95 shlokas
- 1
अथ विश्वात्मने गौरी संदिदेश मिथः सखीम्
दाता मे भूभृतां नाथः प्रमाणीक्रियताम् इति
atha viśvātmane gaurī saṃdideśa mithaḥ sakhīm
dātā me bhūbhṛtāṃ nāthaḥ pramāṇīkriyatām iti
- 2
तया व्याहृतसंदेशा सा बभौ निभृता प्रिये
चूतयष्टिर् इवाभ्याष्ये मधौ परभृतामुखी
tayā vyāhṛtasaṃdeśā sā babhau nibhṛtā priye
cūtayaṣṭir ivābhyāṣye madhau parabhṛtāmukhī
- 3
स तथेति प्रतिज्ञाय विसृज्य कथमप्युमाम्
ऋषीञ्ज्योतिर्मयान्सप्त सस्मार स्मरशासनः
sa tatheti pratijñāya visṛjya kathamapyumām
ṛṣīñjyotirmayānsapta sasmāra smaraśāsanaḥ
- 4
ते प्रभामण्डलैर्व्योम द्योतयन्तस्तपोधनाः
सारुन्धतीकाः सपदि प्रादुरासन्पुरः प्रभोः
te prabhāmaṇḍalairvyoma dyotayantastapodhanāḥ
sārundhatīkāḥ sapadi prādurāsanpuraḥ prabhoḥ
- 5
आप्लुतास्तीरमन्दारकुसुमोत्किरवीचिषु
आकाशगङ्गास्रोतस्सु दिङ्नागमदगन्धिषु
āplutāstīramandārakusumotkiravīciṣu
ākāśagaṅgāsrotassu diṅnāgamadagandhiṣu
- 6
मुक्तायज्ञोपवीतानि बिभ्रतो हैमवल्कलाः
रत्नाक्षसूत्राः प्रव्रज्यां कल्पवृक्षा इवाश्रिताः
muktāyajñopavītāni bibhrato haimavalkalāḥ
ratnākṣasūtrāḥ pravrajyāṃ kalpavṛkṣā ivāśritāḥ
- 7
अधःप्रवर्तिताश्वेन समावर्जितकेतुना
सहस्ररश्मिना शश्वत्सप्रमाणम् उदीक्षिताः
adhaḥpravartitāśvena samāvarjitaketunā
sahasraraśminā śaśvatsapramāṇam udīkṣitāḥ
- 8
आसक्तबाहुलतया सार्धम् उद्धृतया भुवा
महावराहदंष्ट्रायां विश्रान्ताः प्रलयापदि
āsaktabāhulatayā sārdham uddhṛtayā bhuvā
mahāvarāhadaṃṣṭrāyāṃ viśrāntāḥ pralayāpadi
- 9
सर्गशेषप्रणयनाद्विश्वयोनेर् अनन्तरम्
पुरातनाः पुराविद्भिर्धातार इति कीर्तिताः
sargaśeṣapraṇayanādviśvayoner anantaram
purātanāḥ purāvidbhirdhātāra iti kīrtitāḥ
- 10
प्राक्तनानां विशुद्धानां परिपाकम् उपेयुषाम्
तपसाम् उपभुञ्जानाः फलान्य् अपि तपस्विनः
prāktanānāṃ viśuddhānāṃ paripākam upeyuṣām
tapasām upabhuñjānāḥ phalāny api tapasvinaḥ
- 11
तेषां मध्यगता साध्वी पत्युः पादार्पितेक्षणा
साक्षाद् इव तपःसिद्धिर्बभासे बह्व् अरुन्धती
teṣāṃ madhyagatā sādhvī patyuḥ pādārpitekṣaṇā
sākṣād iva tapaḥsiddhirbabhāse bahv arundhatī
- 12
ताम् अगौरवभेदेन मुनींश्चापश्यद् ईश्वरः
स्त्री पुमान् इत्य् अनास्थैषा वृत्तं हि महितं सताम्
tām agauravabhedena munīṃścāpaśyad īśvaraḥ
strī pumān ity anāsthaiṣā vṛttaṃ hi mahitaṃ satām
- 13
तद्दर्शनाद् अभूच्छंभोर्भूयान्दारार्थम् आदरः
क्रियाणां खलु धर्म्याणां सत्पत्न्यो मूलसाधनम्
taddarśanād abhūcchaṃbhorbhūyāndārārtham ādaraḥ
kriyāṇāṃ khalu dharmyāṇāṃ satpatnyo mūlasādhanam
- 14
धर्मेणापि पदं शर्वे कारिते पार्वतीं प्रति
पूर्वापराधभीतस्य कामस्योच्छ्वासितं मनः
dharmeṇāpi padaṃ śarve kārite pārvatīṃ prati
pūrvāparādhabhītasya kāmasyocchvāsitaṃ manaḥ
- 15
अथ ते मुनयः सर्वे मानयित्वा जगद्गुरुम्
इदम् ऊचुर् अनूचानाः प्रीतिकण्टकितत्वचः
atha te munayaḥ sarve mānayitvā jagadgurum
idam ūcur anūcānāḥ prītikaṇṭakitatvacaḥ
- 16
यद्ब्रह्म सम्यग् आम्नातं यद् अग्नौ विधिना हुतम्
