22 shlokas
- 1
अथ ये पुरस्ताद् अष्टाव् आज्यभागाः पञ्च प्रयाजा द्वाव् आघारौ द्वाव् आज्यभागाव् आग्नेय आज्यभागानां प्रथमः सौम्यो द्वितीयो हविर्भागानाम्
atha ye purastād aṣṭāv ājyabhāgāḥ pañca prayājā dvāv āghārau dvāv ājyabhāgāv āgneya ājyabhāgānāṃ prathamaḥ saumyo dvitīyo havirbhāgānām
- 2
हविर्ह्य् एव सौम्यम्
havirhy eva saumyam
- 3
आग्नेयः पुरोडाशः
āgneyaḥ puroḍāśaḥ
- 4
अग्नीषोमीयः पुरोडाशो ऽग्निः स्विष्टकृद् इत्य् एते मध्यतः पञ्च हविर्भागाः
agnīṣomīyaḥ puroḍāśo 'gniḥ sviṣṭakṛd ity ete madhyataḥ pañca havirbhāgāḥ
- 5
अथ ये षट्प्राजापत्या इडा च प्राशित्रं च यच्चाग्नीध्रायावद्यति ब्रह्मभागो यजमानभागो ऽन्वाहार्य एव षष्ठः
atha ye ṣaṭprājāpatyā iḍā ca prāśitraṃ ca yaccāgnīdhrāyāvadyati brahmabhāgo yajamānabhāgo 'nvāhārya eva ṣaṣṭhaḥ
- 6
अथ य उपरिष्टाद् अष्टाव् आज्यभागास्त्रयो ऽनुयाजाश्चत्वारः पत्नीसंयाजाः समिष्टयजुर् अष्टमम्
atha ya upariṣṭād aṣṭāv ājyabhāgāstrayo 'nuyājāścatvāraḥ patnīsaṃyājāḥ samiṣṭayajur aṣṭamam
- 7
अथ या गायत्री हरिणी ज्योतिष्पक्षा सर्वैर्यज्ञैर्यजमानं स्वर्गं लोकम् अभिवहति वेदिर् एव सा
atha yā gāyatrī hariṇī jyotiṣpakṣā sarvairyajñairyajamānaṃ svargaṃ lokam abhivahati vedir eva sā
- 8
तस्य ये पुरस्ताद् अष्टाव् आज्यभागाः स दक्षिणः पक्षः
tasya ye purastād aṣṭāv ājyabhāgāḥ sa dakṣiṇaḥ pakṣaḥ
- 9
अथ य उपरिष्टाद् अष्टाव् आज्यभागाः स उत्तरः पक्षः
atha ya upariṣṭād aṣṭāv ājyabhāgāḥ sa uttaraḥ pakṣaḥ
- 10
हवींष्य् आत्मा
havīṃṣy ātmā
- 11
गार्हपत्यो जघनम्
gārhapatyo jaghanam
- 12
आहवनीयः शिरः
āhavanīyaḥ śiraḥ
- 13
सौवर्णराजतौ पक्षौ
sauvarṇarājatau pakṣau
- 14
तद्यद् आदित्यं पुरस्तात्पर्यन्तं न पश्यन्ति तस्माद् अज्योतिष्क उत्करो भवति
tadyad ādityaṃ purastātparyantaṃ na paśyanti tasmād ajyotiṣka utkaro bhavati
- 15
अथ या पङ्क्तिः पञ्चपदा सप्तदशाक्षरा सर्वैर्यज्ञैर्यजमानं स्वर्गं लोकम् अभिवहति याज्यैव सा
atha yā paṅktiḥ pañcapadā saptadaśākṣarā sarvairyajñairyajamānaṃ svargaṃ lokam abhivahati yājyaiva sā
- 16
तस्या ॐ श्रावयेति चतुरक्षरम्
tasyā oṃ śrāvayeti caturakṣaram
- 17
अस्तु श्रौषद् इति चतुरक्षरम्
astu śrauṣad iti caturakṣaram
- 18
यजेति द्व्यक्षरम्
yajeti dvyakṣaram
- 19
ये यजामह इति पञ्चाक्षरम्
ye yajāmaha iti pañcākṣaram
- 20
द्व्यक्षरो वै वषट्कारः सैषा पङ्क्तिः
dvyakṣaro vai vaṣaṭkāraḥ saiṣā paṅktiḥ
- 21
पञ्चपदा सप्तदशाक्षरा सर्वैर्यज्ञैर्यजमानं स्वर्गं लोकम् अभिवहति
pañcapadā saptadaśākṣarā sarvairyajñairyajamānaṃ svargaṃ lokam abhivahati
- 22
तद्यत्रास्यैश्वर्यं स्याद्यत्र वैनम् अभिवहेयुर् एवंविदम् एव तत्र ब्रह्माणं वृणीयान्नानेवंविदम् इति ब्राह्मणम्
tadyatrāsyaiśvaryaṃ syādyatra vainam abhivaheyur evaṃvidam eva tatra brahmāṇaṃ vṛṇīyānnānevaṃvidam iti brāhmaṇam

