12 shlokas
- 1
आदित्यायाग्निं गृह्णामि रात्र्या अहर् इति प्रातर्होम्यम्
ādityāyāgniṃ gṛhṇāmi rātryā ahar iti prātarhomyam
- 2
अग्निस्ते तेजो मा धाक्षीद् इति दर्भैर् अभिद्योत्यामृतम् असीति स्रुवेण दोहनसंक्षालनं निनीय पुनर् एव पूर्ववद् अभिद्योत्यान्तरितं रक्ष इति त्रिः पर्यग्निकरोति
agniste tejo mā dhākṣīd iti darbhair abhidyotyāmṛtam asīti sruveṇa dohanasaṃkṣālanaṃ ninīya punar eva pūrvavad abhidyotyāntaritaṃ rakṣa iti triḥ paryagnikaroti
- 3
घर्मो ऽसि रायस्पोषवनिर् इति वर्त्म कुर्वन्न् उदग् उद्वासयति
gharmo 'si rāyaspoṣavanir iti vartma kurvann udag udvāsayati
- 4
इह प्रजां पशून्दृंहेति वेद्यां प्रतिष्ठाप्य प्रजां मे यच्छेत्य् अन्तिके कृत्वा प्रत्यूढं जन्यं भयम् इति गार्हपत्ये ऽङ्गारान्धृष्ट्या प्रत्यूहति
iha prajāṃ paśūndṛṃheti vedyāṃ pratiṣṭhāpya prajāṃ me yacchety antike kṛtvā pratyūḍhaṃ janyaṃ bhayam iti gārhapatye 'ṅgārāndhṛṣṭyā pratyūhati
- 5
देवस्य त्वेति स्रुवम् अग्निहोत्रहवणीं चादाय प्रत्युष्टम् इति निष्टप्य सुपर्णां त्वेत्य् अग्निहोत्रहवनीं संमार्ष्टि
devasya tveti sruvam agnihotrahavaṇīṃ cādāya pratyuṣṭam iti niṣṭapya suparṇāṃ tvety agnihotrahavanīṃ saṃmārṣṭi
- 6
अरिष्टो यजमानः पत्नी चेत्य् उभयं संमृज्यौम् उन्नेष्यामीति सायं यजमानम् आमन्त्रयत ओम् उन्नयामीति प्रातः
ariṣṭo yajamānaḥ patnī cety ubhayaṃ saṃmṛjyaum unneṣyāmīti sāyaṃ yajamānam āmantrayata om unnayāmīti prātaḥ
- 7
यजमानो हविर्देवानाम् इत्य् उपांशूक्त्वौम् उन्नयेत्य् उच्चैः प्रत्याह
yajamāno havirdevānām ity upāṃśūktvaum unnayety uccaiḥ pratyāha
- 8
उन्नयनप्रभृत्या होमान्न चङ्क्रम्यते
unnayanaprabhṛtyā homānna caṅkramyate
- 9
वाचं यच्छति
vācaṃ yacchati
- 10
अग्नये च त्वा पृथिव्यै चोन्नयामीति चतुर्भिः स्थाल्याश्चतुरः स्रुवान्पूर्णान् अग्निहोत्रहवण्याम् उन्नयत्य् उत्तमेन द्विः पञ्चावत्तिनः
agnaye ca tvā pṛthivyai connayāmīti caturbhiḥ sthālyāścaturaḥ sruvānpūrṇān agnihotrahavaṇyām unnayaty uttamena dviḥ pañcāvattinaḥ
- 11
उन्नीतं दशहोत्राभिमृशति
unnītaṃ daśahotrābhimṛśati
- 12
सजूर्देवैः सायंयावभिर् इत्य् उन्नीतं स्थालीं च सायं संमृशति सजूर्देवैः प्रातर्यावभिर् इति प्रातः
sajūrdevaiḥ sāyaṃyāvabhir ity unnītaṃ sthālīṃ ca sāyaṃ saṃmṛśati sajūrdevaiḥ prātaryāvabhir iti prātaḥ

