91 shlokas
- 1
पाणिपीडनविधेर् अनन्तरं शैलराजदुहितुर्हरं प्रति
भावसाध्वसपरिग्रहाद् अभूत्कामदोहदमनोहरं वपुः
pāṇipīḍanavidher anantaraṃ śailarājaduhiturharaṃ prati
bhāvasādhvasaparigrahād abhūtkāmadohadamanoharaṃ vapuḥ
- 2
व्याहृता प्रतिवचो न संदधे गन्तुम् ऐच्छद् अवलम्बितांशुका
सेवते स्म शयनं पराङ्मुखी सा तथापि रतये पिनाकिनः
vyāhṛtā prativaco na saṃdadhe gantum aicchad avalambitāṃśukā
sevate sma śayanaṃ parāṅmukhī sā tathāpi rataye pinākinaḥ
- 3
कैतवेन शयिते कुतूहलात्पार्वती प्रतिमुखं निपातितम्
चक्षुर् उन्मिषति सस्मितं प्रिये विद्युदाहतम् इव न्यमीलयत्
kaitavena śayite kutūhalātpārvatī pratimukhaṃ nipātitam
cakṣur unmiṣati sasmitaṃ priye vidyudāhatam iva nyamīlayat
- 4
नाभिदेशनिहितः सकम्पया शङ्करस्य रुरुधे तया करः
तद्दुकूलम् अथ चाभवत्स्वयं दूरम् उच्छ्वसितनीविबन्धनम्
nābhideśanihitaḥ sakampayā śaṅkarasya rurudhe tayā karaḥ
taddukūlam atha cābhavatsvayaṃ dūram ucchvasitanīvibandhanam
- 5
एवम् आलि निगृहीतसाध्वसं शङ्करो रहसि सेव्यताम् इति
सा सखीभिर् उपदिष्टम् आकुला नास्मरत्प्रमुखवर्तिनि प्रिये
evam āli nigṛhītasādhvasaṃ śaṅkaro rahasi sevyatām iti
sā sakhībhir upadiṣṭam ākulā nāsmaratpramukhavartini priye
- 6
अप्य् अवस्तुनि कथाप्रवृत्तये प्रश्नतत्परम् अनङ्गशासनम्
वीक्षितेन परिगृह्य पार्वती मूर्धकम्पमयम् उत्तरं ददौ
apy avastuni kathāpravṛttaye praśnatatparam anaṅgaśāsanam
vīkṣitena parigṛhya pārvatī mūrdhakampamayam uttaraṃ dadau
- 7
शूलिनः करतलद्वयेन सा संनिरुध्य नयने हृतांशुका
तस्य पश्यति ललाटलोचने मोघयत्नविधुरा रहस्य् अभूत्
śūlinaḥ karataladvayena sā saṃnirudhya nayane hṛtāṃśukā
tasya paśyati lalāṭalocane moghayatnavidhurā rahasy abhūt
- 8
चुम्बनेष्व् अधरदानवर्जितं सन्नहस्तम् अदयोपगूहने
क्लिष्टमन्मथम् अपि प्रियं प्रभोर्दुर्लभप्रतिकृतं वधूरतम्
cumbaneṣv adharadānavarjitaṃ sannahastam adayopagūhane
kliṣṭamanmatham api priyaṃ prabhordurlabhapratikṛtaṃ vadhūratam
- 9
यन्मुखग्रहणम् अक्षताधरं दत्तम् अव्रणपदं नखं च यत्
यद्रतं च सदयं प्रियस्य तत्पार्वती विषहते स्म नेतरत्
yanmukhagrahaṇam akṣatādharaṃ dattam avraṇapadaṃ nakhaṃ ca yat
yadrataṃ ca sadayaṃ priyasya tatpārvatī viṣahate sma netarat
- 10
रात्रिवृत्तम् अनुयोक्तुम् उद्यतं सा विभातसमये सखीजनम्
नाकरोद् अपकुतूहलं ह्रिया शंसितुं च हृदयेन तत्वरे
rātrivṛttam anuyoktum udyataṃ sā vibhātasamaye sakhījanam
