20 shlokas
- 1
अथातो ब्रह्मनः परिमरो यो ह वै ब्रह्मणः परिमरं वेद पर्य् एनं द्विषन्तो भ्रातृव्याः परि सपत्ना म्रियन्ते
athāto brahmanaḥ parimaro yo ha vai brahmaṇaḥ parimaraṃ veda pary enaṃ dviṣanto bhrātṛvyāḥ pari sapatnā mriyante
- 2
अयं वै ब्रह्म यो ऽयम्पवते तम् एताः पञ्च देवताः परिम्रियन्ते विद्युद्वृष्टिश्चन्द्रमा आदित्यो ऽग्निः
ayaṃ vai brahma yo 'yampavate tam etāḥ pañca devatāḥ parimriyante vidyudvṛṣṭiścandramā ādityo 'gniḥ
- 3
विद्युद्वै विद्युत्य वृष्टिम् अनुप्रविशति सान्तर्धीयते तां न निर्जानन्ति
vidyudvai vidyutya vṛṣṭim anupraviśati sāntardhīyate tāṃ na nirjānanti
- 4
यदा वै म्रियते ऽथान्तर्धीयते ऽथैनां न निर्जानन्ति
yadā vai mriyate 'thāntardhīyate 'thaināṃ na nirjānanti
- 5
स ब्रूयाद्विद्युतो मरणे द्विषन्मे म्रियतां सो ऽन्तर्धीयतां तम्मा निर्ज्ञासिषुर् इति
sa brūyādvidyuto maraṇe dviṣanme mriyatāṃ so 'ntardhīyatāṃ tammā nirjñāsiṣur iti
- 6
क्षिप्रं हैवैनं न निर्जानन्ति
kṣipraṃ haivainaṃ na nirjānanti
- 7
वृष्टिर्वै वृष्ट्वा चन्द्रमसम् अनुप्रविशति सान्तर्धीयते तां न निर्जानन्ति यदा वै म्रियते ऽथान्तर्धीयते ऽथैनं न निर्जानन्ति स ब्रूयाद्वृष्टेर्मरणे द्विषन्मे म्रियतां सो ऽन्तर्धीयतां तम्मा निर्ज्ञासिषुर् इति क्षिप्रं हैवैनं न निर्जानन्ति
vṛṣṭirvai vṛṣṭvā candramasam anupraviśati sāntardhīyate tāṃ na nirjānanti yadā vai mriyate 'thāntardhīyate 'thainaṃ na nirjānanti sa brūyādvṛṣṭermaraṇe dviṣanme mriyatāṃ so 'ntardhīyatāṃ tammā nirjñāsiṣur iti kṣipraṃ haivainaṃ na nirjānanti
- 8
चन्द्रमा वा अमावास्यायाम् आदित्यम् अनुप्रविशति सोऽन्तर्धीयतां तं न निर्जानन्ति यदा वै म्रियते ऽथान्तर्धीयते ऽथैनं न निर्जानन्ति स ब्रूयाच्चन्द्रमसो मरणे द्विषन्मे म्रियतां सो ऽन्तर्धीयतां तम्मा निर्ज्ञासिषुर् इति क्षिप्रं हैवैनं न निर्जानन्ति
candramā vā amāvāsyāyām ādityam anupraviśati so'ntardhīyatāṃ taṃ na nirjānanti yadā vai mriyate 'thāntardhīyate 'thainaṃ na nirjānanti sa brūyāccandramaso maraṇe dviṣanme mriyatāṃ so 'ntardhīyatāṃ tammā nirjñāsiṣur iti kṣipraṃ haivainaṃ na nirjānanti
- 9
आदित्यो वा अस्तं यन्न् अग्निम् अनुप्रविशति सो ऽन्तर्धीयते तं न निर्जानन्ति यदा वै म्रियते ऽथान्तर्धीयते ऽथैनम्न निर्जानन्ति स ब्रूयाद् आदित्यस्य मरणे द्विषन्मे म्रियतां सो ऽन्तर्धीयतां तम्मा निर्ज्ञासिषुर् इति क्षिप्रं हैवैनं न निर्जानन्ति
ādityo vā astaṃ yann agnim anupraviśati so 'ntardhīyate taṃ na nirjānanti yadā vai mriyate 'thāntardhīyate 'thainamna nirjānanti sa brūyād ādityasya maraṇe dviṣanme mriyatāṃ so 'ntardhīyatāṃ tammā nirjñāsiṣur iti kṣipraṃ haivainaṃ na nirjānanti
- 10
अग्निर्वा उद्वान्वायुम् अनुप्रविशति सो ऽन्तर्धीयते तं न निर्जानन्ति यदा वै म्रियते ऽथान्तर्धीयते ऽथैनं न निर्जानन्ति स ब्रूयाद् अग्नेर्मरणे द्विषन्मे म्रियतां सो ऽन्तर्धीयतां तम्मा निर्ज्ञासिषुर् इति क्षिप्रं हैवैनं न निर्जानन्ति
