25 shlokas
- 1
वृषा पवस्व धारयेति गायत्री भवत्यह्नो धृत्यै
vṛṣā pavasva dhārayeti gāyatrī bhavatyahno dhṛtyai
- 2
वृषण्वत्यस्त्रिष्टुभो रूपेण त्रैष्टुभं ह्येतद् अहः
vṛṣaṇvatyastriṣṭubho rūpeṇa traiṣṭubhaṃ hyetad ahaḥ
- 3
पुनानः सोम धारयेति धृत्यै
punānaḥ soma dhārayeti dhṛtyai
- 4
प्रो अयासीद् इन्दुर् इन्द्रस्य निष्कृतम् इति प्रवत्यो भवन्ति प्रणिनीषेण्यम् इव ह्येतद् अहः
pro ayāsīd indur indrasya niṣkṛtam iti pravatyo bhavanti praṇinīṣeṇyam iva hyetad ahaḥ
- 5
जगत्यः सत्यस्त्रिष्टुभो रूपेण तस्मात्त्रिष्टुभां लोके क्रियन्ते
jagatyaḥ satyastriṣṭubho rūpeṇa tasmāttriṣṭubhāṃ loke kriyante
- 6
गायत्रं भवति यद् एव गायत्रस्य ब्राह्मणम्
gāyatraṃ bhavati yad eva gāyatrasya brāhmaṇam
- 7
संतनि भवति सप्तमस्याह्नः सन्तत्यै
saṃtani bhavati saptamasyāhnaḥ santatyai
- 8
यथा वै व्योकसौ विप्रद्रवत एवम् एते षष्ठं चाहः सप्तमं च विप्रद्रवतस्तौ यथा समानीय संयुज्याद् एवम् एवैते एतेन साम्ना संयुनक्ति
yathā vai vyokasau vipradravata evam ete ṣaṣṭhaṃ cāhaḥ saptamaṃ ca vipradravatastau yathā samānīya saṃyujyād evam evaite etena sāmnā saṃyunakti
- 9
सौपर्णं भवति स्वर्गस्य लोकस्य समष्ट्यै
sauparṇaṃ bhavati svargasya lokasya samaṣṭyai
- 10
यज्ञो वै देवेभ्यो ऽपाक्रामत्स सुपर्णरूपं कृत्वाचरत्तं देवा एतैः सामभिरारभन्त यज्ञ इव वा एष यच्छन्दोमा यज्ञस्यैवैष आरम्भः
yajño vai devebhyo 'pākrāmatsa suparṇarūpaṃ kṛtvācarattaṃ devā etaiḥ sāmabhirārabhanta yajña iva vā eṣa yacchandomā yajñasyaivaiṣa ārambhaḥ
- 11
रोहितकूलीयं भवत्य् आजिजित्यायै
rohitakūlīyaṃ bhavaty ājijityāyai
- 12
एतेन वै विश्वामित्रो रोहिताभ्यां रोहितकूल आजिम् अजयत्
etena vai viśvāmitro rohitābhyāṃ rohitakūla ājim ajayat
- 13
विश्वामित्रो भरतानाम् अनस्वत्यायात्सो ऽदन्तिभिर्नाम जनतयांशं प्रास्यतेमां मां यूयं वस्निकां जयाथेमानि मह्यं यूयं पूरयाथ यदीमाविदं रोहितावश्माचितं कूलम् उद्वहात इति स एते सामनी अपश्यत्ताभ्यां युक्त्वा प्रासेधत्स उदजयत्
viśvāmitro bharatānām anasvatyāyātso 'dantibhirnāma janatayāṃśaṃ prāsyatemāṃ māṃ yūyaṃ vasnikāṃ jayāthemāni mahyaṃ yūyaṃ pūrayātha yadīmāvidaṃ rohitāvaśmācitaṃ kūlam udvahāta iti sa ete sāmanī apaśyattābhyāṃ yuktvā prāsedhatsa udajayat
