29 shlokas
- 1
अत्र भस्म वामद्रव्यं यद् अग्नीन्धनसंयोगान्निष्पन्नम्
atra bhasma vāmadravyaṃ yad agnīndhanasaṃyogānniṣpannam
- 2
तत्परकृतं पार्थिवं भुक्तं दीप्तिमत्
tatparakṛtaṃ pārthivaṃ bhuktaṃ dīptimat
- 3
ग्रामादिभ्यो भैक्ष्यवद्भस्मार्जनं कर्तव्यम्
grāmādibhyo bhaikṣyavadbhasmārjanaṃ kartavyam
- 4
स्नानशयनानुस्नानकृत्यबन्धुत्वान्निष्परिग्रहत्वाद् अहिंसकत्वाद् उत्कृष्टम् एव शुचि प्रभूतं ग्राह्यं साधनत्वात्
snānaśayanānusnānakṛtyabandhutvānniṣparigrahatvād ahiṃsakatvād utkṛṣṭam eva śuci prabhūtaṃ grāhyaṃ sādhanatvāt
- 5
अलाभे स्वल्पम् अपि ग्राह्यम्
alābhe svalpam api grāhyam
- 6
आधारो ऽप्य् अलाबुचर्मवस्त्रादिर् अत्र प्रसिद्धः
ādhāro 'py alābucarmavastrādir atra prasiddhaḥ
- 7
आह किं तेन भस्मना कर्तव्यम्
āha kiṃ tena bhasmanā kartavyam
- 8
तद् उच्यते भस्मनेति तृतीया करणार्थे कर्तुः क्रियाम् आदिशति यथा वाश्या तक्षणं बुद्ध्या पिधानम्
tad ucyate bhasmaneti tṛtīyā karaṇārthe kartuḥ kriyām ādiśati yathā vāśyā takṣaṇaṃ buddhyā pidhānam
- 9
आह अथ कस्मिन्काले सा क्रिया कर्तव्येति
āha atha kasminkāle sā kriyā kartavyeti
- 10
त्रिषवणम् इति
triṣavaṇam iti
- 11
द्विगुः समासः
dviguḥ samāsaḥ
- 12
त्रीणीति संख्या
trīṇīti saṃkhyā
- 13
सवनम् इति कालनिर्देशः
savanam iti kālanirdeśaḥ
- 14
पूर्वसंध्या मध्याह्नसंध्या अपरसंध्येति संध्यात्रयम्
pūrvasaṃdhyā madhyāhnasaṃdhyā aparasaṃdhyeti saṃdhyātrayam
- 15
त्रिषवणं त्रिसंध्यं त्रिकालम् इत्य् अर्थः
triṣavaṇaṃ trisaṃdhyaṃ trikālam ity arthaḥ
- 16
आह त्रिषवणं किम् अनेन कर्तव्यम्
āha triṣavaṇaṃ kim anena kartavyam
- 17
तद् उच्यते स्नायीत
tad ucyate snāyīta
- 18
अत्र स्नानं शौचकार्येण शरीरेष्व् आगन्तुकानां स्नेहत्वग्लेपमलगन्धादीनां भस्मनापकर्षणं कर्तव्यम्
atra snānaṃ śaucakāryeṇa śarīreṣv āgantukānāṃ snehatvaglepamalagandhādīnāṃ bhasmanāpakarṣaṇaṃ kartavyam
- 19
स्नानं तु भस्मद्रव्यगात्रसंयोजनम्
snānaṃ tu bhasmadravyagātrasaṃyojanam
- 20
परमार्थतस्तु स्नानादि पुण्यफलसंयोगधर्मात्मवचनाद् आत्मशौचम् एवैतत्
paramārthatastu snānādi puṇyaphalasaṃyogadharmātmavacanād ātmaśaucam evaitat
- 21
केवलं स्नानाद्यकलुषापहतपाप्मादिवचनात्कार्यकरणव्यपदेशेनात्मशौचं व्याख्यायते
kevalaṃ snānādyakaluṣāpahatapāpmādivacanātkāryakaraṇavyapadeśenātmaśaucaṃ vyākhyāyate
- 22
इत इत्य् एतद् आज्ञायां नियोगे च
ita ity etad ājñāyāṃ niyoge ca
- 23
नियोगत्वान्निगतं नियतत्वान्निगम इत्य् अर्थः
niyogatvānnigataṃ niyatatvānnigama ity arthaḥ
- 24
कस्मात्
kasmāt
- 25
प्रतितन्त्रसिद्धत्वाद् अहिंसकत्वान्निःश्रेयसहेतुत्वाच्च
pratitantrasiddhatvād ahiṃsakatvānniḥśreyasahetutvācca
- 26
भस्मना स्नेयं न चाद्भिर्विपरीतत्वाद् इत्य् अर्थः
bhasmanā sneyaṃ na cādbhirviparītatvād ity arthaḥ
- 27
किं स्नानम् एवैवं भस्मना कर्तव्यम्
kiṃ snānam evaivaṃ bhasmanā kartavyam
- 28
उच्यते
ucyate
- 29
यस्माद् आह
yasmād āha

