95 shlokas
- 1
अथौषधीनाम् अधिपस्य वृद्धौ तिथौ च जामित्रगुणान्वितायाम्
समेतबन्धुर्हिमवान्सुताया विवाहदीक्षाविधिम् अन्वतिष्ठत्
athauṣadhīnām adhipasya vṛddhau tithau ca jāmitraguṇānvitāyām
sametabandhurhimavānsutāyā vivāhadīkṣāvidhim anvatiṣṭhat
- 2
वैवाहिकैः कौतुकसंविधानैर्गृहे गृहे व्यग्रपुरंध्रिवर्गम्
आसीत्पुरं सानुमतो ऽनुरागाद् अन्तःपुरं चैककुलोपमेयम्
vaivāhikaiḥ kautukasaṃvidhānairgṛhe gṛhe vyagrapuraṃdhrivargam
āsītpuraṃ sānumato 'nurāgād antaḥpuraṃ caikakulopameyam
- 3
संतानकाकीर्णमहापथं तच्चीनांशुकैः कल्पितकेतुमालम्
भासा ज्वलत्काञ्चनतोरणानां स्थानान्तरस्वर्ग इवाबभासे
saṃtānakākīrṇamahāpathaṃ taccīnāṃśukaiḥ kalpitaketumālam
bhāsā jvalatkāñcanatoraṇānāṃ sthānāntarasvarga ivābabhāse
- 4
एकैव सत्याम् अपि पुत्रपङ्क्तौ चिरस्य दृष्टेव मृतोत्थितेव
आसन्नपाणिग्रहणेति पित्रोर् उमा विशेषोच्छ्वसितं बभूव
ekaiva satyām api putrapaṅktau cirasya dṛṣṭeva mṛtotthiteva
āsannapāṇigrahaṇeti pitror umā viśeṣocchvasitaṃ babhūva
- 5
अङ्काद्ययाव् अङ्कम् उदीरिताशीः सा मण्डनान्मण्डनम् अन्वभुङ्क्त
संबन्धिभिन्नो ऽपि गिरेः कुलस्य स्नेहस्तदेकायतनं जगाम
aṅkādyayāv aṅkam udīritāśīḥ sā maṇḍanānmaṇḍanam anvabhuṅkta
saṃbandhibhinno 'pi gireḥ kulasya snehastadekāyatanaṃ jagāma
- 6
मैत्रे मुहूर्ते शशलाञ्छनेन योगं गतासूत्तरफल्गुनीषु
तस्याः शरीरे प्रतिकर्म चक्रुर्बन्धुस्त्रियो याः पतिपुत्रवत्यः
maitre muhūrte śaśalāñchanena yogaṃ gatāsūttaraphalgunīṣu
tasyāḥ śarīre pratikarma cakrurbandhustriyo yāḥ patiputravatyaḥ
- 7
सा गौरसिद्धार्थनिवेशवद्भिर्दूर्वाप्रवालैः प्रतिभिन्नरागम्
निर्नाभिकौशेयम् उपात्तबाणम् अभ्यङ्गनेपथ्यम् अलंचकार
sā gaurasiddhārthaniveśavadbhirdūrvāpravālaiḥ pratibhinnarāgam
nirnābhikauśeyam upāttabāṇam abhyaṅganepathyam alaṃcakāra
- 8
बभौ च संपर्कम् उपेत्य बाला नवेन दीक्षाविधिसायकेन
करेण भानोर्बहुलावसाने संधुक्ष्यमाणेव शशाङ्कलेखा
babhau ca saṃparkam upetya bālā navena dīkṣāvidhisāyakena
kareṇa bhānorbahulāvasāne saṃdhukṣyamāṇeva śaśāṅkalekhā
- 9
तां लोध्रकल्केन हृताङ्गतैलाम् आश्यानकालेयकृताङ्गरागाम्
वासो वसानाम् अभिषेकयोग्यं नार्यश्चतुष्काभिमुखं व्यनैषुः
tāṃ lodhrakalkena hṛtāṅgatailām āśyānakāleyakṛtāṅgarāgām
vāso vasānām abhiṣekayogyaṃ nāryaścatuṣkābhimukhaṃ vyanaiṣuḥ
- 10
विन्यस्तवैदूर्यशिलातले ऽस्मिन्न् अविद्धमुक्ताफलभक्तिचित्रे
आवर्जिताष्टापदकुम्भतोयाः सतूर्यम् एनां स्नपयांबभूवुः
vinyastavaidūryaśilātale 'sminn aviddhamuktāphalabhakticitre
āvarjitāṣṭāpadakumbhatoyāḥ satūryam enāṃ snapayāṃbabhūvuḥ
- 11