nākarod apakutūhalaṃ hriyā śaṃsituṃ ca hṛdayena tatvare
- 11
दर्पणे च परिभोगदर्शिनी पृष्ठतः प्रणयिनो निषेदुषः
प्रेक्ष्य बिम्बम् अनु बिम्बम् आत्मनः कानि कानि न चकार लज्जया
darpaṇe ca paribhogadarśinī pṛṣṭhataḥ praṇayino niṣeduṣaḥ
prekṣya bimbam anu bimbam ātmanaḥ kāni kāni na cakāra lajjayā
- 12
नीलकण्ठपरिभुक्तयौवनां तां विलोक्य जननी समाश्वसत्
भर्तृवल्लभतया हि मानसीं मातुर् अस्यति शुचं वधूजनः
nīlakaṇṭhaparibhuktayauvanāṃ tāṃ vilokya jananī samāśvasat
bhartṛvallabhatayā hi mānasīṃ mātur asyati śucaṃ vadhūjanaḥ
- 13
वासराणि कतिचित्कथञ्चन स्थाणुना रतम् अकारि चानया
ज्ञातमन्मथरसा शनैः शनैः सा मुमोच रतिदुःखशीलताम्
vāsarāṇi katicitkathañcana sthāṇunā ratam akāri cānayā
jñātamanmatharasā śanaiḥ śanaiḥ sā mumoca ratiduḥkhaśīlatām
- 14
सस्वजे प्रियम् उरोनिपीडिता प्रार्थितं मुखम् अनेन नाहरत्
मेखलापणयलोलतां गतं हस्तम् अस्य शिथिलं रुरोध सा
sasvaje priyam uronipīḍitā prārthitaṃ mukham anena nāharat
mekhalāpaṇayalolatāṃ gataṃ hastam asya śithilaṃ rurodha sā
- 15
भावसूचितम् अदृष्टविप्रियं चाटुमत्क्षणवियोगकातरम्
कैश्चिद् एव दिवसैस्तदा तयोः प्रेम रूढम् इतरेतराश्रयम्
bhāvasūcitam adṛṣṭavipriyaṃ cāṭumatkṣaṇaviyogakātaram
kaiścid eva divasaistadā tayoḥ prema rūḍham itaretarāśrayam
- 16
तं यथात्मसदृशं वरं वधूर् अन्वरज्यत वरस्तथैव ताम्
सागराद् अनपगा हि जाह्नवी सो ऽपि तन्मुखरसैकनिर्वृतिः
taṃ yathātmasadṛśaṃ varaṃ vadhūr anvarajyata varastathaiva tām
sāgarād anapagā hi jāhnavī so 'pi tanmukharasaikanirvṛtiḥ
- 17
शिष्यतां निधुवनोपदेशिनः शङ्करस्य रहसि प्रपन्नया
शिक्षितं युवतिनैपुणं तया यत्तद् एव गुरुदक्षिणीकृतम्
śiṣyatāṃ nidhuvanopadeśinaḥ śaṅkarasya rahasi prapannayā
śikṣitaṃ yuvatinaipuṇaṃ tayā yattad eva gurudakṣiṇīkṛtam
- 18
दष्टमुक्तम् अधरोष्ठम् आम्बिका वेदनाविधुतहस्तपल्लवा
शीतलेन निरवापयत्क्षणं मौलिचन्द्रशकलेन शूलिनः
daṣṭamuktam adharoṣṭham āmbikā vedanāvidhutahastapallavā
śītalena niravāpayatkṣaṇaṃ maulicandraśakalena śūlinaḥ
- 19
चुम्बनादलकचूर्णदूषितं शङ्करो ऽपि नयनं ललाटजम्
उच्छ्वसत्कमलगन्धये ददौ पार्वतीवदनगन्धवाहिने
cumbanādalakacūrṇadūṣitaṃ śaṅkaro 'pi nayanaṃ lalāṭajam
ucchvasatkamalagandhaye dadau pārvatīvadanagandhavāhine
- 20
एवम् इन्द्रियसुखस्य वर्त्मनः सेवनाद् अनुगृहीतमन्मथः
शैलराजभवने सहोमया मासमात्रम् अवसद्वृषध्वजः
evam indriyasukhasya vartmanaḥ sevanād anugṛhītamanmathaḥ
