14 shlokas
- 1
आप्यन्ते वा एतत्स्तोमाश्छन्दांसि यत्षडह आप्यते
āpyante vā etatstomāśchandāṃsi yatṣaḍaha āpyate
- 2
आप्ते षडहे छन्दांसि स्तोमान्कृत्वा प्रयन्ति
āpte ṣaḍahe chandāṃsi stomānkṛtvā prayanti
- 3
प्र काव्यम् उशनेव ब्रुवाण इति गायत्र्या रूपेण प्रयन्ति
pra kāvyam uśaneva bruvāṇa iti gāyatryā rūpeṇa prayanti
- 4
इयं वै गायत्र्य् अस्याम् एव प्रतिष्ठाय प्रयन्ति
iyaṃ vai gāyatry asyām eva pratiṣṭhāya prayanti
- 5
त्रिष्टुप्प्रतिपद्भवति
triṣṭuppratipadbhavati
- 6
ओजो वीर्यं त्रिष्टुब् ओजस्येव वीर्ये पराक्रम्य प्रयन्ति
ojo vīryaṃ triṣṭub ojasyeva vīrye parākramya prayanti
- 7
स्तोत्रीयस्तृचो भवति प्राणापानानाम् अवरुद्ध्यै
stotrīyastṛco bhavati prāṇāpānānām avaruddhyai
- 8
हरिवत्यो भवन्ति छन्दोमानाम् अयातयामतायै
harivatyo bhavanti chandomānām ayātayāmatāyai
- 9
द्वादशर्चौ भवतः
dvādaśarcau bhavataḥ
- 10
द्वादश मासाः संवत्सरः संवत्सरम् एव तत्पूर्वस्मै षडहाय प्रत्युद्यच्छति सवीवधतायै
dvādaśa māsāḥ saṃvatsaraḥ saṃvatsaram eva tatpūrvasmai ṣaḍahāya pratyudyacchati savīvadhatāyai
- 11
चतुर्विंशतिर्भवन्ति चतुर्विंशतिर् अर्धमासाः संवत्सरः संवत्सरम् एव तत्पूर्वस्मै षडहाय प्रत्युद्यच्छति सवीवधतायै
caturviṃśatirbhavanti caturviṃśatir ardhamāsāḥ saṃvatsaraḥ saṃvatsaram eva tatpūrvasmai ṣaḍahāya pratyudyacchati savīvadhatāyai
- 12
दृत ऐन्द्रोत इति होवाचाभिप्रतारी काक्षसेनिर्ये महावृक्षस्याग्रं गच्छन्ति क्व ते ततो भवन्ति प्र राजन्पक्षिणः पतन्त्य् अवापक्षाः पद्यन्ते
dṛta aindrota iti hovācābhipratārī kākṣasenirye mahāvṛkṣasyāgraṃ gacchanti kva te tato bhavanti pra rājanpakṣiṇaḥ patanty avāpakṣāḥ padyante
- 13
ये वै विद्वांसस्ते पक्षिणो ये ऽविद्वांसस्ते ऽपक्षास्त्रिवृत्पञ्चदशाव् एव स्तोमौ पक्षौ कृत्वा स्वर्गं लोकं प्रयन्ति
ye vai vidvāṃsaste pakṣiṇo ye 'vidvāṃsaste 'pakṣāstrivṛtpañcadaśāv eva stomau pakṣau kṛtvā svargaṃ lokaṃ prayanti
- 14
चतुर्विंश एव स्तोमो भवति तेजसे ब्रह्मवर्चसाय
caturviṃśa eva stomo bhavati tejase brahmavarcasāya