सा मङ्गलस्नानविशुद्धगात्री गृहीतपत्युद्गमनीयवस्त्रा
निर्वृत्तपर्जन्यजलाभिषेका प्रफुल्लकाशा वसुधेव रेजे
sā maṅgalasnānaviśuddhagātrī gṛhītapatyudgamanīyavastrā
nirvṛttaparjanyajalābhiṣekā praphullakāśā vasudheva reje
- 12
तस्मात्प्रदेशाच्च वितानवन्तं युक्तं मणिस्तम्भचतुष्टयेन
पतिव्रताभिः परिगृह्य निन्ये कॢप्तासनं कौतुकवेदिमध्यम्
tasmātpradeśācca vitānavantaṃ yuktaṃ maṇistambhacatuṣṭayena
pativratābhiḥ parigṛhya ninye kḷptāsanaṃ kautukavedimadhyam
- 13
तां प्राङ्मुखीं तत्र निवेश्य तन्वीं क्षणं व्यलम्बन्त पुरो निषण्णाः
भूतार्थशोभाह्रियमाणनेत्राः प्रसाधने संनिहिते ऽपि नार्यः
tāṃ prāṅmukhīṃ tatra niveśya tanvīṃ kṣaṇaṃ vyalambanta puro niṣaṇṇāḥ
bhūtārthaśobhāhriyamāṇanetrāḥ prasādhane saṃnihite 'pi nāryaḥ
- 14
धूपोष्मणा त्याजितम् आर्द्रभावं केशान्तम् अन्तःकुसुमं तदीयम्
पर्याक्षिपत्काचिद् उदारबन्धं दूर्वावता पाण्डुमधूकदाम्ना
dhūpoṣmaṇā tyājitam ārdrabhāvaṃ keśāntam antaḥkusumaṃ tadīyam
paryākṣipatkācid udārabandhaṃ dūrvāvatā pāṇḍumadhūkadāmnā
- 15
विन्यस्तशुक्लागुरु चक्रुर् अस्या गोरोचनापत्रविभङ्गम् अङ्गम्
सा चक्रवाकाङ्कितसैकतायास्त्रिस्रोतसः कान्तिम् अतीत्य तस्थौ
vinyastaśuklāguru cakrur asyā gorocanāpatravibhaṅgam aṅgam
sā cakravākāṅkitasaikatāyāstrisrotasaḥ kāntim atītya tasthau
- 16
लग्नद्विरेफं परिभूय पद्मं समेघलेखं शशिनश्च बिम्बम्
तदाननश्रीर् अलकैः प्रसिद्धैश्चिछेद सादृश्यकथाप्रसङ्गम्
lagnadvirephaṃ paribhūya padmaṃ sameghalekhaṃ śaśinaśca bimbam
tadānanaśrīr alakaiḥ prasiddhaiścicheda sādṛśyakathāprasaṅgam
- 17
कर्णार्पितो लोध्रकषायरूक्षे गोरोचनाक्षेपनितान्तगौरे
तस्याः कपोले परभागलाभाद्बबन्ध चक्षूंषि यवप्ररोहः
karṇārpito lodhrakaṣāyarūkṣe gorocanākṣepanitāntagaure
tasyāḥ kapole parabhāgalābhādbabandha cakṣūṃṣi yavaprarohaḥ
- 18
रेखाविभक्तश्च विभक्तगात्र्याः किंचिन्मधूच्छिष्टविमृष्टरागः
कामप्य् अभिख्यां स्फुरितैर् अपुष्यद् आसन्नलावण्यफलो ऽधरोष्ठः
rekhāvibhaktaśca vibhaktagātryāḥ kiṃcinmadhūcchiṣṭavimṛṣṭarāgaḥ
kāmapy abhikhyāṃ sphuritair apuṣyad āsannalāvaṇyaphalo 'dharoṣṭhaḥ
- 19
पत्युः शिरश्चन्द्रकलाम् अनेन स्पृशेति सख्या परिहासपूर्वम्
सा रञ्जयित्वा चरणौ कृताशीर्माल्येन तां निर्वचनं जघान
patyuḥ śiraścandrakalām anena spṛśeti sakhyā parihāsapūrvam
sā rañjayitvā caraṇau kṛtāśīrmālyena tāṃ nirvacanaṃ jaghāna
- 20
तस्याः सुजातोत्पलपत्रकान्ते प्रसाधिकाभिर्नयने निरीक्ष्य
न चक्षुषोः कान्तिविशेषबुद्ध्या कालाञ्जनं मङ्गलम् इत्य् उपात्तम्
tasyāḥ sujātotpalapatrakānte prasādhikābhirnayane nirīkṣya
na cakṣuṣoḥ kāntiviśeṣabuddhyā kālāñjanaṃ maṅgalam ity upāttam
