30 shlokas
- 1
अथातो दीक्षा
athāto dīkṣā
- 2
कस्य स्विद्धेतोर्दीक्षित इत्याचक्षते
kasya sviddhetordīkṣita ityācakṣate
- 3
श्रेष्ठां धियं क्षियतीति
śreṣṭhāṃ dhiyaṃ kṣiyatīti
- 4
तं वा एतं धीक्षितं सन्तं दीक्षित इत्य् आचक्षते परोक्षेण
taṃ vā etaṃ dhīkṣitaṃ santaṃ dīkṣita ity ācakṣate parokṣeṇa
- 5
परोक्षप्रिया इव हि देवा भवन्ति प्रत्यक्षद्विषः
parokṣapriyā iva hi devā bhavanti pratyakṣadviṣaḥ
- 6
कस्य स्विद्धेतोर्दीक्षितो ऽप्रत्युत्थायिको भवत्य् अनभिवादुकः प्रत्युत्थेयो ऽभिवाद्यः
kasya sviddhetordīkṣito 'pratyutthāyiko bhavaty anabhivādukaḥ pratyuttheyo 'bhivādyaḥ
- 7
ये प्रत्युत्थेया अभिवाद्यास्त एनम् आविष्टा भवन्त्य् अथर्वाङ्गिरसः
ye pratyuttheyā abhivādyāsta enam āviṣṭā bhavanty atharvāṅgirasaḥ
- 8
तस्य किम् आथर्वणम् इति
tasya kim ātharvaṇam iti
- 9
यद् आत्मन्य् एव जुह्वति न परस्मिन्
yad ātmany eva juhvati na parasmin
- 10
एवं हाथर्वणानाम् ओदनसवानाम् आत्मन्य् एव जुह्वति न परस्मिन्
evaṃ hātharvaṇānām odanasavānām ātmany eva juhvati na parasmin
- 11
अथास्य किम् आङ्गिरसम् इति
athāsya kim āṅgirasam iti
- 12
यद् आत्मनश्च परेषां च नामानि न गृह्णात्य् एवं ह तस्मिन्नासाद् आत्मनश्चैव परेषां च नामानि न गृह्यन्ते
yad ātmanaśca pareṣāṃ ca nāmāni na gṛhṇāty evaṃ ha tasminnāsād ātmanaścaiva pareṣāṃ ca nāmāni na gṛhyante
- 13
विचक्षणवतीं वाचं भाषन्ते चनसितवतीम्
vicakṣaṇavatīṃ vācaṃ bhāṣante canasitavatīm
- 14
विचक्षयन्ति ब्राह्मणं चनसयन्ति प्राजापत्यम्
vicakṣayanti brāhmaṇaṃ canasayanti prājāpatyam
- 15
सैषा व्रतधुग् अथर्वाङ्गिरसः
saiṣā vratadhug atharvāṅgirasaḥ
- 16
तां ह्य् अन्वायत्ताः
tāṃ hy anvāyattāḥ
- 17
कस्य स्विद्धेतोर्दीक्षितो ऽनाश्यन्नो भवति नास्य नाम गृह्णन्ति
kasya sviddhetordīkṣito 'nāśyanno bhavati nāsya nāma gṛhṇanti
- 18
अन्नस्थो नामस्थो भवतीत्य् आहुस्तस्य ये ऽन्नम् अदन्ति ते ऽस्य पाप्मानम् अदन्ति
annastho nāmastho bhavatīty āhustasya ye 'nnam adanti te 'sya pāpmānam adanti
- 19
अथास्य ये नाम गृह्णन्ति ते ऽस्य नाम्नः पाप्मानम् अपाघ्नते
athāsya ye nāma gṛhṇanti te 'sya nāmnaḥ pāpmānam apāghnate
- 20
अथापि वेदानां गर्भभूतो भवतीत्य् आहुः
athāpi vedānāṃ garbhabhūto bhavatīty āhuḥ
- 21
तस्याजातस्याविज्ञातस्याक्रीतसोमस्याभोजनीयं भवतीत्य् आहुः
tasyājātasyāvijñātasyākrītasomasyābhojanīyaṃ bhavatīty āhuḥ
- 22
स दीक्षाणां प्रातर्जायते सोमं क्रीणन्ति तस्य जातस्य विज्ञातस्य क्रीतसोमस्य भोजनीयं भवतीत्य् आहुः
sa dīkṣāṇāṃ prātarjāyate somaṃ krīṇanti tasya jātasya vijñātasya krītasomasya bhojanīyaṃ bhavatīty āhuḥ
- 23
कस्य स्विद्धेतोः संसवाः परिजिहीर्षिता भवन्ति
kasya sviddhetoḥ saṃsavāḥ parijihīrṣitā bhavanti
- 24
यतरो वीर्यवत्तरो भवति स परस्य यज्ञं परिमुष्णाति
yataro vīryavattaro bhavati sa parasya yajñaṃ parimuṣṇāti
- 25
कस्य स्विद्धेतोर्दैवे न ध्यायेत्संस्थिते नाधीयीतेति
kasya sviddhetordaive na dhyāyetsaṃsthite nādhīyīteti
- 26
संसवस्यैव हेतोर् इति
saṃsavasyaiva hetor iti
- 27
विद्योतमाने स्तनयत्य् अथो वर्षति वायव्यम् अभिषुण्वन्ति वै देवाः सोमं च भक्षयन्ति
vidyotamāne stanayaty atho varṣati vāyavyam abhiṣuṇvanti vai devāḥ somaṃ ca bhakṣayanti
- 28
तद् अभिषुण्वन्ति ब्राह्मणाः शुश्रुवांसो ऽनूचानाः
tad abhiṣuṇvanti brāhmaṇāḥ śuśruvāṃso 'nūcānāḥ
- 29
तेषां सर्वरसभक्षाः पितृपितामहा भवन्ति
teṣāṃ sarvarasabhakṣāḥ pitṛpitāmahā bhavanti
- 30
स दैवे न ध्यायेत्संस्थिते नाधीयीतेति ब्राह्मणम्
sa daive na dhyāyetsaṃsthite nādhīyīteti brāhmaṇam

