27 shlokas
- 1
तैलाभ्यक्तम् आशुमृतकं परीक्षेत
tailābhyaktam āśumṛtakaṃ parīkṣeta
- 2
निष्कीर्णमूत्रपुरीषं वातपूर्णकोष्ठत्वक्कं शूनपादपाणिम् उन्मीलिताक्षं सव्यञ्जनकण्ठं पीडननिरुद्धोच्छ्वासहतं विद्यात्
niṣkīrṇamūtrapurīṣaṃ vātapūrṇakoṣṭhatvakkaṃ śūnapādapāṇim unmīlitākṣaṃ savyañjanakaṇṭhaṃ pīḍananiruddhocchvāsahataṃ vidyāt
- 3
तम् एव संकुचितबाहुसक्थिम् उद्बन्धहतं विद्यात्
tam eva saṃkucitabāhusakthim udbandhahataṃ vidyāt
- 4
शूनपाणिपादोदरम् अपगताक्षम् उद्वृत्तनाभिम् अवरोपितं विद्यात्
śūnapāṇipādodaram apagatākṣam udvṛttanābhim avaropitaṃ vidyāt
- 5
निस्तब्धगुदाक्षं संदष्टजिह्वम् आध्मातोदरम् उदकहतं विद्यात्
nistabdhagudākṣaṃ saṃdaṣṭajihvam ādhmātodaram udakahataṃ vidyāt
- 6
शोणितानुसिक्तं भग्नभिन्नगात्रं काष्ठैर् अश्मभिर्वा हतं विद्यात्
śoṇitānusiktaṃ bhagnabhinnagātraṃ kāṣṭhair aśmabhirvā hataṃ vidyāt
- 7
संभग्नस्फुटितगात्रम् अवक्षिप्तं विद्यात्
saṃbhagnasphuṭitagātram avakṣiptaṃ vidyāt
- 8
श्यावपाणिपाददन्तनखं शिथिलमांसरोमचर्माणं फेनोपदिग्धमुखं विषहतं विद्यात्
śyāvapāṇipādadantanakhaṃ śithilamāṃsaromacarmāṇaṃ phenopadigdhamukhaṃ viṣahataṃ vidyāt
- 9
तम् एव सशोणितदंशं सर्पकीटहतं विद्यात्
विक्षिप्तवस्त्रगात्रम् अतिवान्तविरिक्तं मदनयोगहतं विद्यात्
tam eva saśoṇitadaṃśaṃ sarpakīṭahataṃ vidyāt
vikṣiptavastragātram ativāntaviriktaṃ madanayogahataṃ vidyāt
- 10
अतो ऽन्यतमेन कारणेन हतं हत्वा वा दण्डभयाद् उद्बद्धनिकृत्तकण्ठं विद्यात्
ato 'nyatamena kāraṇena hataṃ hatvā vā daṇḍabhayād udbaddhanikṛttakaṇṭhaṃ vidyāt
- 11
विषहतस्य भोजनशेषं वयोभिः परीक्षेत
viṣahatasya bhojanaśeṣaṃ vayobhiḥ parīkṣeta
- 12
हृदयाद् उद्धृत्याग्नौ प्रक्षिप्तं चिटिचिटायदिन्द्रधनुर्वर्णं वा विषयुक्तं विद्यात्दग्धस्य हृदयम् अदग्धं दृष्ट्वा वा
hṛdayād uddhṛtyāgnau prakṣiptaṃ ciṭiciṭāyadindradhanurvarṇaṃ vā viṣayuktaṃ vidyātdagdhasya hṛdayam adagdhaṃ dṛṣṭvā vā
- 13
तस्य परिचारकजनं वाग्दण्डपारुष्यातिलब्धं मार्गेत दुःखोपहतम् अन्यप्रसक्तं वा स्त्रीजनं दायवृत्तिस्त्रीजनाभिमन्तारं वा बन्धुम्
tasya paricārakajanaṃ vāgdaṇḍapāruṣyātilabdhaṃ mārgeta duḥkhopahatam anyaprasaktaṃ vā strījanaṃ dāyavṛttistrījanābhimantāraṃ vā bandhum
- 14
तद् एव हतोद्बद्धस्य परीक्षेत
tad eva hatodbaddhasya parīkṣeta
- 15
