16 shlokas
- 1
वसन्ते यवैर्यजेत
vasante yavairyajeta
- 2
तेषां व्रीह्याग्रयणवत्कल्पः
teṣāṃ vrīhyāgrayaṇavatkalpaḥ
- 3
नाग्नेयश्यामाकौ भवतः
nāgneyaśyāmākau bhavataḥ
- 4
व्रीहिभिर् इष्ट्वा व्रीहिभिर् एव यजेत दर्शपूर्णमासाव् आ यवेभ्यः
vrīhibhir iṣṭvā vrīhibhir eva yajeta darśapūrṇamāsāv ā yavebhyaḥ
- 5
यवैर् इष्ट्वा यवैर् एव यजेता व्रीहिभ्यः
yavair iṣṭvā yavair eva yajetā vrīhibhyaḥ
- 6
वर्षासु श्यामाकं चरुं निर्वपति
varṣāsu śyāmākaṃ caruṃ nirvapati
- 7
तस्य सप्तदश सामिधेन्यः
tasya saptadaśa sāmidhenyaḥ
- 8
त्वम् अग्ने सप्रथा असि सोम यास्ते मयोभुव इति सद्वन्ताव् आज्यभागाव् आप्यायस्व सं त इति हविषः प्रेद्धो अग्न इमो अग्न इति संयाज्ये
tvam agne saprathā asi soma yāste mayobhuva iti sadvantāv ājyabhāgāv āpyāyasva saṃ ta iti haviṣaḥ preddho agna imo agna iti saṃyājye
- 9
यथर्तु वेणुप्रियङ्गुनीवारैः श्यामाकवद्यजेत
yathartu veṇupriyaṅgunīvāraiḥ śyāmākavadyajeta
- 10
यत्प्राक्प्रोक्षणात्तत्कृत्वा शतायुधायेति पञ्चाज्यानीर्जुहोति पुरस्तात्स्विष्टकृतो वा
yatprākprokṣaṇāttatkṛtvā śatāyudhāyeti pañcājyānīrjuhoti purastātsviṣṭakṛto vā
- 11
अग्निः प्रथमः प्राश्नात्व् इति श्यामाकस्य यजमानभागं प्राश्नाति
agniḥ prathamaḥ prāśnātv iti śyāmākasya yajamānabhāgaṃ prāśnāti
- 12
भद्रान्नः श्रेय इति व्रीहीणाम् एतम् उ त्यं मधुनेति यवानाम्
bhadrānnaḥ śreya iti vrīhīṇām etam u tyaṃ madhuneti yavānām
- 13
अपि वा पौर्णमास्याम् अमावास्यायां वाग्रयणेष्टिम् अन्वायातयेत्
api vā paurṇamāsyām amāvāsyāyāṃ vāgrayaṇeṣṭim anvāyātayet
- 14
अपि वा नवैर् एव पौर्णमास्याम् अमावास्यायां वा यजेत नवैर्वाग्निहोत्रं जुहुयात्
api vā navair eva paurṇamāsyām amāvāsyāyāṃ vā yajeta navairvāgnihotraṃ juhuyāt
- 15
सर्वासाम् ओषधीनां ग्राम्याणाम् आरण्यानां वौपासने गार्हपत्ये वा स्थालीपाकं श्रपयित्वाग्रयणदेवताभ्यः स्विष्टकृच्चतुर्थीभ्यो जुहुयाच्चतुरो वा ब्राह्मणान्भोजयेत्
sarvāsām oṣadhīnāṃ grāmyāṇām āraṇyānāṃ vaupāsane gārhapatye vā sthālīpākaṃ śrapayitvāgrayaṇadevatābhyaḥ sviṣṭakṛccaturthībhyo juhuyāccaturo vā brāhmaṇānbhojayet
- 16
अनिष्टे अप्य् आग्रयणे ब्रह्मणि हुतं भवति
aniṣṭe apy āgrayaṇe brahmaṇi hutaṃ bhavati

