31 shlokas
- 1
यस्ते मदो वरेण्य इति गायत्री भवति मदवद्वै रसवत्तृतीयसवनं मदम् एव तद्रसं दधाति
yaste mado vareṇya iti gāyatrī bhavati madavadvai rasavattṛtīyasavanaṃ madam eva tadrasaṃ dadhāti
- 2
एष स्य धारया सुत इति ककुभः सत्यो ऽभ्यारम्भेण त्रिष्टुभः
eṣa sya dhārayā suta iti kakubhaḥ satyo 'bhyārambheṇa triṣṭubhaḥ
- 3
अपभ्रंश इव वा एष यत्ज्यायसः स्तोमात्कनीयांसं स्तोमम् उपयन्ति यद् एता अभ्यारम्भेण त्रिष्टुभो भवन्त्य् अह्न एव प्रत्युत्तम्भाय
apabhraṃśa iva vā eṣa yatjyāyasaḥ stomātkanīyāṃsaṃ stomam upayanti yad etā abhyārambheṇa triṣṭubho bhavanty ahna eva pratyuttambhāya
- 4
सखाय आनिषीदतेति वालखिल्या वालखिल्याव् एतौ तृचौ षष्ठे चाहनि सप्तमे च यद् एतौ वालखिल्यौ तृचौ भवतो ऽह्नोर् एव व्यतिषङ्गायाव्यवस्रंसाय सन्तत्यै
sakhāya āniṣīdateti vālakhilyā vālakhilyāv etau tṛcau ṣaṣṭhe cāhani saptame ca yad etau vālakhilyau tṛcau bhavato 'hnor eva vyatiṣaṅgāyāvyavasraṃsāya santatyai
- 5
पुरोजिती वो अन्धस इति विराड् अन्नं विराड् अन्नाद्यस्यावरुद्ध्यै
purojitī vo andhasa iti virāḍ annaṃ virāḍ annādyasyāvaruddhyai
- 6
प्र वाज्य् अक्षार् इत्य् अक्षरपङ्क्तिः स्तोमानां प्रभूतिः
pra vājy akṣār ity akṣarapaṅktiḥ stomānāṃ prabhūtiḥ
- 7
अथो एतद्ध्येवैतर्हि छन्दो ऽयातयाम यद् अक्षरपङ्क्तिस्तेन छन्दोमा अयातयामानः क्रियन्ते
atho etaddhyevaitarhi chando 'yātayāma yad akṣarapaṅktistena chandomā ayātayāmānaḥ kriyante
- 8
ब्रह्मवादिनो वदन्ति यत्षडहे स्तोमाश्छन्दांस्य् आप्यन्ते किंछन्दसश्छन्दोमा इत्य् एतच्छन्दसो यद् एता अक्षरपङ्क्तय इति ब्रूयात्
brahmavādino vadanti yatṣaḍahe stomāśchandāṃsy āpyante kiṃchandasaśchandomā ity etacchandaso yad etā akṣarapaṅktaya iti brūyāt
- 9
ये सोमासः परावतीति परावतम् इव वा एतर्हि यज्ञो गतस्तम् एवैतेनान्विच्छन्ति
ye somāsaḥ parāvatīti parāvatam iva vā etarhi yajño gatastam evaitenānvicchanti
- 10
गायत्र्यः सत्यो जगत्यो रूपेण तस्माज्जगतीनां लोके क्रियन्ते
gāyatryaḥ satyo jagatyo rūpeṇa tasmājjagatīnāṃ loke kriyante
- 11
गायत्रं भवति यद् एव गायत्रस्य ब्राह्मणम्
gāyatraṃ bhavati yad eva gāyatrasya brāhmaṇam
- 12
दक्षणिधनं भवति
dakṣaṇidhanaṃ bhavati
- 13
प्रजापतिः प्रजा असृजत ता अस्मात्सृष्टा अबला इवाच्छदयंस्तास्व् एतेन साम्ना दक्षायेत्य् ओजो वीर्यम् अदधाद्यद् एतत्साम भवत्य् ओज एव वीर्यम् आत्मन्धत्ते
prajāpatiḥ prajā asṛjata tā asmātsṛṣṭā abalā ivācchadayaṃstāsv etena sāmnā dakṣāyety ojo vīryam adadhādyad etatsāma bhavaty oja eva vīryam ātmandhatte
- 14
शार्करं भवति
śārkaraṃ bhavati
- 15
इन्द्रं सर्वाणि भूतान्य् अस्तुवन्स शर्करं शिशुमारर्षिम् उपेत्याब्रवीत्स्तुहि मेति सो ऽपः प्रस्कन्दन्न् अब्रवीद् एतावतो ऽहं त्वां स्तुयाम् इति तस्माद् अपां वेगम् अवेजयत्स हीन इवामन्यत स एतत्सामापश्यत्तेनापो ऽनुसमाश्नुत तद्वाव स तर्ह्यकामयत कामसनि साम शार्करं कामम् एवैतेनावरुन्द्धे