स्वयम् उद्बद्धस्य वा विप्रकारम् अयुक्तं मार्गेत
svayam udbaddhasya vā viprakāram ayuktaṃ mārgeta
- 16
सर्वेषां वा स्त्रीदायाद्यदोषः कर्मस्पर्धा प्रतिपक्षद्वेषः पण्यसंस्थासमवायो वा विवादपदानाम् अन्यतमद्वा रोषस्थानम्
sarveṣāṃ vā strīdāyādyadoṣaḥ karmaspardhā pratipakṣadveṣaḥ paṇyasaṃsthāsamavāyo vā vivādapadānām anyatamadvā roṣasthānam
- 17
रोषनिमित्तो घातः
roṣanimitto ghātaḥ
- 18
स्वयमादिष्टपुरुषैर्वा चोरैर् अर्थनिमित्तं सादृश्याद् अन्यवैरिभिर्वा हतस्य घातम् आसन्नेभ्यः परीक्षेत
svayamādiṣṭapuruṣairvā corair arthanimittaṃ sādṛśyād anyavairibhirvā hatasya ghātam āsannebhyaḥ parīkṣeta
- 19
येनाहूतः सह स्थितः प्रस्थितो हतभूमिम् आनीतो वा तम् अनुयुञ्जीत
yenāhūtaḥ saha sthitaḥ prasthito hatabhūmim ānīto vā tam anuyuñjīta
- 20
ये चास्य हतभूमावासन्नचरास्तान् एकैकशः पृच्छेत्केनायम् इहानीतो हतो वा कः सशस्त्रः संगूहमान उद्विग्नो वा युष्माभिर्दृष्टः इति
ye cāsya hatabhūmāvāsannacarāstān ekaikaśaḥ pṛcchetkenāyam ihānīto hato vā kaḥ saśastraḥ saṃgūhamāna udvigno vā yuṣmābhirdṛṣṭaḥ iti
- 21
ते यथा ब्रूयुस्तथानुयुञ्जीत
te yathā brūyustathānuyuñjīta
- 22
अनाथस्य शरीरस्थम् उपभोगं परिच्छदम्
वस्त्रं वेषं विभूषां वा दृष्ट्वा तद्व्यवहारिणः
anāthasya śarīrastham upabhogaṃ paricchadam
vastraṃ veṣaṃ vibhūṣāṃ vā dṛṣṭvā tadvyavahāriṇaḥ
- 23
अनुयुञ्जीत संयोगं निवासं वासकारणम्
कर्म च व्यवहारं च ततो मार्गणम् आचरेत्
anuyuñjīta saṃyogaṃ nivāsaṃ vāsakāraṇam
karma ca vyavahāraṃ ca tato mārgaṇam ācaret
- 24
रज्जुशस्त्रविषैर्वापि कामक्रोधवशेन यः
घातयेत्स्वयम् आत्मानं स्त्री वा पापेन मोहिता
rajjuśastraviṣairvāpi kāmakrodhavaśena yaḥ
ghātayetsvayam ātmānaṃ strī vā pāpena mohitā
- 25
रज्जुना राजमार्गे तांश्चण्डालेनापकर्षयेत्
न श्मशानविधिस्तेषां न सम्बन्धिक्रियास्तथा
rajjunā rājamārge tāṃścaṇḍālenāpakarṣayet
na śmaśānavidhisteṣāṃ na sambandhikriyāstathā
- 26
बन्धुस्तेषां तु यः कुर्यात्प्रेतकार्यक्रियाविधिम्
तद्गतिं स चरेत्पश्चात्स्वजनाद्वा प्रमुच्यते
bandhusteṣāṃ tu yaḥ kuryātpretakāryakriyāvidhim
tadgatiṃ sa caretpaścātsvajanādvā pramucyate
- 27
संवत्सरेण पतति पतितेन समाचरन्
याजनाध्यापनाद्यौनात्तैश्चान्यो ऽपि समाचरन्
saṃvatsareṇa patati patitena samācaran
yājanādhyāpanādyaunāttaiścānyo 'pi samācaran

