31 shlokas
- 1
अथ प्रहुतः
atha prahutaḥ
- 2
जातं कुमारमभिमन्त्रयते अद्भ्यः सम्भूतः इत्येतेनानुवाकेन
jātaṃ kumāramabhimantrayate adbhyaḥ sambhūtaḥ ityetenānuvākena
- 3
अथैनं स्नपयति क्षेत्रियै त्वा निरृत्यै त्वा इति षड्भिरनुच्छन्दसम्
athainaṃ snapayati kṣetriyai tvā nirṛtyai tvā iti ṣaḍbhiranucchandasam
- 4
अथैनं स्वोपस्थं आदधाति
अङ्गादङ्गात्सम्भवसि हृदयादधिजायसे
आत्मा वै पुत्र नामासि संजीव शरदः शतम् इति
athainaṃ svopasthaṃ ādadhāti
aṅgādaṅgātsambhavasi hṛdayādadhijāyase
ātmā vai putra nāmāsi saṃjīva śaradaḥ śatam iti
- 5
अथैनं मूर्ध्न्यभिजिघ्रति
अश्मा भव परशुर्भव हिरण्यमस्तृतं भव
पशूनां त्वा हिङ्कारेणाभिजिघ्राम्यसौ
इति नक्षत्रनामधेयेन
athainaṃ mūrdhnyabhijighrati
aśmā bhava paraśurbhava hiraṇyamastṛtaṃ bhava
paśūnāṃ tvā hiṅkāreṇābhijighrāmyasau
iti nakṣatranāmadheyena
- 6
अथास्य दक्षिणे कर्णे जपति अग्निरायुष्मान् इति पञ्चभिः पर्यायैः
athāsya dakṣiṇe karṇe japati agnirāyuṣmān iti pañcabhiḥ paryāyaiḥ
- 7
अथैनं दधिमधुघृतमिति समुदायुत्य हिरण्येन प्राशयति प्राणो रक्षति विश्वमेजत् इत्येतेनानुवाकेन प्रत्यृचम्
athainaṃ dadhimadhughṛtamiti samudāyutya hiraṇyena prāśayati prāṇo rakṣati viśvamejat ityetenānuvākena pratyṛcam
- 8
अतिशिष्टं गोपदे निनयति व्याहृतीभिः
atiśiṣṭaṃ gopade ninayati vyāhṛtībhiḥ
- 9
अथैनं मातुरुपस्थ आदधाति सीद त्वं मातुरस्या उपस्थे इति चतसृभिः सहंसाभिः
athainaṃ māturupastha ādadhāti sīda tvaṃ māturasyā upasthe iti catasṛbhiḥ sahaṃsābhiḥ
- 10
स्तनमभिमन्त्रयते
यस्ते स्तनः शशयो यो मयोभूर्येन विश्वा पुष्यसि वार्याणि
यो रत्नधा वसुविद्यः सुदत्रः सरस्वति तमिह धातवे कः इति
stanamabhimantrayate
yaste stanaḥ śaśayo yo mayobhūryena viśvā puṣyasi vāryāṇi
yo ratnadhā vasuvidyaḥ sudatraḥ sarasvati tamiha dhātave kaḥ iti
- 11
धयन्तमनुमन्त्रयते
द्यौस्ते पृष्ठं रक्षतु वायुरूरू अश्विनौ च स्तनं धयन्तं सविताभिरक्षतु
आ वाससः परिधानाद्बृहस्पतिर्विश्वेदेवा अभिरक्षन्तु पश्चात् इति
dhayantamanumantrayate
dyauste pṛṣṭhaṃ rakṣatu vāyurūrū aśvinau ca stanaṃ dhayantaṃ savitābhirakṣatu
ā vāsasaḥ paridhānādbṛhaspatirviśvedevā abhirakṣantu paścāt iti
- 12
अथास्योदकुम्भमुच्छिरसि निदधाति
आपः सुप्तेषु जाग्रत रक्षांसि निरितो नुदध्वम् इति
athāsyodakumbhamucchirasi nidadhāti
āpaḥ supteṣu jāgrata rakṣāṃsi nirito nudadhvam iti
- 13
अथ देवयजनोल्लेखनप्रभृत्याग्निमुखात्कृत्वा पक्वाज्जुहोति हरिं हरन्तमनुयन्ति देवाः इति पुरोनुवाक्याम् अनूच्य मा छिदो मृत्यो मा वधीः इति याज्यया जुहोति
atha devayajanollekhanaprabhṛtyāgnimukhātkṛtvā pakvājjuhoti hariṃ harantamanuyanti devāḥ iti puronuvākyām anūcya mā chido mṛtyo mā vadhīḥ iti yājyayā juhoti
