10 shlokas
- 1
अथैनम् उदुम्बरशाखाम् अन्तर्धायाभिषिञ्चति
athainam udumbaraśākhām antardhāyābhiṣiñcati
- 2
इमा आपः शिवतमा इमाः सर्वस्य भेषजीः इमा राष्ट्रस्य वर्धनीर् इमा राष्ट्रभृतो ऽमृताः
imā āpaḥ śivatamā imāḥ sarvasya bheṣajīḥ imā rāṣṭrasya vardhanīr imā rāṣṭrabhṛto 'mṛtāḥ
- 3
याभिर् इन्द्रम् अभ्यषिञ्चत्प्रजापतिः सोमं राजानं वरुणं यमम्मनुम्ताभिर् अद्भिर् अभिषिञ्चामि त्वाम् अहं राज्ञां त्वम् अधिराजो भवेह
yābhir indram abhyaṣiñcatprajāpatiḥ somaṃ rājānaṃ varuṇaṃ yamammanumtābhir adbhir abhiṣiñcāmi tvām ahaṃ rājñāṃ tvam adhirājo bhaveha
- 4
महान्तं त्वा महीनां सम्राजं चर्षणीनां देवी जनित्र्य् अजीजनद्भद्रा जनित्र्य् अजीजनत्
mahāntaṃ tvā mahīnāṃ samrājaṃ carṣaṇīnāṃ devī janitry ajījanadbhadrā janitry ajījanat
- 5
देवस्य त्वा सवितुः प्रसवे ऽश्विनोर्बाहुभ्याम्पूष्णो हस्ताभ्याम् अग्नेस्तेजसा सूर्यस्य वर्चसेन्द्रस्येन्द्रियेणाभिषिञ्चामि बलाय श्रियै यशसे ऽन्नाद्याय
devasya tvā savituḥ prasave 'śvinorbāhubhyāmpūṣṇo hastābhyām agnestejasā sūryasya varcasendrasyendriyeṇābhiṣiñcāmi balāya śriyai yaśase 'nnādyāya
- 6
भूर् इति य इच्छेद् इमम् एव प्रत्य् अन्नम् अद्याद् इत्य् अथ य इच्छेद्द्विपुरुषम्भूर्भुव इत्य् अथ य इच्छेत्त्रिपुरुषं वाप्रतिमं वा भूर्भुवः स्वर् इति
bhūr iti ya icched imam eva praty annam adyād ity atha ya iccheddvipuruṣambhūrbhuva ity atha ya icchettripuruṣaṃ vāpratimaṃ vā bhūrbhuvaḥ svar iti
- 7
तद्धैक आहुः सर्वाप्तिर्वा एषा यद् एता व्याहृतयो ऽतिसर्वेण हास्य परस्मै कृतम्भवतीति तम् एतेनाभिषिञ्चेद्देवस्य त्वा सवितुः प्रसवे ऽश्विनोर्बाहुभ्याम्पूष्णो हस्ताभ्याम् अग्नेस्तेजसा सूर्यस्य वर्चसेन्द्रस्येन्द्रियेणाभिषिञ्चामि बलाय श्रियै यशसे ऽन्नाद्यायेति
taddhaika āhuḥ sarvāptirvā eṣā yad etā vyāhṛtayo 'tisarveṇa hāsya parasmai kṛtambhavatīti tam etenābhiṣiñceddevasya tvā savituḥ prasave 'śvinorbāhubhyāmpūṣṇo hastābhyām agnestejasā sūryasya varcasendrasyendriyeṇābhiṣiñcāmi balāya śriyai yaśase 'nnādyāyeti
- 8
तद् उ पुनः परिचक्षते यद् असर्वेण वाचो ऽभिषिक्तो भवतीश्वरो ह तु पुरायुषः प्रैतोर् इति ह स्माह सत्यकामो जाबालो यम् एताभिर्व्याहृतिभिर्नाभिषिञ्चन्तीति
tad u punaḥ paricakṣate yad asarveṇa vāco 'bhiṣikto bhavatīśvaro ha tu purāyuṣaḥ praitor iti ha smāha satyakāmo jābālo yam etābhirvyāhṛtibhirnābhiṣiñcantīti
- 9
ईश्वरो ह सर्वम् आयुर् ऐतोः सर्वम् आप्नोद्विजयेनेत्य् उ ह स्माहोद्दालक आरुणिर्यम् एताभिर्व्याहृतिभिर् अभिषिञ्चन्तीति तम् एतेनैवाभिषिञ्चेद्देवस्य त्वा सवितुः प्रसवे ऽश्विनोर्बाहुभ्याम्पूष्णो हस्ताभ्याम् अग्नेस्तेजसा सूर्यस्य वर्चसेन्द्रस्येन्द्रियेणाभिषिञ्चामि बलाय श्रियै यशसे ऽन्नाद्याय भूर्भुवः स्वर् इति
īśvaro ha sarvam āyur aitoḥ sarvam āpnodvijayenety u ha smāhoddālaka āruṇiryam etābhirvyāhṛtibhir abhiṣiñcantīti tam etenaivābhiṣiñceddevasya tvā savituḥ prasave 'śvinorbāhubhyāmpūṣṇo hastābhyām agnestejasā sūryasya varcasendrasyendriyeṇābhiṣiñcāmi balāya śriyai yaśase 'nnādyāya bhūrbhuvaḥ svar iti
- 10
अथैतानि ह वै क्षत्रियाद् ईजानाद्व्युत्क्रान्तानि भवन्ति ब्रह्मक्षत्रे ऊर्ग् अन्नाद्यम् अपाम् ओषधीनां रसो ब्रह्मवर्चसम् इरा पुष्टिः प्रजातिः क्षत्ररूपं तद् अथो अन्नस्य रस ओषधीनां क्षत्रम्प्रतिष्ठा तद्यद् एवामू पुरस्ताद् आहुती जुहोति तद् अस्मिन्ब्रह्मक्षत्रे दधाति
athaitāni ha vai kṣatriyād ījānādvyutkrāntāni bhavanti brahmakṣatre ūrg annādyam apām oṣadhīnāṃ raso brahmavarcasam irā puṣṭiḥ prajātiḥ kṣatrarūpaṃ tad atho annasya rasa oṣadhīnāṃ kṣatrampratiṣṭhā tadyad evāmū purastād āhutī juhoti tad asminbrahmakṣatre dadhāti

