26 shlokas
- 1
कलहे घ्नतः पुरुषं चित्रो घातः
kalahe ghnataḥ puruṣaṃ citro ghātaḥ
- 2
सप्तरात्रस्यान्तर्मृते शुद्धवधः पक्षस्यान्तर् उत्तमो मासस्यान्तः पञ्चशतः समुत्थानव्ययश्च
saptarātrasyāntarmṛte śuddhavadhaḥ pakṣasyāntar uttamo māsasyāntaḥ pañcaśataḥ samutthānavyayaśca
- 3
शस्त्रेण प्रहरत उत्तमो दण्डः
śastreṇa praharata uttamo daṇḍaḥ
- 4
मदेन हस्तवधः मोहेन द्विशतः
madena hastavadhaḥ mohena dviśataḥ
- 5
वधे वधः
vadhe vadhaḥ
- 6
प्रहारेण गर्भं पातयत उत्तमो दण्डो भैषज्येन मध्यमः परिक्लेशेन पूर्वः साहसदण्डः
prahāreṇa garbhaṃ pātayata uttamo daṇḍo bhaiṣajyena madhyamaḥ parikleśena pūrvaḥ sāhasadaṇḍaḥ
- 7
प्रसभस्त्रीपुरुषघातकाभिसारकनिग्राहकावघोषकावस्कन्दकोपवेधकान्पथिवेश्मप्रतिरोधकान्राजहस्त्यश्वरथानां हिंसकान्स्तेनान्वा शूलान् आरोहयेयुः
prasabhastrīpuruṣaghātakābhisārakanigrāhakāvaghoṣakāvaskandakopavedhakānpathiveśmapratirodhakānrājahastyaśvarathānāṃ hiṃsakānstenānvā śūlān ārohayeyuḥ
- 8
यश्चैनान्दहेद् अपनयेद्वा स तम् एव दण्डं लभेत साहसम् उत्तमं वा
yaścaināndahed apanayedvā sa tam eva daṇḍaṃ labheta sāhasam uttamaṃ vā
- 9
हिंस्रस्तेनानां भक्तवासोपकरणाग्निमन्त्रदानवैयावृत्यकर्मसूत्तमो दण्डः परिभाषणम् अविज्ञाते
hiṃsrastenānāṃ bhaktavāsopakaraṇāgnimantradānavaiyāvṛtyakarmasūttamo daṇḍaḥ paribhāṣaṇam avijñāte
- 10
हिंस्रस्तेनानां पुत्रदारम् असमन्त्रं विसृजेत्समन्त्रम् आददीत
hiṃsrastenānāṃ putradāram asamantraṃ visṛjetsamantram ādadīta
- 11
राज्यकामुकम् अन्तःपुरप्रधर्षकम् अटव्यमित्रोत्साहकं दुर्गराष्ट्रदण्डकोपकं वा शिरोहस्तप्रदीपिकं घातयेत्
rājyakāmukam antaḥpurapradharṣakam aṭavyamitrotsāhakaṃ durgarāṣṭradaṇḍakopakaṃ vā śirohastapradīpikaṃ ghātayet
- 12
ब्राह्मणं तमः प्रवेशयेत्
brāhmaṇaṃ tamaḥ praveśayet
- 13
मातृपितृपुत्रभ्रात्राचार्यतपस्विघातकं वात्वक्शिरःप्रदीपिकं घातयेत्
mātṛpitṛputrabhrātrācāryatapasvighātakaṃ vātvakśiraḥpradīpikaṃ ghātayet
- 14
तेषाम् आक्रोशे जिह्वाछेदो ऽङ्गाभिरदने तदङ्गान्मोच्यः
teṣām ākrośe jihvāchedo 'ṅgābhiradane tadaṅgānmocyaḥ
- 15
यदृच्छाघाते पुंसः पशुयूथस्तेये च शुद्धवधः
yadṛcchāghāte puṃsaḥ paśuyūthasteye ca śuddhavadhaḥ
- 16
दशावरं च यूथं विद्यात्
daśāvaraṃ ca yūthaṃ vidyāt
- 17
उदकधारणं सेतुं भिन्दतस्तत्रैवाप्सु निमज्जनम् अनुदकम् उत्तमः साहसदण्डः भग्नोत्सृष्टकं मध्यमः
udakadhāraṇaṃ setuṃ bhindatastatraivāpsu nimajjanam anudakam uttamaḥ sāhasadaṇḍaḥ bhagnotsṛṣṭakaṃ madhyamaḥ
- 18
विषदायकं पुरुषं स्त्रियं च पुरुषघ्नीम् अपः प्रवेशयेद् अगर्भिणीम्गर्भिणीं मासावरप्रजाताम्
viṣadāyakaṃ puruṣaṃ striyaṃ ca puruṣaghnīm apaḥ praveśayed agarbhiṇīmgarbhiṇīṃ māsāvaraprajātām
- 19
पतिगुरुप्रजाघातिकाम् अग्निविषदां संधिछेदिकां वा गोभिः पाटयेत्
patiguruprajāghātikām agniviṣadāṃ saṃdhichedikāṃ vā gobhiḥ pāṭayet
- 20
विवीतक्षेत्रखलवेश्मद्रव्यहस्तिवनादीपिकम् अग्निना दाहयेत्
vivītakṣetrakhalaveśmadravyahastivanādīpikam agninā dāhayet
- 21
राजाक्रोशकमन्त्रभेदकयोर् अनिष्टप्रवृत्तिकस्य ब्राह्मणमहानसावलेहिनश्च जिह्वाम् उत्पाटयेत्
rājākrośakamantrabhedakayor aniṣṭapravṛttikasya brāhmaṇamahānasāvalehinaśca jihvām utpāṭayet
- 22
प्रहरणावरणस्तेनम् अनायुधीयम् इषुभिर्घातयेत्
praharaṇāvaraṇastenam anāyudhīyam iṣubhirghātayet
- 23
आयुधीयस्योत्तमः
āyudhīyasyottamaḥ
- 24
मेढ्रफलोपघातिनस्तद् एव छेदयेत्
meḍhraphalopaghātinastad eva chedayet
- 25
जिह्वानासोपघाते संदंशवधः
jihvānāsopaghāte saṃdaṃśavadhaḥ
- 26
एते शास्त्रेष्वनुगताः क्लेशदण्डा महात्मनाम्
अक्लिष्टानां तु पापानां धर्म्यः शुद्धवधः स्मृतः
ete śāstreṣvanugatāḥ kleśadaṇḍā mahātmanām
akliṣṭānāṃ tu pāpānāṃ dharmyaḥ śuddhavadhaḥ smṛtaḥ