यच्च तप्तं तपस्तस्य विपक्वं फलम् अद्य नः
yadbrahma samyag āmnātaṃ yad agnau vidhinā hutam
yacca taptaṃ tapastasya vipakvaṃ phalam adya naḥ
- 17
यद् अध्यक्षेण जगतां वयम् आरोपितास्त्वया
मनोरथस्याविषयं मनोविषयम् आत्मनः
yad adhyakṣeṇa jagatāṃ vayam āropitāstvayā
manorathasyāviṣayaṃ manoviṣayam ātmanaḥ
- 18
यस्य चेतसि वर्तेथाः स तावत्कृतिनां वरः
किं पुनर्ब्रह्मयोनेर्यस्तव चेतसि वर्तते
yasya cetasi vartethāḥ sa tāvatkṛtināṃ varaḥ
kiṃ punarbrahmayoneryastava cetasi vartate
- 19
सत्यम् अर्काच्च सोमाच्च परम् अध्यास्महे पदम्
अद्य तूच्चैस्तरं तस्मात्स्मरणानुग्रहात्तव
satyam arkācca somācca param adhyāsmahe padam
adya tūccaistaraṃ tasmātsmaraṇānugrahāttava
- 20
त्वत्संभावितम् आत्मानं बहु मन्यामहे वयम्
प्रायः प्रत्ययम् आधत्ते स्वगुणेषूत्तमादरः
tvatsaṃbhāvitam ātmānaṃ bahu manyāmahe vayam
prāyaḥ pratyayam ādhatte svaguṇeṣūttamādaraḥ
- 21
या नः प्रीतिर्विरूपाक्ष त्वदनुध्यानसंभवा
सा किम् आवेद्यते तुभ्यम् अन्तरात्मासि देहिनाम्
yā naḥ prītirvirūpākṣa tvadanudhyānasaṃbhavā
sā kim āvedyate tubhyam antarātmāsi dehinām
- 22
साक्षाद्दृष्टो ऽसि न पुनर्विद्मस्त्वां वयम् अञ्जसा
प्रसीद कथयात्मानं न धियां पथि वर्तसे
sākṣāddṛṣṭo 'si na punarvidmastvāṃ vayam añjasā
prasīda kathayātmānaṃ na dhiyāṃ pathi vartase
- 23
किं येन सृजसि व्यक्तम् उत येन बिभर्षि तत्
अथ विश्वस्य संहर्ता भागः कतम एष ते
kiṃ yena sṛjasi vyaktam uta yena bibharṣi tat
atha viśvasya saṃhartā bhāgaḥ katama eṣa te
- 24
अथवा सुमहत्य् एषा प्रार्थना देव तिष्ठतु
चिन्तितोपस्थितांस्तावच्छाधि नः करवाम किम्
athavā sumahaty eṣā prārthanā deva tiṣṭhatu
cintitopasthitāṃstāvacchādhi naḥ karavāma kim
- 25
अथ मौलिगतस्येन्दोर्विशदैर्दशनांशुभिः
उपचिन्वन्प्रभां तन्वीं प्रत्याह परमेश्वरः
atha mauligatasyendorviśadairdaśanāṃśubhiḥ
upacinvanprabhāṃ tanvīṃ pratyāha parameśvaraḥ
- 26
विदितं वो यथा स्वार्था न मे काश्चित्प्रवृत्तयः
ननु मूर्तिभिर् अष्टाभिर् इत्थंभूतो ऽस्मि सूचितः
viditaṃ vo yathā svārthā na me kāścitpravṛttayaḥ
nanu mūrtibhir aṣṭābhir itthaṃbhūto 'smi sūcitaḥ
- 27
सो ऽहं तृष्णातुरैर्वृष्टिं विद्युत्वान् इव चातकैः
अरिविप्रकृतैर्देवैः प्रसूतिं प्रति याचितः
so 'haṃ tṛṣṇāturairvṛṣṭiṃ vidyutvān iva cātakaiḥ
ariviprakṛtairdevaiḥ prasūtiṃ prati yācitaḥ
- 28
अत आहर्तुम् इच्छामि पार्वतीम् आत्मजन्मने
उत्पत्तये हविर्भोक्तुर्यजमान इवारणिम्
ata āhartum icchāmi pārvatīm ātmajanmane
utpattaye havirbhokturyajamāna ivāraṇim
- 29
ताम् अस्मदर्थे युष्माभिर्याचितव्यो हिमालयः
विक्रियायै न कल्पन्ते संबन्धाः सदनुष्ठिताः
tām asmadarthe yuṣmābhiryācitavyo himālayaḥ
vikriyāyai na kalpante saṃbandhāḥ sadanuṣṭhitāḥ
- 30
उन्नतेन स्थितिमता धुरम् उद्वहता भुवः
तेन योजितसंबन्धं वित्त माम् अप्य् अवञ्चितम्
unnatena sthitimatā dhuram udvahatā bhuvaḥ
tena yojitasaṃbandhaṃ vitta mām apy avañcitam

