9 shlokas
- 1
यो ह वै त्रीन्पुरोहितांस्त्रीन्पुरोधातॄन्वेद स ब्राह्मणः पुरोहितः स वदेत पुरोधाया अग्निर्वाव पुरोहितः पृथिवी पुरोधाता वायुर्वाव पुरोहितो ऽन्तरिक्षम्पुरोधातादित्यो वाव पुरोहितो द्यौः पुरोधातैष ह वै पुरोहितो य एवं वेदाथ स तिरोहितो य एवं न वेद
yo ha vai trīnpurohitāṃstrīnpurodhātṝnveda sa brāhmaṇaḥ purohitaḥ sa vadeta purodhāyā agnirvāva purohitaḥ pṛthivī purodhātā vāyurvāva purohito 'ntarikṣampurodhātādityo vāva purohito dyauḥ purodhātaiṣa ha vai purohito ya evaṃ vedātha sa tirohito ya evaṃ na veda
- 2
तस्य राजा मित्रम्भवति द्विषन्तम् अपबाधते यस्यैवं विद्वान्ब्राह्मणो राष्ट्रगोपः पुरोहितः
tasya rājā mitrambhavati dviṣantam apabādhate yasyaivaṃ vidvānbrāhmaṇo rāṣṭragopaḥ purohitaḥ
- 3
क्षत्रेण क्षत्रं जयति बलेन बलम् अश्नुते यस्यैवं विद्वान्ब्राह्मणो राष्ट्रगोपः पुरोहितस्तस्मै विशः संजानते सम्मुखा एकमनसो यस्यैवं विद्वान्ब्राह्मणो राष्ट्रगोपः पुरोहितः
kṣatreṇa kṣatraṃ jayati balena balam aśnute yasyaivaṃ vidvānbrāhmaṇo rāṣṭragopaḥ purohitastasmai viśaḥ saṃjānate sammukhā ekamanaso yasyaivaṃ vidvānbrāhmaṇo rāṣṭragopaḥ purohitaḥ
- 4
भूर्भुवः स्वर् ओम् अमो ऽहम् अस्मि स त्वं स त्वं अस्य् अमो ऽहं द्यौर् अहम्पृथिवी त्वं सामाहम् ऋक्त्वं ताव् एह संवहावहै पुराण्यस्मात्महाभयात्तनूर् असि तन्वम्मे पाहि
bhūrbhuvaḥ svar om amo 'ham asmi sa tvaṃ sa tvaṃ asy amo 'haṃ dyaur ahampṛthivī tvaṃ sāmāham ṛktvaṃ tāv eha saṃvahāvahai purāṇyasmātmahābhayāttanūr asi tanvamme pāhi
- 5
या ओषधीः सोमराज्ञीर्बह्वीः शतविचक्षणाः
ता मह्यम् अस्मिन्न् आसने ऽछिद्रं शर्म यच्छत
yā oṣadhīḥ somarājñīrbahvīḥ śatavicakṣaṇāḥ
tā mahyam asminn āsane 'chidraṃ śarma yacchata
- 6
या ओषधीः सोमराज्ञीर्विष्ठिताः पृथिवीम् अनु
ता मह्यम् अस्मिन्न् आसने ऽछिद्रं शर्म यच्छत
yā oṣadhīḥ somarājñīrviṣṭhitāḥ pṛthivīm anu
tā mahyam asminn āsane 'chidraṃ śarma yacchata
- 7
अस्मिन्राष्ट्रे श्रियम् आवेशयाम्य् अतो देवीः प्रतिपश्याम्य् आपः
asminrāṣṭre śriyam āveśayāmy ato devīḥ pratipaśyāmy āpaḥ
- 8
दक्षिणम्पादम् अवनेनिजे ऽस्मिन्राष्ट्र इन्द्रियं दधामि
सव्यम्पादम् अवनेनिजे ऽस्मिन्राष्ट्र इन्द्रियं वर्धयामि
पूर्वम् अन्यम् अपरम् अन्यम्पादाव् अवनेनिजे
देवा राष्ट्रस्य गुप्त्या अभयस्यावरुद्ध्यै
dakṣiṇampādam avanenije 'sminrāṣṭra indriyaṃ dadhāmi
savyampādam avanenije 'sminrāṣṭra indriyaṃ vardhayāmi
pūrvam anyam aparam anyampādāv avanenije
devā rāṣṭrasya guptyā abhayasyāvaruddhyai
- 9
आपः पादावनेजनीर्द्विषन्तं निर्दहन्तु मे
āpaḥ pādāvanejanīrdviṣantaṃ nirdahantu me

