11 shlokas
- 1
पशुवद् अष्टाव् आद्यान्यजमानो ऽनुमन्त्रयत उत्तमेनोत्तमम्
paśuvad aṣṭāv ādyānyajamāno 'numantrayata uttamenottamam
- 2
संवत्सरीणां स्वस्तिम् आशास्ते दिव्यं धामाशास्त इति होता सूक्तवाकस्याशिःष्व् अनुवर्तयति
saṃvatsarīṇāṃ svastim āśāste divyaṃ dhāmāśāsta iti hotā sūktavākasyāśiḥṣv anuvartayati
- 3
प्रहृत्य परिधीन्संस्रावेणाभिहुत्य वाजिनपात्र उपस्तीर्य बर्हिषि विषिञ्चन्वाजिनेन तत्पात्रं पूरयति
prahṛtya paridhīnsaṃsrāveṇābhihutya vājinapātra upastīrya barhiṣi viṣiñcanvājinena tatpātraṃ pūrayati
- 4
नाभिघारयति
nābhighārayati
- 5
वाजिभ्यो ऽनुब्रूहीति संप्रेष्यति
vājibhyo 'nubrūhīti saṃpreṣyati
- 6
आश्राव्य प्रत्याश्राविते वाजिनो यजेति संप्रेष्यति
āśrāvya pratyāśrāvite vājino yajeti saṃpreṣyati
- 7
अनवानं होता याज्याम् अन्वाह
anavānaṃ hotā yājyām anvāha
- 8
वषट्कृते ऽध्वर्युः स्रुचा स्रावयञ्जुहोति
vaṣaṭkṛte 'dhvaryuḥ srucā srāvayañjuhoti
- 9
वाजिनस्याग्ने वीहीति होतानुयजति
vājinasyāgne vīhīti hotānuyajati
- 10
वाजिनोद्रेकेण प्रतिदिशं यजति दिशः स्वाहेति प्राच्यां प्रदिशः स्वाहेति दक्षिणत आदिशः स्वाहेति पश्चिमतो विदिशः स्वाहेत्य् उत्तरत उद्दिशः स्वाहेति मध्ये स्वाहा दिग्भ्य इति प्रदक्षिणम् अनुपरिषिञ्चति नमो दिग्भ्य इति वोपतिष्ठते
vājinodrekeṇa pratidiśaṃ yajati diśaḥ svāheti prācyāṃ pradiśaḥ svāheti dakṣiṇata ādiśaḥ svāheti paścimato vidiśaḥ svāhety uttarata uddiśaḥ svāheti madhye svāhā digbhya iti pradakṣiṇam anupariṣiñcati namo digbhya iti vopatiṣṭhate
- 11
अन्तर्वेदि शेषं समुपहूय परस्परम् असाव् उपह्वयस्वेत्य् आमन्त्रणे कृत उपहूत इति प्रतिवचने च वाजिनां भक्षो अवत्व् इति सर्वे वाजिनं भक्षयन्ति तत्र प्रथमो होता यजमानश्चरमः
antarvedi śeṣaṃ samupahūya parasparam asāv upahvayasvety āmantraṇe kṛta upahūta iti prativacane ca vājināṃ bhakṣo avatv iti sarve vājinaṃ bhakṣayanti tatra prathamo hotā yajamānaścaramaḥ

