9 shlokas
- 1
अथर्तुसंवेशनादि जन्मप्रभृति वा कुमारः क्रियाभिलुप्तः स्याद् उपनयनं चैकं स्यात्तासां पृथक्पृथक्क्रियाणां करणं न चैकहोमे सर्वाणि कर्माण्य् उपपादयेत्
athartusaṃveśanādi janmaprabhṛti vā kumāraḥ kriyābhiluptaḥ syād upanayanaṃ caikaṃ syāttāsāṃ pṛthakpṛthakkriyāṇāṃ karaṇaṃ na caikahome sarvāṇi karmāṇy upapādayet
- 2
यद्य् एकहोमे सर्वाणि कर्माण्य् उपपादयेत्प्रधानादौ द्वे द्वे मिन्दाहुती जुहुयात्
yady ekahome sarvāṇi karmāṇy upapādayetpradhānādau dve dve mindāhutī juhuyāt
- 3
मिन्दाहुती हुत्वा जयान् अभ्यातानान्
mindāhutī hutvā jayān abhyātānān
- 4
रुद्राहुत्यन्ते च विज्ञायते रुद्रो वै क्रूरो देवानां सो ऽस्य तुष्टः प्रीतो भवति इति सर्वत्र छेदनभेदनखनननिरसनपितृराक्षसनैरृतरौद्राभिचरणीयेष्व् अप उपस्पृशेद् इति विज्ञायते आपो वै शान्ताः शान्ताभिर् एवास्य शुचं शमयति इति ब्राह्मणम्
rudrāhutyante ca vijñāyate rudro vai krūro devānāṃ so 'sya tuṣṭaḥ prīto bhavati iti sarvatra chedanabhedanakhanananirasanapitṛrākṣasanairṛtaraudrābhicaraṇīyeṣv apa upaspṛśed iti vijñāyate āpo vai śāntāḥ śāntābhir evāsya śucaṃ śamayati iti brāhmaṇam
- 5
आ षोडशात्ब्राह्मणस्यानात्यय इत्य् आ द्वाविंशात्क्षत्रियस्या चतुर्विंशाद्वैश्यस्यात ऊर्ध्वं पतितसावित्रीका भवन्ति
ā ṣoḍaśātbrāhmaṇasyānātyaya ity ā dvāviṃśātkṣatriyasyā caturviṃśādvaiśyasyāta ūrdhvaṃ patitasāvitrīkā bhavanti
- 6
नैनान् उपनयेयुर्नाध्यापयेयुर्न विवहेयुर्न याजयेयुः
nainān upanayeyurnādhyāpayeyurna vivaheyurna yājayeyuḥ
- 7
तांस्त्रिवृता व्रात्यस्तोमेन याजयित्वा विवाहयेयुः
tāṃstrivṛtā vrātyastomena yājayitvā vivāhayeyuḥ
- 8
यच्च किंचित्सगोत्राणां सर्वेषां च सशान्तिकम्
कन्यानां चैव जन्मादिकर्तव्याः कर्ममङ्गलाः
yacca kiṃcitsagotrāṇāṃ sarveṣāṃ ca saśāntikam
kanyānāṃ caiva janmādikartavyāḥ karmamaṅgalāḥ
- 9
क्रियामयं हि ब्राह्मण्यं नाक्रियं ब्रह्मोच्यते नाक्रियं ब्रह्मोच्यत इति
kriyāmayaṃ hi brāhmaṇyaṃ nākriyaṃ brahmocyate nākriyaṃ brahmocyata iti

