8 shlokas
- 1
बलिहरणानुकृतिर् एव सर्पबलिः
baliharaṇānukṛtir eva sarpabaliḥ
- 2
संवत्सरे संवत्सरे षट्सु षट्सु मासेषु चतुर्षु चतुर्षु ऋताव् ऋतौ मासि मासि वा वर्षास्व् आश्रेषासु क्रियेत
saṃvatsare saṃvatsare ṣaṭsu ṣaṭsu māseṣu caturṣu caturṣu ṛtāv ṛtau māsi māsi vā varṣāsv āśreṣāsu kriyeta
- 3
अपां समीपे वल्मीकाग्रेण वा पचनम्
apāṃ samīpe valmīkāgreṇa vā pacanam
- 4
गन्धोदकैर्दूर्वोदकैश्चाभ्युक्ष्य चित्राः सुमनसः संप्रकीर्य यवपिष्टानि व्रीहिपिष्टानि श्यामाकपिष्टानि वाज्येनेक्षुरसेन वा पक्त्वा पायसं घृतपक्वांश्च अपूपानोदनं धानाः सक्तून्करम्भान्लाजान् इत्य् उपकिरन्ति नमो अस्तु सर्पेभ्यः इति तिसृभिर् अनुच्छन्दसम्
gandhodakairdūrvodakaiścābhyukṣya citrāḥ sumanasaḥ saṃprakīrya yavapiṣṭāni vrīhipiṣṭāni śyāmākapiṣṭāni vājyenekṣurasena vā paktvā pāyasaṃ ghṛtapakvāṃśca apūpānodanaṃ dhānāḥ saktūnkarambhānlājān ity upakiranti namo astu sarpebhyaḥ iti tisṛbhir anucchandasam
- 5
सर्पेभ्यः स्वाहाश्रेषाभ्यः स्वाहा दन्दशूकेभ्यः स्वाहा इति त्रयः स्वाहाकाराः
sarpebhyaḥ svāhāśreṣābhyaḥ svāhā dandaśūkebhyaḥ svāhā iti trayaḥ svāhākārāḥ
- 6
जीर्वरो ग्रहपतिर् अध्वर्युर्धृतराष्ट्र ऐरावतो ब्रह्मदत्तस्तापसो होता पृथुश्रवा दूरेश्रवा उद्गाता ग्लावश्चाजगरश्च प्रस्तोता प्रतिहर्ता शितिपृष्ठो मैत्रावरुणः तक्षको वैशालकिर्ब्राह्मणाच्छंस्य् उपनीतिस्तार्क्ष्यः सदस्यः शिखातिशिखौ नेष्टापोतारौ वारुणो होताच्छावाकश्चक्रः पिशङ्ग आग्नीध्रश्चाहिरो महेयः सुब्रह्मण्यो ऽर्बुदो ग्रावस्तुत्साण्ड उन्नेता पशगो ध्रुवगोपः कौस्तुको धुरिमेजयश्च जनमेजयश्चेत्य् एतैर् एव नामधेयैः समीची नामासि प्राची दिक् इति षड्भिः पर्यायैः हेतयो नाम स्थ तेषां वः पुरो गृहाः इति षड्भिः इदं सर्पेभ्यो हविर् अस्तु जुष्टम् इति चोपस्थानम्
jīrvaro grahapatir adhvaryurdhṛtarāṣṭra airāvato brahmadattastāpaso hotā pṛthuśravā dūreśravā udgātā glāvaścājagaraśca prastotā pratihartā śitipṛṣṭho maitrāvaruṇaḥ takṣako vaiśālakirbrāhmaṇācchaṃsy upanītistārkṣyaḥ sadasyaḥ śikhātiśikhau neṣṭāpotārau vāruṇo hotācchāvākaścakraḥ piśaṅga āgnīdhraścāhiro maheyaḥ subrahmaṇyo 'rbudo grāvastutsāṇḍa unnetā paśago dhruvagopaḥ kaustuko dhurimejayaśca janamejayaścety etair eva nāmadheyaiḥ samīcī nāmāsi prācī dik iti ṣaḍbhiḥ paryāyaiḥ hetayo nāma stha teṣāṃ vaḥ puro gṛhāḥ iti ṣaḍbhiḥ idaṃ sarpebhyo havir astu juṣṭam iti copasthānam
- 7
त्रिवृतान्नेन ब्राह्मणान्सम्पूज्य आशिषो वाचयित्वा
trivṛtānnena brāhmaṇānsampūjya āśiṣo vācayitvā
- 8
व्याख्यातः सर्पबलिर्व्याख्यातः सर्पबलिः
vyākhyātaḥ sarpabalirvyākhyātaḥ sarpabaliḥ