- 14
अथाज्याहुतीरुपजुहोति सद्यश्चकमानाय इत्यान्ताद् अनुवाकस्य
athājyāhutīrupajuhoti sadyaścakamānāya ityāntād anuvākasya
- 15
स्विष्टकृत्प्रभृति सिद्धम् आ धेनुवरप्रदानात्
sviṣṭakṛtprabhṛti siddham ā dhenuvarapradānāt
- 16
अथानोयुगं रथयुगं वा स्नाप्याच्छाद्यालंकृत्य अग्रेणाग्निमुद्धृत्य तस्याग्रेणाश्वत्थपर्णेषु हुतशेषं निदधाति नम आव्याधिनीभ्यः इति
athānoyugaṃ rathayugaṃ vā snāpyācchādyālaṃkṛtya agreṇāgnimuddhṛtya tasyāgreṇāśvatthaparṇeṣu hutaśeṣaṃ nidadhāti nama āvyādhinībhyaḥ iti
- 17
अथास्तमित आदित्ये गौरसर्षपान्फलीकरणमिश्रान् अञ्जलिना जुहोति कृणुष्व पाजः प्रसितिं न पृथ्वीम् इत्येतेनानुवाकेन प्रत्यृचम्
athāstamita āditye gaurasarṣapānphalīkaraṇamiśrān añjalinā juhoti kṛṇuṣva pājaḥ prasitiṃ na pṛthvīm ityetenānuvākena pratyṛcam
- 18
अथौदनम्तिलसक्तुभिर्घृतेनेति समुदायुत्य गोष्ठे ऽश्वत्थपर्णेषु हुतशेषं निदधाति अघोराय महाघोराय नमो नमः इति
athaudanamtilasaktubhirghṛteneti samudāyutya goṣṭhe 'śvatthaparṇeṣu hutaśeṣaṃ nidadhāti aghorāya mahāghorāya namo namaḥ iti
- 19
अथातिशिष्टं सर्वा दिशः संप्रकिरन्ति आवेशिनी व्यश्रुमुखी कुतूहलिन्येकस्तनी जृम्भणी स्तम्भनी मोहनी च
कृष्णा विशाखा विमला ब्रह्मरात्री भ्रातृव्यसंख्येषु पतन्त्यमोघाः
ताभ्यो वै मातृभ्यो नमो नमः इति
athātiśiṣṭaṃ sarvā diśaḥ saṃprakiranti āveśinī vyaśrumukhī kutūhalinyekastanī jṛmbhaṇī stambhanī mohanī ca
kṛṣṇā viśākhā vimalā brahmarātrī bhrātṛvyasaṃkhyeṣu patantyamoghāḥ
tābhyo vai mātṛbhyo namo namaḥ iti
- 20
स एवमेव फलीकरणहोमप्रभृति सायं प्रातर्दशरात्रं करोति
sa evameva phalīkaraṇahomaprabhṛti sāyaṃ prātardaśarātraṃ karoti
- 21
नानुत्थितायां सूतिकायां भोज्यान्नता
nānutthitāyāṃ sūtikāyāṃ bhojyānnatā
- 22
दशम्यामुत्थानम्
daśamyāmutthānam
- 23
दशम्यां द्वादश्यां वा नामकरणम्
daśamyāṃ dvādaśyāṃ vā nāmakaraṇam
- 24
प्राजापत्येन सूक्तेन हुत्वा ब्राह्मणान् अन्नेन परिविष्य पुण्याहं स्वस्ति ऋद्धिमिति वाचयन्नामास्मै दधाति
prājāpatyena sūktena hutvā brāhmaṇān annena pariviṣya puṇyāhaṃ svasti ṛddhimiti vācayannāmāsmai dadhāti
- 25
द्व्यक्षरं चतुरक्षरं षडक्षरम् अष्टाक्षरं वा
dvyakṣaraṃ caturakṣaraṃ ṣaḍakṣaram aṣṭākṣaraṃ vā
- 26
घोषवद् आद्यन्तरन्तस्थं दीर्घाभिनिष्ठानान्तम्
ghoṣavad ādyantarantasthaṃ dīrghābhiniṣṭhānāntam
- 27
अपि वा यस्मिन्स्वित्युपसर्गः स्यात्तद्धि प्रतिष्ठितमिति विज्ञायते
api vā yasminsvityupasargaḥ syāttaddhi pratiṣṭhitamiti vijñāyate
- 28
ऋष्यणूकं देवताणूकं वा
ṛṣyaṇūkaṃ devatāṇūkaṃ vā
- 29
यथैवैषां पूर्वपुरुषाणां नामानि स्युः
yathaivaiṣāṃ pūrvapuruṣāṇāṃ nāmāni syuḥ
- 30
अयुगक्षरं कुमार्याः
ayugakṣaraṃ kumāryāḥ