- 21
सा सम्भवद्भिः कुसुमैर्लतेव ज्योतिर्भिर् उद्यद्भिर् इव त्रियामा
सरिद्विहङ्गैर् इव लीयमानैर् आमुच्यमानाभरणा चकाशे
sā sambhavadbhiḥ kusumairlateva jyotirbhir udyadbhir iva triyāmā
saridvihaṅgair iva līyamānair āmucyamānābharaṇā cakāśe
- 22
आत्मानम् आलोक्य च शोभमानम् आदर्शबिम्बे स्तिमितायताक्षी
हरोपयाने त्वरिता बभूव स्त्रीणां प्रियालोकफलो हि वेषः
ātmānam ālokya ca śobhamānam ādarśabimbe stimitāyatākṣī
haropayāne tvaritā babhūva strīṇāṃ priyālokaphalo hi veṣaḥ
- 23
अथाङ्गुलिभ्यां हरितालम् आर्द्रं माङ्गल्यम् आदाय मनःशिलां च
कर्णावसक्तामलदन्तपत्रं माता तदीयं मुखम् उन्नमय्य
athāṅgulibhyāṃ haritālam ārdraṃ māṅgalyam ādāya manaḥśilāṃ ca
karṇāvasaktāmaladantapatraṃ mātā tadīyaṃ mukham unnamayya
- 24
उमास्तनोद्भेदम् अनुप्रवृद्धो मनोरथो यः प्रथमो बभूव
तम् एव मेना दुहितुः कथंचिद्विवाहदीक्षातिलकं चकार
umāstanodbhedam anupravṛddho manoratho yaḥ prathamo babhūva
tam eva menā duhituḥ kathaṃcidvivāhadīkṣātilakaṃ cakāra
- 25
बबन्ध चास्राकुलदृष्टिर् अस्याः स्थानान्तरे कल्पितसंनिवेशम्
धात्र्यङ्गुलीभिः प्रतिसार्यमाणम् ऊर्णमयं कौतुकहस्तसूत्रम्
babandha cāsrākuladṛṣṭir asyāḥ sthānāntare kalpitasaṃniveśam
dhātryaṅgulībhiḥ pratisāryamāṇam ūrṇamayaṃ kautukahastasūtram
- 26
क्षीरोदवेलेव सफेनपुञ्जा पर्याप्तचन्द्रेव शरत्त्रियामा
नवं नवक्षौमनिवासिनी सा भूयो बभौ दर्पणम् आदधाना
kṣīrodaveleva saphenapuñjā paryāptacandreva śarattriyāmā
navaṃ navakṣaumanivāsinī sā bhūyo babhau darpaṇam ādadhānā
- 27
ताम् अर्चिताभ्यः कुलदेवताभ्यः कुलप्रतिष्ठां प्रणमय्य माता
अकारयत्कारयितव्यदक्षा क्रमेण पादग्रहणं सतीनाम्
tām arcitābhyaḥ kuladevatābhyaḥ kulapratiṣṭhāṃ praṇamayya mātā
akārayatkārayitavyadakṣā krameṇa pādagrahaṇaṃ satīnām
- 28
अखण्डितं प्रेम लभस्व पत्युर् इत्य् उच्यते ताभिर् उमा स्म नम्रा
तया तु तस्यार्धशरीरभाजा पश्चात्कृताः स्निग्धजनाशिषो ऽपि
akhaṇḍitaṃ prema labhasva patyur ity ucyate tābhir umā sma namrā
tayā tu tasyārdhaśarīrabhājā paścātkṛtāḥ snigdhajanāśiṣo 'pi
- 29
इच्छाविभूत्योर् अनुरूपम् अद्रिस्तस्याः कृती कृत्यम् अशेषयित्वा
सभ्यः सभायां सुहृदास्थितायां तस्थौ वृषाङ्कागमनप्रतीक्षः
icchāvibhūtyor anurūpam adristasyāḥ kṛtī kṛtyam aśeṣayitvā
sabhyaḥ sabhāyāṃ suhṛdāsthitāyāṃ tasthau vṛṣāṅkāgamanapratīkṣaḥ
- 30
तावद्वरस्यापि कुबेरशैले तत्पूर्वपाणिग्रहणानुरूपम्
प्रसाधनं मातृभिर् आदृताभिर्न्यस्तं पुरस्तात्पुरशासनस्य
tāvadvarasyāpi kuberaśaile tatpūrvapāṇigrahaṇānurūpam
prasādhanaṃ mātṛbhir ādṛtābhirnyastaṃ purastātpuraśāsanasya

