8 shlokas
- 1
अथ सगृहः प्रवत्स्यन्यत्र पञ्च नव दश रात्रीः संहिता वसति यत्र वा नवरात्रं वास्तु कुतश्चित्कारणात्पुनर् अभ्येत्य् एकाम् उषित्वा प्रवत्स्यन्वास्तोष्पतीयं जुहुयात्
atha sagṛhaḥ pravatsyanyatra pañca nava daśa rātrīḥ saṃhitā vasati yatra vā navarātraṃ vāstu kutaścitkāraṇātpunar abhyety ekām uṣitvā pravatsyanvāstoṣpatīyaṃ juhuyāt
- 2
यद्य् अनोवाह्यं भाण्डं स्यात्सर्वमनस्यादधाति यद्वोढुम् अशक्यं स्यात्तद् अहुत एवोपोद्धरन्ति
yady anovāhyaṃ bhāṇḍaṃ syātsarvamanasyādadhāti yadvoḍhum aśakyaṃ syāttad ahuta evopoddharanti
- 3
अग्निष्ठस्य दक्षिणो युक्तो भवति सव्यो ऽयुक्तो ऽथ वास्तोष्पत इत्य् अनुद्रुत्योत्तरया गार्हपत्ये जुहोति
agniṣṭhasya dakṣiṇo yukto bhavati savyo 'yukto 'tha vāstoṣpata ity anudrutyottarayā gārhapatye juhoti
- 4
न हुते ऽभ्यादधाति
na hute 'bhyādadhāti
- 5
न हीनम् अन्वाहरन्ति
na hīnam anvāharanti
- 6
नावक्षाणान्य् असंप्रक्षाप्य प्रयान्ति
nāvakṣāṇāny asaṃprakṣāpya prayānti
- 7
अयं ते योनिर् ऋत्विय इति पृथग् अरणीष्व् अग्नीन्समारोपयते ऽपि वा या ते अग्ने यज्ञिया तनूर् इत्य् आत्मनि हस्तं प्रताप्य वा मुखायाहरत उपावरोह जातवेद इत्य् आत्मन्य् आरूढम् अरण्योर् उपावरोह्य प्रागस्तमयान्मन्थेत्
ayaṃ te yonir ṛtviya iti pṛthag araṇīṣv agnīnsamāropayate 'pi vā yā te agne yajñiyā tanūr ity ātmani hastaṃ pratāpya vā mukhāyāharata upāvaroha jātaveda ity ātmany ārūḍham araṇyor upāvarohya prāgastamayānmanthet
- 8
अपि वा लौकिके ऽग्नाव् उपावरोहेत्य् उपावरोहयत इदं श्रेय इत्य् अवसिते जुहोति जुहोति
api vā laukike 'gnāv upāvarohety upāvarohayata idaṃ śreya ity avasite juhoti juhoti

