7 shlokas
- 1
इन्द्रियं वा एतद् अस्मिंल्लोके यद्दधि यद्दध्नाभिषिञ्चतीन्द्रियम् एवास्मिंस्तद्दधाति रसो वा एष ओषधिवनस्पतिषु यन्मधु यन्मध्वाभिषिञ्चति रसम् एवास्मिंस्तद्दधाति तेजो वा एतत्पशूनां यद्घृतं यद्घृतेनाभिषिञ्चति तेज एवास्मिंस्तद्दधात्य् अमृतं वा एतद् अस्मिंल्लोके यद् आपो यद् अद्भिर् अभिषिञ्चत्य् अमृतत्वम् एवास्मिंस्तद्दधाति
indriyaṃ vā etad asmiṃlloke yaddadhi yaddadhnābhiṣiñcatīndriyam evāsmiṃstaddadhāti raso vā eṣa oṣadhivanaspatiṣu yanmadhu yanmadhvābhiṣiñcati rasam evāsmiṃstaddadhāti tejo vā etatpaśūnāṃ yadghṛtaṃ yadghṛtenābhiṣiñcati teja evāsmiṃstaddadhāty amṛtaṃ vā etad asmiṃlloke yad āpo yad adbhir abhiṣiñcaty amṛtatvam evāsmiṃstaddadhāti
- 2
सो ऽभिषिक्तो ऽभिषेक्त्रे ब्राह्मणाय हिरण्यं दद्यात्सहस्रं दद्यात्क्षेत्रं चतुष्पाद्दद्याद् अथाप्य् आहुर् असंख्यातम् एवापरिमितं दद्याद् अपरिमितो वै क्षत्रियो ऽपरिमितस्यावरुद्ध्या इति
so 'bhiṣikto 'bhiṣektre brāhmaṇāya hiraṇyaṃ dadyātsahasraṃ dadyātkṣetraṃ catuṣpāddadyād athāpy āhur asaṃkhyātam evāparimitaṃ dadyād aparimito vai kṣatriyo 'parimitasyāvaruddhyā iti
- 3
अथास्मै सुराकंसं हस्त आदधाति स्वादिष्ठया मदिष्ठया पवस्व सोम धारया इन्द्राय पातवे सुत इति
athāsmai surākaṃsaṃ hasta ādadhāti svādiṣṭhayā madiṣṭhayā pavasva soma dhārayā indrāya pātave suta iti
- 4
ताम्पिबेद्यद् अत्र शिष्टं रसिनः सुतस्य यद् इन्द्रो अपिबच्छचीभिः इदं तद् अस्य मनसा शिवेन सोमं राजानम् इह भक्षयामि अभि त्वा वृषभा सुते सुतं सृजामि पीतये तृम्प व्यश्नुही मदम् इति
tāmpibedyad atra śiṣṭaṃ rasinaḥ sutasya yad indro apibacchacībhiḥ idaṃ tad asya manasā śivena somaṃ rājānam iha bhakṣayāmi abhi tvā vṛṣabhā sute sutaṃ sṛjāmi pītaye tṛmpa vyaśnuhī madam iti
- 5
यो ह वाव सोमपीथः सुरायाम्प्रविष्टः स हैव तेनैन्द्रेण महाभिषेकेणाभिषिक्तस्य क्षत्रियस्य भक्षितो भवति न सुरा
yo ha vāva somapīthaḥ surāyāmpraviṣṭaḥ sa haiva tenaindreṇa mahābhiṣekeṇābhiṣiktasya kṣatriyasya bhakṣito bhavati na surā
- 6
ताम्पीत्वाभिमन्त्रयेतापाम सोमं शं नो भवेति
tāmpītvābhimantrayetāpāma somaṃ śaṃ no bhaveti
- 7
तद्यथैवादः प्रियः पुत्रः पितरम्प्रिया वा जाया पतिं सुखं शिवम् उपस्पृशत्य् आ विस्रस एवं हैवैतेनैन्द्रेण महाभिषेकेणाभिषिक्तस्य क्षत्रियस्य सुरा वा सोमो वान्यद्वान्नाद्यं सुखं शिवम् उपस्पृशत्य् आ विस्रसः
tadyathaivādaḥ priyaḥ putraḥ pitarampriyā vā jāyā patiṃ sukhaṃ śivam upaspṛśaty ā visrasa evaṃ haivaitenaindreṇa mahābhiṣekeṇābhiṣiktasya kṣatriyasya surā vā somo vānyadvānnādyaṃ sukhaṃ śivam upaspṛśaty ā visrasaḥ

