13 shlokas
- 1
ऋषभं वैरवणम् अग्नीषोमीयं वैष्णवं धातादि मूलहोमं यद्देवादि कूष्माण्डहोमम् आ सावित्रव्रतबन्धाज्जुहोति
ṛṣabhaṃ vairavaṇam agnīṣomīyaṃ vaiṣṇavaṃ dhātādi mūlahomaṃ yaddevādi kūṣmāṇḍahomam ā sāvitravratabandhājjuhoti
- 2
उपनीतस्य च तत्तद्व्रतसूक्तानि
upanītasya ca tattadvratasūktāni
- 3
वेदस्नातकस्य यदह्नि विवाहो भवति मासिके वार्षिके चाह्नि तस्मिन्यत्स्त्रिय आहुः पारंपर्यागतं शिष्टाचारं तत्तत्करोति
vedasnātakasya yadahni vivāho bhavati māsike vārṣike cāhni tasminyatstriya āhuḥ pāraṃparyāgataṃ śiṣṭācāraṃ tattatkaroti
- 4
तथाग्निष्टोमादियज्ञानाम् आधाननक्षत्रे वर्षान्ते करोति
tathāgniṣṭomādiyajñānām ādhānanakṣatre varṣānte karoti
- 5
तदेवं वर्तमानस्य यद्यष्टमासाधिकाशीतिवर्षाणि रविवर्षेणाधिगान्यधिगच्छेयुः स दृष्टसहस्रचन्द्रो भवति
tadevaṃ vartamānasya yadyaṣṭamāsādhikāśītivarṣāṇi ravivarṣeṇādhigānyadhigaccheyuḥ sa dṛṣṭasahasracandro bhavati
- 6
तमेनं क्रियायुक्तं पुण्यकृत्तमं ब्रह्मशरीरमित्याचक्षते
tamenaṃ kriyāyuktaṃ puṇyakṛttamaṃ brahmaśarīramityācakṣate
- 7
तस्मान्नान्दीमुखं कृत्वा शुक्लपक्षे शुद्धे ऽहनि पूर्वाह्णे पूर्ववद्धुत्वा तथैव कपिल इवेति वृद्धस्य वृद्धाया वा वदन्न् अक्षतोदकादीन्मूर्ध्न्यादध्यात्
tasmānnāndīmukhaṃ kṛtvā śuklapakṣe śuddhe 'hani pūrvāhṇe pūrvavaddhutvā tathaiva kapila iveti vṛddhasya vṛddhāyā vā vadann akṣatodakādīnmūrdhnyādadhyāt
- 8
सर्वदेवताः सहस्रं च ब्राह्मणानामर्चनबलिभ्यामन्नेन तर्पयेत्
sarvadevatāḥ sahasraṃ ca brāhmaṇānāmarcanabalibhyāmannena tarpayet
- 9
ग्रामं प्रदक्षिणीकृत्य सायं स्थण्डिले सहस्रं पिष्टेन सोमरूपाणि करोति
grāmaṃ pradakṣiṇīkṛtya sāyaṃ sthaṇḍile sahasraṃ piṣṭena somarūpāṇi karoti
- 10
राजतेन पात्रेण कुमुदपत्त्रैः सोमस्यार्चनम्
rājatena pātreṇa kumudapattraiḥ somasyārcanam
- 11
तस्य दक्षिणे रोहिणीगणं वामे चानावृष्टिगणमर्चयति
tasya dakṣiṇe rohiṇīgaṇaṃ vāme cānāvṛṣṭigaṇamarcayati
- 12
सहस्रशः सुवर्णरजतमुक्तादीनि शक्त्या वस्त्रतण्डुलापूपानि च दद्यात्
sahasraśaḥ suvarṇarajatamuktādīni śaktyā vastrataṇḍulāpūpāni ca dadyāt
- 13
अश्वमेधफलावाप्त्यै वर्षवर्धनमिति विज्ञायते
aśvamedhaphalāvāptyai varṣavardhanamiti vijñāyate

