21 shlokas
- 1
प्राङ्माहेन्द्रात्कृत्वा नैवारे सर्पिर् आनीय चात्वाले ऽवदधाति
prāṅmāhendrātkṛtvā naivāre sarpir ānīya cātvāle 'vadadhāti
- 2
तं राजपुत्रो गोपायति
taṃ rājaputro gopāyati
- 3
चात्वाले रथाक्षाकृति काष्ठं निखाय तस्मिन्न् औदुम्बरं रथचक्रं सप्तदशारं प्रतिमुञ्चति
cātvāle rathākṣākṛti kāṣṭhaṃ nikhāya tasminn audumbaraṃ rathacakraṃ saptadaśāraṃ pratimuñcati
- 4
उत्तरस्यां वेदिश्रोण्यां सप्तदश दुन्दुभीन्प्रबध्नन्ति
uttarasyāṃ vediśroṇyāṃ saptadaśa dundubhīnprabadhnanti
- 5
विष्णोः क्रमो ऽसीति रथं यजमानो ऽभ्यैति
viṣṇoḥ kramo 'sīti rathaṃ yajamāno 'bhyaiti
- 6
अङ्कौ न्यङ्काव् इति रथचक्रे अभिमृशति पक्षसी वा
aṅkau nyaṅkāv iti rathacakre abhimṛśati pakṣasī vā
- 7
इन्द्राय वाचं वदतेति दुन्दुभीन्संह्रादयन्ति
indrāya vācaṃ vadateti dundubhīnsaṃhrādayanti
- 8
देवस्याहं सवितुः प्रसवे बृहस्पतिना वाजजिता वाजं जेषम् इत्य् औदुम्बरं रथचक्रं ब्रह्मारोहति
devasyāhaṃ savituḥ prasave bṛhaspatinā vājajitā vājaṃ jeṣam ity audumbaraṃ rathacakraṃ brahmārohati
- 9
तम् आह वाजिनां साम गायेति
tam āha vājināṃ sāma gāyeti
- 10
तस्य चक्रं त्रिः प्रदक्षिणम् आवर्तयति
tasya cakraṃ triḥ pradakṣiṇam āvartayati
- 11
वर्तमाने ब्रह्मा गायति
vartamāne brahmā gāyati
- 12
देवस्याहं सवितुः प्रसवे बृहस्पतिना वाजजिता वर्षिष्ठं नाकं रुहेयम् इति यजुर्युक्तं यजमान आरोहति
devasyāhaṃ savituḥ prasave bṛhaspatinā vājajitā varṣiṣṭhaṃ nākaṃ ruheyam iti yajuryuktaṃ yajamāna ārohati
- 13
वाजसृत इतरान्रथान्
vājasṛta itarānrathān
- 14
वाजिनो वाजजितो वाजं सरिष्यन्तो वाजं जेष्यन्तो बृहस्पतेर्भागम् अवजिघ्रतेति नैवारम् अश्वौ धुर्याव् अवघ्रापयति सर्वान्वा
vājino vājajito vājaṃ sariṣyanto vājaṃ jeṣyanto bṛhaspaterbhāgam avajighrateti naivāram aśvau dhuryāv avaghrāpayati sarvānvā
- 15
बृहस्पतेर्भागे नि मृड्ढ्वम् इति प्रप्रोथेषु च लेपान्निमार्ष्टि
bṛhaspaterbhāge ni mṛḍḍhvam iti praprotheṣu ca lepānnimārṣṭi
- 16
अश्वाजनीत्य् अश्वाजनीम् आदायाध्वर्युर्यजुर्युक्तम् अधिरुह्यार्वासि सप्तिर् असीति तयाश्वान्समवक्षिणोति
aśvājanīty aśvājanīm ādāyādhvaryuryajuryuktam adhiruhyārvāsi saptir asīti tayāśvānsamavakṣiṇoti
- 17
अनभ्यासादयन्त इतरे रथाः पश्चाद् अनुयान्ति
anabhyāsādayanta itare rathāḥ paścād anuyānti
- 18
वाजिनो वाजं धावतेति चतसृभिर्धावतो ऽनुमन्त्रयते
vājino vājaṃ dhāvateti catasṛbhirdhāvato 'numantrayate
- 19
अग्निर् एकाक्षरेणेति धावत्सूज्जितीर्यजमानं वाचयति
agnir ekākṣareṇeti dhāvatsūjjitīryajamānaṃ vācayati
- 20
लक्षणं प्राप्योदञ्च आवृत्य प्रदक्षिणम् आवर्तयन्ते
lakṣaṇaṃ prāpyodañca āvṛtya pradakṣiṇam āvartayante
- 21
मितद्रव इति चतसृभिः प्रत्याधावतो ऽनुमन्त्रयते
mitadrava iti catasṛbhiḥ pratyādhāvato 'numantrayate