śailarājabhavane sahomayā māsamātram avasadvṛṣadhvajaḥ
- 21
सो ऽनुमान्य हिमवन्तम् आत्मभूर् आत्मजाविरहदुःखखेदितम्
तत्र तत्र विजहार संपतन्न् अप्रमेयगतिना ककुद्मता
so 'numānya himavantam ātmabhūr ātmajāvirahaduḥkhakheditam
tatra tatra vijahāra saṃpatann aprameyagatinā kakudmatā
- 22
मेरुम् एत्य मरुदाशुगोक्षकः पार्वतीस्तनपुरस्कृतान्कृती
हेमपल्लवविभङ्गसंस्तरान् अन्वभूत्सुरतमर्दनक्षमान्
merum etya marudāśugokṣakaḥ pārvatīstanapuraskṛtānkṛtī
hemapallavavibhaṅgasaṃstarān anvabhūtsuratamardanakṣamān
- 23
पद्मनाभचरणाङ्किताश्मसु प्राप्तवत्स्व् अमृतविप्रुषो नवाः
मन्दरस्य कटकेषु चावसत्पार्वतीवदनपद्मषट्पदः
padmanābhacaraṇāṅkitāśmasu prāptavatsv amṛtavipruṣo navāḥ
mandarasya kaṭakeṣu cāvasatpārvatīvadanapadmaṣaṭpadaḥ
- 24
वारणध्वनितभीतया तया कण्ठसक्तघनबाहुबन्धनः
एकपिङ्गलगिरौ जगद्गुरुर्निर्विवेश विशदाः शशिप्रभाः
vāraṇadhvanitabhītayā tayā kaṇṭhasaktaghanabāhubandhanaḥ
ekapiṅgalagirau jagadgururnirviveśa viśadāḥ śaśiprabhāḥ
- 25
तस्य जातु मलयस्थलीरते धूतचन्दनलतः प्रियाक्लमम्
आचचाम सलवङ्गकेसरश्चाटुकार इव दक्षिणानिलः
tasya jātu malayasthalīrate dhūtacandanalataḥ priyāklamam
ācacāma salavaṅgakesaraścāṭukāra iva dakṣiṇānilaḥ
- 26
हेमतामरसताडितप्रिया तत्कराम्बुविनिमीलितेक्षणा
खे व्यगाहत तरङ्गिणीम् उमा मीनपङ्क्तिपुनरुक्तमेखला
hematāmarasatāḍitapriyā tatkarāmbuvinimīlitekṣaṇā
khe vyagāhata taraṅgiṇīm umā mīnapaṅktipunaruktamekhalā
- 27
तां पुलोमतनयालकोचितैः पारिजातकुसुमैः प्रसाधयन्
नन्दने चिरम् अयुग्मलोचनः सस्पृहं सुरवधूभिर् ईक्षितः
tāṃ pulomatanayālakocitaiḥ pārijātakusumaiḥ prasādhayan
nandane ciram ayugmalocanaḥ saspṛhaṃ suravadhūbhir īkṣitaḥ
- 28
इत्य् अभौमम् अनुभूय शङ्करः पार्थिवं च दयितासखः सुखम्
लोहितायति कदाचिद् आतपे गन्धमादनगिरिं व्यगाहत
ity abhaumam anubhūya śaṅkaraḥ pārthivaṃ ca dayitāsakhaḥ sukham
lohitāyati kadācid ātape gandhamādanagiriṃ vyagāhata
- 29
तत्र काञ्चनशिलातलाश्रयो नेत्रगम्यम् अवलोक्य भास्करम्
दक्षिणेतरभुजव्यपाश्रयां व्याजहार सहधर्मचारिणीम्
tatra kāñcanaśilātalāśrayo netragamyam avalokya bhāskaram
dakṣiṇetarabhujavyapāśrayāṃ vyājahāra sahadharmacāriṇīm
- 30
पद्मकान्तिम् अरुणत्रिभागयोः संक्रमय्य तव नेत्रयोर् इव
संक्षये जगद् इव प्रजेश्वरः संहरत्य् अहर् असाव् अहर्पतिः
padmakāntim aruṇatribhāgayoḥ saṃkramayya tava netrayor iva
saṃkṣaye jagad iva prajeśvaraḥ saṃharaty ahar asāv aharpatiḥ