- 14
आजिर्वा एष प्रततो यद्द्वादशाहस्तस्यैते उज्जित्यै
ājirvā eṣa pratato yaddvādaśāhastasyaite ujjityai
- 15
कण्वरथन्तरं भवति
kaṇvarathantaraṃ bhavati
- 16
तेजो वा एतद्रथन्तरस्य यत्कण्वरथन्तरम्सरसम् एव तद्रथन्तरं प्रयुङ्क्ते यत्कण्वरथन्तरेण सप्तमे ऽहनि स्तुवते
tejo vā etadrathantarasya yatkaṇvarathantaramsarasam eva tadrathantaraṃ prayuṅkte yatkaṇvarathantareṇa saptame 'hani stuvate
- 17
जामि द्वादशाहस्यास्तीति ह स्माहोग्रदेवो राजनिर्बार्हतं षष्ठम् अहर्बार्हतं सप्तमं यत्कण्वरथन्तरं भवति तेनाजामि
jāmi dvādaśāhasyāstīti ha smāhogradevo rājanirbārhataṃ ṣaṣṭham aharbārhataṃ saptamaṃ yatkaṇvarathantaraṃ bhavati tenājāmi
- 18
गौङ्गवं भवति
gauṅgavaṃ bhavati
- 19
अग्निर् अकामयतान्नादः स्याम् इति स तपो ऽतप्यत स एतद्गौङ्गवम् अपश्यत्तेनान्नादो ऽभवद्यद् अन्नं वित्वा अगर्दद्यद् अगङ्गूयत्तद्गौङ्गवस्य गौङ्गवत्वम् अन्नाद्यस्यावरुद्ध्यै गौङ्गवं क्रियते
agnir akāmayatānnādaḥ syām iti sa tapo 'tapyata sa etadgauṅgavam apaśyattenānnādo 'bhavadyad annaṃ vitvā agardadyad agaṅgūyattadgauṅgavasya gauṅgavatvam annādyasyāvaruddhyai gauṅgavaṃ kriyate
- 20
यत्साम देवताः प्रशंसति तेन यजमानाः सत्याशिषः सत्याशिषो ऽसामेति वै सत्त्रम् आसते सत्याशिष एव भवन्ति
yatsāma devatāḥ praśaṃsati tena yajamānāḥ satyāśiṣaḥ satyāśiṣo 'sāmeti vai sattram āsate satyāśiṣa eva bhavanti
- 21
आयास्यं भवति तिरश्चीननिधनं प्रतिष्ठायै
āyāsyaṃ bhavati tiraścīnanidhanaṃ pratiṣṭhāyai
- 22
अयास्यो वा आङ्गिरस आदित्यानां दीक्षितानाम् अन्नम् आश्नात्स व्यभ्रंशत स एतान्य् आयास्यान्य् अपश्यत्तैर् आत्मानं समश्रीणाद्विभ्रष्टम् इव वै सप्तमम् अहर्यद् एतत्साम भवत्य् अहर् एव तेन संश्रीणाति
ayāsyo vā āṅgirasa ādityānāṃ dīkṣitānām annam āśnātsa vyabhraṃśata sa etāny āyāsyāny apaśyattair ātmānaṃ samaśrīṇādvibhraṣṭam iva vai saptamam aharyad etatsāma bhavaty ahar eva tena saṃśrīṇāti
- 23
प्रवद्भर्गवं भवति
pravadbhargavaṃ bhavati
- 24
प्रवता वै देवाः स्वर्गं लोकं प्रायन्नुद्वतोदायन्
pravatā vai devāḥ svargaṃ lokaṃ prāyannudvatodāyan
- 25
निधनान्ताः पवमाना भवन्त्यह्नो धृत्यै स्तोमः
nidhanāntāḥ pavamānā bhavantyahno dhṛtyai stomaḥ