agnirvā udvānvāyum anupraviśati so 'ntardhīyate taṃ na nirjānanti yadā vai mriyate 'thāntardhīyate 'thainaṃ na nirjānanti sa brūyād agnermaraṇe dviṣanme mriyatāṃ so 'ntardhīyatāṃ tammā nirjñāsiṣur iti kṣipraṃ haivainaṃ na nirjānanti
- 11
ता वा एता देवता अत एव पुनर्जायन्ते
tā vā etā devatā ata eva punarjāyante
- 12
वायोर् अग्निर्जायते प्राणाद्धि बलान्मथ्यमानो ऽधिजायते तं दृष्ट्वा ब्रूयाद् अग्निर्जायताम्मा मे द्विषञ्जन्य् अत एव पराङ्प्रजिघ्यत्व् इति अतो हैव पराङ्प्रजिघ्यति
vāyor agnirjāyate prāṇāddhi balānmathyamāno 'dhijāyate taṃ dṛṣṭvā brūyād agnirjāyatāmmā me dviṣañjany ata eva parāṅprajighyatv iti ato haiva parāṅprajighyati
- 13
अग्नेर्वा आदित्यो जायते तं दृष्ट्वा ब्रूयाद् आदित्यो जायताम्मा मे द्विषञ्जन्य् अत एव पराङ्प्रजिघ्यत्व् इत्य् अतो हैव पराङ्प्रजिघ्यति
agnervā ādityo jāyate taṃ dṛṣṭvā brūyād ādityo jāyatāmmā me dviṣañjany ata eva parāṅprajighyatv ity ato haiva parāṅprajighyati
- 14
आदित्याद्वै चन्द्रमा जायते तं दृष्ट्वा ब्रूयाच्चन्द्रमा जायताम्मा मे द्विषञ्जन्य् अत एव पराङ्प्रजिघ्यत्व् इति अतो हैव पराङ्प्रजिघ्यति
ādityādvai candramā jāyate taṃ dṛṣṭvā brūyāccandramā jāyatāmmā me dviṣañjany ata eva parāṅprajighyatv iti ato haiva parāṅprajighyati
- 15
चन्द्रमसो वै वृष्टिर्जायते तां दृष्ट्वा ब्रूयाद्वृष्टिर्जायताम्मा मे द्विषञ्जन्य् अत एव पराङ्प्रजिघ्यत्व् इत्य् अतो हैव पराङ्प्रजिघ्यति
candramaso vai vṛṣṭirjāyate tāṃ dṛṣṭvā brūyādvṛṣṭirjāyatāmmā me dviṣañjany ata eva parāṅprajighyatv ity ato haiva parāṅprajighyati
- 16
वृष्टेर्वै विद्युज्जायते तां दृष्ट्वा ब्रूयाद्विद्युज्जायताम्मा मे द्विषञ्जन्य् अत एव पराङ्प्रजिघ्यत्व् इत्य् अतो हैव पराङ्प्रजिघ्यति
vṛṣṭervai vidyujjāyate tāṃ dṛṣṭvā brūyādvidyujjāyatāmmā me dviṣañjany ata eva parāṅprajighyatv ity ato haiva parāṅprajighyati
- 17
स एष ब्रह्मणः परिमरः
sa eṣa brahmaṇaḥ parimaraḥ
- 18
तम् एतम्ब्रह्मणः परिमरम्मैत्रेयः कौषारवः सुत्वने कैरिशये भार्गायणाय राज्ञे प्रोवाच तं ह पञ्च राजानः परिमम्रुस्ततः सुत्वा महज्जगाम
tam etambrahmaṇaḥ parimarammaitreyaḥ kauṣāravaḥ sutvane kairiśaye bhārgāyaṇāya rājñe provāca taṃ ha pañca rājānaḥ parimamrustataḥ sutvā mahajjagāma
- 19
तस्य व्रतं न द्विषतः पूर्व उपविशेद्यदि तिष्ठन्तम्मन्येत तिष्ठेतैव न द्विषतः पूर्वः संविशेद्यद्य् आसीनम्मन्येतासीतैव न द्विषतः पूर्वः प्रस्वप्याद्यदि जाग्रतम्मन्येत जागृयाद् एव
tasya vrataṃ na dviṣataḥ pūrva upaviśedyadi tiṣṭhantammanyeta tiṣṭhetaiva na dviṣataḥ pūrvaḥ saṃviśedyady āsīnammanyetāsītaiva na dviṣataḥ pūrvaḥ prasvapyādyadi jāgratammanyeta jāgṛyād eva
- 20
अपि ह यद्य् अस्याश्ममूर्धा द्विषन्भवति क्षिप्रं हैवैनं स्तृणुते स्तृणुते
api ha yady asyāśmamūrdhā dviṣanbhavati kṣipraṃ haivainaṃ stṛṇute stṛṇute