indraṃ sarvāṇi bhūtāny astuvansa śarkaraṃ śiśumārarṣim upetyābravītstuhi meti so 'paḥ praskandann abravīd etāvato 'haṃ tvāṃ stuyām iti tasmād apāṃ vegam avejayatsa hīna ivāmanyata sa etatsāmāpaśyattenāpo 'nusamāśnuta tadvāva sa tarhyakāmayata kāmasani sāma śārkaraṃ kāmam evaitenāvarunddhe
- 16
प्लवो भवति
plavo bhavati
- 17
समुद्रं वा एते प्रस्नान्तीत्य् आहुर्ये द्वादशाहम् उपयन्तीति यो वा अप्लवः समुद्रं प्रस्नाति न स तत उदेति यत्प्लवो भवति स्वर्गस्य लोकस्य समष्ट्यै
samudraṃ vā ete prasnāntīty āhurye dvādaśāham upayantīti yo vā aplavaḥ samudraṃ prasnāti na sa tata udeti yatplavo bhavati svargasya lokasya samaṣṭyai
- 18
अतिविश्वानि दुरिता तरेमेति यद् एवैषां दुष्टुतं दुश्शस्तं तद् एतेन तरन्ति
ativiśvāni duritā taremeti yad evaiṣāṃ duṣṭutaṃ duśśastaṃ tad etena taranti
- 19
एकादशाक्षरणिधनो भवत्य् एकादशाक्षरा त्रिष्टुब् ओजोवीर्यं त्रिष्टुब् ओजस्य् एव वीर्ये प्रतितिष्ठति
ekādaśākṣaraṇidhano bhavaty ekādaśākṣarā triṣṭub ojovīryaṃ triṣṭub ojasy eva vīrye pratitiṣṭhati
- 20
गौरीवितं भवति यद् एव गौरीवितस्य ब्राह्मणम्
gaurīvitaṃ bhavati yad eva gaurīvitasya brāhmaṇam
- 21
कार्तयशं भवति
kārtayaśaṃ bhavati
- 22
हीति निधनम् उपयन्ति पाप्मनो ऽपहत्यै
hīti nidhanam upayanti pāpmano 'pahatyai
- 23
अप पाप्मानं हते कार्तयशेन तुष्टुवानः
apa pāpmānaṃ hate kārtayaśena tuṣṭuvānaḥ
- 24
सौहविषं भवति
sauhaviṣaṃ bhavati
- 25
सुहविर्वा एतेनाङ्गिरसो ऽञ्जसा स्वर्गं लोकम् अपश्यत्स्वर्गस्य लोकस्यानुख्यात्यै स्वर्गाल्लोकान्न च्यवते तुष्टुवानः
suhavirvā etenāṅgiraso 'ñjasā svargaṃ lokam apaśyatsvargasya lokasyānukhyātyai svargāllokānna cyavate tuṣṭuvānaḥ
- 26
ब्रह्मवादिनो वदन्ति यत्षडहे स्तोमाश्छन्दांस्य् आप्यन्ते किंछन्दसश्छन्दोमा इति पुरुषश्छन्दस इति ब्रूयात्पुरुषो वै पाङ्क्तः पुरुषो द्विपदा छन्दोमानाम् अयातयामतायै
brahmavādino vadanti yatṣaḍahe stomāśchandāṃsy āpyante kiṃchandasaśchandomā iti puruṣaśchandasa iti brūyātpuruṣo vai pāṅktaḥ puruṣo dvipadā chandomānām ayātayāmatāyai
- 27
जराबोधीयं भवत्य् अन्नाद्यस्यावरुद्ध्यै
jarābodhīyaṃ bhavaty annādyasyāvaruddhyai
- 28
अन्नं वै जराबोधीयं मुखं गायत्री मुख एव तद् अन्नं धत्ते ऽन्नम् अत्ति
annaṃ vai jarābodhīyaṃ mukhaṃ gāyatrī mukha eva tad annaṃ dhatte 'nnam atti
- 29
अन्नादो भवति य एवं वेद
annādo bhavati ya evaṃ veda
- 30
गायत्रीषु स्तुवन्ति प्रतिष्ठायै ब्रह्मवर्चसाय येनैव प्राणेन प्रयन्ति तम् अभ्युद्यन्ति
gāyatrīṣu stuvanti pratiṣṭhāyai brahmavarcasāya yenaiva prāṇena prayanti tam abhyudyanti

