30 shlokas
- 1
अथ त्रिषु स्नानकालेषु सद्योजातादिसंस्कृतेन भस्मना जपता स्नात्वा जपतैवायतनम् अभिगन्तव्यम्
atha triṣu snānakāleṣu sadyojātādisaṃskṛtena bhasmanā japatā snātvā japataivāyatanam abhigantavyam
- 2
अभिगम्य च यत्पूर्वं जपति तत्प्रत्याहारार्थं जप्यम् ॐ ॐ ॐ
abhigamya ca yatpūrvaṃ japati tatpratyāhārārthaṃ japyam oṃ oṃ oṃ
- 3
हसितादीनि तु कृत्वा यत्पश्चाज्जपति तन्नियमार्थं जप्यम्
hasitādīni tu kṛtvā yatpaścājjapati tanniyamārthaṃ japyam
- 4
तद् अत्र हसितं नाम यद् एतत्कण्ठौष्ठपुटविस्फूर्जनम् अट्टहासः क्रियते तद्धसितम्
tad atra hasitaṃ nāma yad etatkaṇṭhauṣṭhapuṭavisphūrjanam aṭṭahāsaḥ kriyate taddhasitam
- 5
गीतम् अपि गान्धर्वशास्त्रसमयानभिष्वङ्गेण यत्र भगवतो महेश्वरस्य सभायां गौणद्रव्यजकर्मजानि नामानि चिन्त्यन्ते तत्
gītam api gāndharvaśāstrasamayānabhiṣvaṅgeṇa yatra bhagavato maheśvarasya sabhāyāṃ gauṇadravyajakarmajāni nāmāni cintyante tat
- 6
संस्कृतं प्राकृतं परकृतम् आत्मकृतं वा यद्गीयते तद्गेयम्
saṃskṛtaṃ prākṛtaṃ parakṛtam ātmakṛtaṃ vā yadgīyate tadgeyam
- 7
नृत्तम् अपि नाट्यशास्त्रसमयानभिष्वङ्गेण हस्तपादादीनाम् उत्क्षेपणम् अवक्षेपणम् आकुञ्चनं प्रसारणं चलनम् अनवस्थानम्
nṛttam api nāṭyaśāstrasamayānabhiṣvaṅgeṇa hastapādādīnām utkṣepaṇam avakṣepaṇam ākuñcanaṃ prasāraṇaṃ calanam anavasthānam
- 8
निगमकाले नियमार्थं गेयसहकृतं नृत्तं प्रयोक्तव्यम्
nigamakāle niyamārthaṃ geyasahakṛtaṃ nṛttaṃ prayoktavyam
- 9
डुंडुंकारो नाम य एष जिह्वाग्रतालुसंयोगान्निष्पद्यते पुण्यो वृषनादसदृशः सः
ḍuṃḍuṃkāro nāma ya eṣa jihvāgratālusaṃyogānniṣpadyate puṇyo vṛṣanādasadṛśaḥ saḥ
- 10
डुंडुंकरणं डुंडुंकारः
ḍuṃḍuṃkaraṇaṃ ḍuṃḍuṃkāraḥ
- 11
कारशब्दो डुंडुंकारस्योपहाराङ्गावधारणार्थः
kāraśabdo ḍuṃḍuṃkārasyopahārāṅgāvadhāraṇārthaḥ
- 12
नम इति
nama iti
- 13
नाप्य् ओष्ठीयं कर्तव्यं नोपांशु
nāpy oṣṭhīyaṃ kartavyaṃ nopāṃśu
- 14
मानसं तु नमस्करणं नमस्कारः
mānasaṃ tu namaskaraṇaṃ namaskāraḥ
- 15
कारशब्दो वाचिकोपांशुप्रतिषेधार्थं मानसोपहाराङ्गावधारणार्थं चेत्य् अर्थः
kāraśabdo vācikopāṃśupratiṣedhārthaṃ mānasopahārāṅgāvadhāraṇārthaṃ cety arthaḥ
- 16
जप्यं नाम सद्योजातादिष्व् अक्षरपङ्क्त्यां मनसा भावस्य संचारविचारः
japyaṃ nāma sadyojātādiṣv akṣarapaṅktyāṃ manasā bhāvasya saṃcāravicāraḥ
- 17
तज्जप्यम्
tajjapyam
- 18
उपेति विशेषणे क्रियोपसंहारे समस्तत्वे च
upeti viśeṣaṇe kriyopasaṃhāre samastatve ca
- 19
उपहरणाद् उपहारो व्रतं नियम इत्य् अर्थः
upaharaṇād upahāro vrataṃ niyama ity arthaḥ
- 20
उपह्रियते निवेद्यते नियोगमात्रकर्तृत्वात्साधकेनेत्य् उपहारः
upahriyate nivedyate niyogamātrakartṛtvātsādhakenety upahāraḥ
- 21
उपतिष्ठेत्
upatiṣṭhet
- 22
अत्रोपेत्य् अभ्युपगमे
atropety abhyupagame
- 23
अभ्युपगतेन विधिस्थेन प्रणतविनतेनेत्य् अर्थः
abhyupagatena vidhisthena praṇatavinatenety arthaḥ
- 24
तिष्ठेद् इत्य् ऐकाग्र्यं प्रत्याहाराभावस्थितिम् एवाधिकुरुते
tiṣṭhed ity aikāgryaṃ pratyāhārābhāvasthitim evādhikurute
- 25
सर्वकरणानां वृत्तौ प्रत्याहारं कृत्वा कायिकवाचिकमानसिकाभिः क्रियाभिर् उपहारं कृत्वा भृत्यवद् उपहारेण स्थेयम्
sarvakaraṇānāṃ vṛttau pratyāhāraṃ kṛtvā kāyikavācikamānasikābhiḥ kriyābhir upahāraṃ kṛtvā bhṛtyavad upahāreṇa stheyam
- 26
अपसव्यं च प्रदक्षिणम् उपरिष्टाद्वक्ष्यामः
apasavyaṃ ca pradakṣiṇam upariṣṭādvakṣyāmaḥ
- 27
आह कस्य निर्माल्यं धार्यम्
āha kasya nirmālyaṃ dhāryam
- 28
कस्य वा आयतने वस्तव्यम्
kasya vā āyatane vastavyam
- 29
क्व चोपस्थेयम् इति
kva copastheyam iti
- 30
तद् उच्यते
tad ucyate

