिंसायां वा द्विगुणो दण्डः
biṃbavihāramṛgapakṣisteye hiṃsāyāṃ vā dviguṇo daṇḍaḥ
- 6
कारुशिल्पिकुशीलवतपस्विनां क्षुद्रकद्रव्यापहारे शत्यो दण्डः स्थूलकद्रव्यापहारे द्विशतः कृषिद्रव्यापहारे च
kāruśilpikuśīlavatapasvināṃ kṣudrakadravyāpahāre śatyo daṇḍaḥ sthūlakadravyāpahāre dviśataḥ kṛṣidravyāpahāre ca
- 7
दुर्गम् अकृतप्रवेशस्य प्रविशतः प्राकारच्छिद्राद्वा निक्षेपं गृहीत्वापसरतः काण्डरावधो द्विशतो वा दण्डः
durgam akṛtapraveśasya praviśataḥ prākāracchidrādvā nikṣepaṃ gṛhītvāpasarataḥ kāṇḍarāvadho dviśato vā daṇḍaḥ
- 8
चक्रयुक्तं नावं क्षुद्रपशुं वापहरत एकपादवधः त्रिशतो वा दण्डः
cakrayuktaṃ nāvaṃ kṣudrapaśuṃ vāpaharata ekapādavadhaḥ triśato vā daṇḍaḥ
- 9
कूटकाकण्यक्षारालाशलाकाहस्तविषमकारिण एकहस्तवधः चतुःशतो वा दण्डः
kūṭakākaṇyakṣārālāśalākāhastaviṣamakāriṇa ekahastavadhaḥ catuḥśato vā daṇḍaḥ
- 10
स्तेनपारदारिकयोः साचिव्यकर्मणि स्त्रियाः संगृहीतायाश्च कर्णनासाछेदनं पञ्चशतो वा दण्डः पुंसो द्विगुणः
stenapāradārikayoḥ sācivyakarmaṇi striyāḥ saṃgṛhītāyāśca karṇanāsāchedanaṃ pañcaśato vā daṇḍaḥ puṃso dviguṇaḥ
- 11
महापशुम् एकं दासं दासीं वापहरतः प्रेतभाण्डं वा विक्रीणानस्य द्विपादवधः षट्छतो वा दण्डः
mahāpaśum ekaṃ dāsaṃ dāsīṃ vāpaharataḥ pretabhāṇḍaṃ vā vikrīṇānasya dvipādavadhaḥ ṣaṭchato vā daṇḍaḥ
- 12
वर्णोत्तमानां गुरूणां च हस्तपादलङ्घने राजयानवाहनाद्यारोहणे चैकहस्तपादवधः सप्तशतो वा दण्डः
varṇottamānāṃ gurūṇāṃ ca hastapādalaṅghane rājayānavāhanādyārohaṇe caikahastapādavadhaḥ saptaśato vā daṇḍaḥ
- 13
शूद्रस्य ब्राह्मणवादिनो देवद्रव्यम् अवस्तृणतो राजद्विष्टम् आदिशतो द्विनेत्रभेदिनश्च योगाञ्जनेनान्धत्वम् अष्टशतो वा दण्डः
śūdrasya brāhmaṇavādino devadravyam avastṛṇato rājadviṣṭam ādiśato dvinetrabhedinaśca yogāñjanenāndhatvam aṣṭaśato vā daṇḍaḥ
- 14
चोरं पारदारिकं वा मोक्षयतो राजशासनम् ऊनम् अतिरिक्तं वा लिखतः कन्यां दासीं वा सहिरण्यम् अपहरतः कूटव्यवहारिणो विमांसविक्रयिणश्च वामहस्तद्विपादवधो नवशतो वा दण्डः
coraṃ pāradārikaṃ vā mokṣayato rājaśāsanam ūnam atiriktaṃ vā likhataḥ kanyāṃ dāsīṃ vā sahiraṇyam apaharataḥ kūṭavyavahāriṇo vimāṃsavikrayiṇaśca vāmahastadvipādavadho navaśato vā daṇḍaḥ
- 15
मानुषमांसविक्रये वधः
mānuṣamāṃsavikraye vadhaḥ
- 16
देवपशुप्रतिमामनुष्यक्षेत्रगृहहिरण्यसुवर्णरत्नसस्यापहारिण उत्तमो दण्डः शुद्धवधो वा
devapaśupratimāmanuṣyakṣetragṛhahiraṇyasuvarṇaratnasasyāpahāriṇa uttamo daṇḍaḥ śuddhavadho vā
- 17
पुरुषं चापराधं च कारणं गुरुलाघवम्
अनुबन्धं तदात्वं च देशकालौ समीक्ष्य च
puruṣaṃ cāparādhaṃ ca kāraṇaṃ gurulāghavam
anubandhaṃ tadātvaṃ ca deśakālau samīkṣya ca
- 18
उत्तमावरमध्यत्वं प्रदेष्टा दण्डकर्मणि
राज्ञश्च प्रकृतीनां च कल्पयेद् अन्तरा स्थितः
uttamāvaramadhyatvaṃ pradeṣṭā daṇḍakarmaṇi
rājñaśca prakṛtīnāṃ ca kalpayed antarā sthitaḥ

