11 shlokas
- 1
व्याघ्रचर्मणास्तृणात्य् उत्तरलोम्ना प्राचीनग्रीवेण क्षत्रं वा एतद् आरण्यानाम्पशूनां यद्व्याघ्रः क्षत्रं राजन्यः क्षत्रेणैव तत्क्षत्रं समर्धयति
vyāghracarmaṇāstṛṇāty uttaralomnā prācīnagrīveṇa kṣatraṃ vā etad āraṇyānāmpaśūnāṃ yadvyāghraḥ kṣatraṃ rājanyaḥ kṣatreṇaiva tatkṣatraṃ samardhayati
- 2
ताम्पश्चात्प्राङ् उपविश्याच्य जानु दक्षिणम् अभिमन्त्रयत उभाभ्याम्पाणिभ्याम् आलभ्य
tāmpaścātprāṅ upaviśyācya jānu dakṣiṇam abhimantrayata ubhābhyāmpāṇibhyām ālabhya
- 3
अग्निष्ट्वा गायत्र्या सयुक्छन्दसारोहतु सवितोष्णिहा सोमो ऽनुष्टुभा बृहस्पतिर्बृहत्या मित्रावरुणौ पङ्क्त्येन्द्रस्त्रिष्टुभा विश्वे देवा जगत्या तान् अहम् अनु राज्याय साम्राज्याय भौज्याय स्वाराज्याय वैराज्याय पारमेष्ठ्याय राज्याय माहाराज्यायाधिपत्याय स्वावश्यायातिष्ठायारोहामि
agniṣṭvā gāyatryā sayukchandasārohatu savitoṣṇihā somo 'nuṣṭubhā bṛhaspatirbṛhatyā mitrāvaruṇau paṅktyendrastriṣṭubhā viśve devā jagatyā tān aham anu rājyāya sāmrājyāya bhaujyāya svārājyāya vairājyāya pārameṣṭhyāya rājyāya māhārājyāyādhipatyāya svāvaśyāyātiṣṭhāyārohāmi
- 4
इत्य् एताम् आसन्दीम् आरोहेद्दक्षिणेनाग्रे जानुनाथ सव्येन
ity etām āsandīm āroheddakṣiṇenāgre jānunātha savyena
- 5
तत्तद् इतीꣳ
tattad itīm̐
- 6
चतुरुत्तरैर्वै देवाश्छन्दोभिः सयुग्भूत्वैतां श्रियम् आरोहन्यस्याम् एत एतर्हि प्रतिष्ठिता अग्निर्गायत्र्या सवितोष्णिहा सोमो ऽनुष्टुभा बृहस्पतिर्बृहत्या मित्रावरुणौ पङ्क्त्येन्द्रस्त्रिष्टुभा विश्वे देवा जगत्या
caturuttarairvai devāśchandobhiḥ sayugbhūtvaitāṃ śriyam ārohanyasyām eta etarhi pratiṣṭhitā agnirgāyatryā savitoṣṇihā somo 'nuṣṭubhā bṛhaspatirbṛhatyā mitrāvaruṇau paṅktyendrastriṣṭubhā viśve devā jagatyā
- 7
ते एते अभ्यनूच्येते अग्नेर्गायत्र्य् अभवत्सयुग्वेति
te ete abhyanūcyete agnergāyatry abhavatsayugveti
- 8
कल्पते ह वा अस्मै योगक्षेम उत्तरोत्तरिणीं ह श्रियम् अश्नुते ऽश्नुते ह प्रजानाम् ऐश्वर्यम् आधिपत्यं य एवम् एता अनु देवता एताम् आसन्दीम् आरोहति क्षत्रियः सन्
kalpate ha vā asmai yogakṣema uttarottariṇīṃ ha śriyam aśnute 'śnute ha prajānām aiśvaryam ādhipatyaṃ ya evam etā anu devatā etām āsandīm ārohati kṣatriyaḥ san
- 9
अथैनम् अभिषेक्ष्यन्न् अपां शान्तिं वाचयति
athainam abhiṣekṣyann apāṃ śāntiṃ vācayati
- 10
शिवेन मा चक्षुषा पश्यतापः शिवया तन्वोपस्पृशत त्वचम्मे सर्वाꣳ अग्नींर् अप्सुषदो हुवे वो मयि वर्चो बलम् ओजो निधत्तेति
śivena mā cakṣuṣā paśyatāpaḥ śivayā tanvopaspṛśata tvacamme sarvām̐ agnīṃr apsuṣado huve vo mayi varco balam ojo nidhatteti
- 11
नैतस्याभिषिषिचानस्याशान्ता आपो वीर्यं निर्हणन्न् इति
naitasyābhiṣiṣicānasyāśāntā āpo vīryaṃ nirhaṇann iti

