10 shlokas
- 1
यदि सांनाय्यस्याज्यस्य वान्यत्र बर्हिषः पुरोत्तमात्प्रयाजात्स्कन्देत्सं त्वा सिञ्चामीति तस्य स्वयं संभृत्य भूपतये स्वाहेति त्रिभिः स्कन्नम् अनुमन्त्रयते
yadi sāṃnāyyasyājyasya vānyatra barhiṣaḥ purottamātprayājātskandetsaṃ tvā siñcāmīti tasya svayaṃ saṃbhṛtya bhūpataye svāheti tribhiḥ skannam anumantrayate
- 2
अध्वर्युयजमानाव् आज्यम् असीति निमील्य वीक्ष्यानुच्छूसन्ताव् आज्यम् अवेक्षेते
adhvaryuyajamānāv ājyam asīti nimīlya vīkṣyānucchūsantāv ājyam avekṣete
- 3
शुक्रम् असीति त्रिभिर् उदगग्राभ्यां पवित्राभ्याम् अध्वर्युः पुनराहारम् आज्यं त्रिर् उत्पुनाति
śukram asīti tribhir udagagrābhyāṃ pavitrābhyām adhvaryuḥ punarāhāram ājyaṃ trir utpunāti
- 4
देवो व इति त्रिः प्रोक्षणीर् अद्भिर् आज्यम् इति यजमान आज्यम् अपश्चोत्पूयमाना अनुमन्त्रयते
devo va iti triḥ prokṣaṇīr adbhir ājyam iti yajamāna ājyam apaścotpūyamānā anumantrayate
- 5
अध्वर्युर् अन्तर्वेदि समंबिलं जुहूं धारयमाण आज्यस्थाल्या वेदेनोपयम्य स्रुवेण शुक्रं त्वा शुक्रायाम् इति चतुः पञ्चकृत्वो वा जुह्वां प्रभूतम् आज्यं गृह्णाति
adhvaryur antarvedi samaṃbilaṃ juhūṃ dhārayamāṇa ājyasthālyā vedenopayamya sruveṇa śukraṃ tvā śukrāyām iti catuḥ pañcakṛtvo vā juhvāṃ prabhūtam ājyaṃ gṛhṇāti
- 6
पञ्चानां त्वा वातानाम् इति चतुः पञ्चकृत्वो वा यजमानो जपति
pañcānāṃ tvā vātānām iti catuḥ pañcakṛtvo vā yajamāno japati
- 7
अध्वर्युर्ज्योतिस्त्वा ज्योतिषि धाम्ने धाम्न इति मध्यदेशे धारयमाण उपभृत्य् अष्टौ दशकृत्वो वाल्पिष्ठं गृह्णाति
adhvaryurjyotistvā jyotiṣi dhāmne dhāmna iti madhyadeśe dhārayamāṇa upabhṛty aṣṭau daśakṛtvo vālpiṣṭhaṃ gṛhṇāti
- 8
पञ्चानां त्वर्तूणाम् इति त्रीन्यजमानो जपति पञ्चानां त्वा सलिलानां पञ्चानां त्वा पृष्ठानाम् इति च द्वौ चरोस्त्वा पञ्चबिलस्येति पञ्च
pañcānāṃ tvartūṇām iti trīnyajamāno japati pañcānāṃ tvā salilānāṃ pañcānāṃ tvā pṛṣṭhānām iti ca dvau carostvā pañcabilasyeti pañca
- 9
अध्वर्युर् अर्चिस्त्वार्चिषीति चतुः पञ्चकृत्वो वा भूमौ प्रतिष्ठितायां ध्रुवायां भूयिष्ठं गृह्णाति
adhvaryur arcistvārciṣīti catuḥ pañcakṛtvo vā bhūmau pratiṣṭhitāyāṃ dhruvāyāṃ bhūyiṣṭhaṃ gṛhṇāti
- 10
सुप्रजास्त्वाय त्वा गृह्णामीति चतुः पञ्च वा यजमानो जपति
suprajāstvāya tvā gṛhṇāmīti catuḥ pañca vā yajamāno japati

