20 shlokas
- 1
राजा स्वर्गकामो राजसूयेन यजेत
rājā svargakāmo rājasūyena yajeta
- 2
शतसहस्रं दक्षिणा
śatasahasraṃ dakṣiṇā
- 3
अग्निष्टोमः पञ्चापवर्गः प्रथमम् अहः
agniṣṭomaḥ pañcāpavargaḥ prathamam ahaḥ
- 4
पञ्च सहस्राणि पवित्रे ददाति
त्रिंशतम् अभिषेचनीये
त्रिंशतं दशपेये
दश केशवपनीये
विंशतिं व्युष्टिद्विरात्रे
पञ्च क्षत्रस्य धृतौ
pañca sahasrāṇi pavitre dadāti
triṃśatam abhiṣecanīye
triṃśataṃ daśapeye
daśa keśavapanīye
viṃśatiṃ vyuṣṭidvirātre
pañca kṣatrasya dhṛtau
- 5
अपि वा चत्वार्य् अभिषेचनीये
api vā catvāry abhiṣecanīye
- 6
प्रतिसाहस्राणीतराण्य् अहानि
pratisāhasrāṇītarāṇy ahāni
- 7
षष्टित्रीणि शतानि सहस्राणां ददातीति बह्वृचब्राह्मणं भवति
ṣaṣṭitrīṇi śatāni sahasrāṇāṃ dadātīti bahvṛcabrāhmaṇaṃ bhavati
- 8
तथा दक्षिणा अतिनयेद्यथास्याहानि स्वकालानि स्युः
tathā dakṣiṇā atinayedyathāsyāhāni svakālāni syuḥ
- 9
शेषम् अनुदिशति
śeṣam anudiśati
- 10
श्वो भूत आनुमतादिभिर् अष्टाभिर् अन्वहं यजते
śvo bhūta ānumatādibhir aṣṭābhir anvahaṃ yajate
- 11
पिंषन्न् आनुमतं पश्चाद् उत्तरतश्च व्यवशातयति
piṃṣann ānumataṃ paścād uttarataśca vyavaśātayati
- 12
ये प्रत्यञ्चः शम्याया अवशीयन्ते तन्नैरृतम् एककपालम्
ye pratyañcaḥ śamyāyā avaśīyante tannairṛtam ekakapālam
- 13
य उदञ्चस्तान् उदङ्परेत्य वल्मीकवपाम् उद्धत्येदम् अहम् अमुष्यामुष्यायणस्य क्षेत्रियम् अवयज इति शुक्त्या वल्मीकवपायां हुत्वेदम् अहम् अमुष्यामुष्यायणस्य क्षेत्रियम् अपिदधामीति तयैव शुक्त्या वल्मीकवपाम् अपिदध्यात्
ya udañcastān udaṅparetya valmīkavapām uddhatyedam aham amuṣyāmuṣyāyaṇasya kṣetriyam avayaja iti śuktyā valmīkavapāyāṃ hutvedam aham amuṣyāmuṣyāyaṇasya kṣetriyam apidadhāmīti tayaiva śuktyā valmīkavapām apidadhyāt
- 14
वल्मीकवपया जुहोति वल्मीकवपयापिदधातीत्य् एके
valmīkavapayā juhoti valmīkavapayāpidadhātīty eke
- 15
आनुमतम् आसाद्य नैरृतेन प्रचरति
ānumatam āsādya nairṛtena pracarati
- 16
वीहि स्वाहेति गार्हपत्ये हुत्वा दक्षिणाग्नेर् एकोल्मुकं धूपायद्धरति
vīhi svāheti gārhapatye hutvā dakṣiṇāgner ekolmukaṃ dhūpāyaddharati
- 17
दक्षिणम् अपरम् अवान्तरदेशं गत्वा स्वकृत इरिणे प्रदरे वोपसमाधायैष ते निरृते भाग इत्य् अङ्गुष्ठाभ्यां विस्रंसिकाकाण्डाभ्यां वा नैरृतं सर्वहुतं जुहोति
dakṣiṇam aparam avāntaradeśaṃ gatvā svakṛta iriṇe pradare vopasamādhāyaiṣa te nirṛte bhāga ity aṅguṣṭhābhyāṃ visraṃsikākāṇḍābhyāṃ vā nairṛtaṃ sarvahutaṃ juhoti
- 18
कृष्णं वासः कृष्णतूषं दक्षिणा
kṛṣṇaṃ vāsaḥ kṛṣṇatūṣaṃ dakṣiṇā
- 19
कृष्णं वासो भिन्नान्तम् इत्य् एके
kṛṣṇaṃ vāso bhinnāntam ity eke
- 20
अप्रतीक्षम् आयन्ति निरृत्या अन्तर्हित्या इति विज्ञायते
apratīkṣam āyanti nirṛtyā antarhityā iti vijñāyate

