6 shlokas
- 1
प्रजापतिं वै देवाः शुक्रं पयो ऽदुह्रन्
तद् एभ्यो न व्यभवत्
तद् अग्निर्व्यकरोत्
तानि शुक्रियाणि सामान्य् अभवन्
तेषां यो रसो ऽत्यक्षरत्
तानि शुक्रयजूंष्य् अभवन्
शुक्रियाणां वा एतानि शुक्रियाणि
सामपयसं वा एतयोर् अन्यत्
देवानाम् अन्यत्पयः
यद्गोः पयः
prajāpatiṃ vai devāḥ śukraṃ payo 'duhran
tad ebhyo na vyabhavat
tad agnirvyakarot
tāni śukriyāṇi sāmāny abhavan
teṣāṃ yo raso 'tyakṣarat
tāni śukrayajūṃṣy abhavan
śukriyāṇāṃ vā etāni śukriyāṇi
sāmapayasaṃ vā etayor anyat
devānām anyatpayaḥ
yadgoḥ payaḥ
- 2
तत्साम्नः पयः
यद् अजायै पयः
तद्देवानां पयः
तस्माद्यत्रैतैर्यजुर्भिश्चरन्ति
तत्पयसा चरन्ति
प्रजापतिम् एव तद्देवान्पयसान्नाद्येन समर्धयन्ति
एष ह त्वै साक्षात्प्रवर्ग्यं भक्षयति
यस्यैवं विदुषः प्रवर्ग्यः प्रवृज्यते
उत्तरवेद्याम् उद्वासयेत्तेजस्कामस्य
तेजो वा उत्तरवेदिः
tatsāmnaḥ payaḥ
yad ajāyai payaḥ
taddevānāṃ payaḥ
tasmādyatraitairyajurbhiścaranti
tatpayasā caranti
prajāpatim eva taddevānpayasānnādyena samardhayanti
eṣa ha tvai sākṣātpravargyaṃ bhakṣayati
yasyaivaṃ viduṣaḥ pravargyaḥ pravṛjyate
uttaravedyām udvāsayettejaskāmasya
tejo vā uttaravediḥ
- 3
तेजः प्रवर्ग्यः
तेजसैव तेजः समर्धयति
उत्तरवेद्याम् उद्वासयेत् अन्नकामस्य
शिरो वा एतद्यज्ञस्य
यत्प्रवर्ग्यः
मुखम् उत्तरवेदिः
शीर्ष्णैव मुखं संदधात्य् अन्नाद्याय
अन्नाद एव भवति
यत्र खलु वा एतम् उद्वासितं वयांसि पर्यासते
परि वै तां समां प्रजा वयांस्य् आसते
tejaḥ pravargyaḥ
tejasaiva tejaḥ samardhayati
uttaravedyām udvāsayet annakāmasya
śiro vā etadyajñasya
yatpravargyaḥ
mukham uttaravediḥ
śīrṣṇaiva mukhaṃ saṃdadhāty annādyāya
annāda eva bhavati
yatra khalu vā etam udvāsitaṃ vayāṃsi paryāsate
pari vai tāṃ samāṃ prajā vayāṃsy āsate
- 4
तस्माद् उत्तरवेद्याम् एवोद्वासयेत्
प्रजानां गोपीथाय
पुरो वा पश्चाद्वोद्वासयेत्
पुरस्ताद्वा एतज्ज्योतिर् उदेति
तत्पश्चान्निम्रोचति
स्वाम् एवैनं योनिम् अनूद्वासयति
अपां मध्य उद्वासयेत्
अपां वा एतन्मध्याज्ज्योतिर् अजायत
ज्योतिः प्रवर्ग्यः
स्व एवैनं योनौ प्रतिष्ठापयति
tasmād uttaravedyām evodvāsayet
prajānāṃ gopīthāya
puro vā paścādvodvāsayet
purastādvā etajjyotir udeti
tatpaścānnimrocati
svām evainaṃ yonim anūdvāsayati
apāṃ madhya udvāsayet
apāṃ vā etanmadhyājjyotir ajāyata
jyotiḥ pravargyaḥ
sva evainaṃ yonau pratiṣṭhāpayati
- 5
यं द्विष्यात्
यत्र स स्यात्
तस्यां दिश्य् उद्वासयेत्
एष वा अग्निर्वैश्वानरः
यत्प्रवर्ग्यः
अग्निनैवैनं वैश्वानरेणाभिप्रवर्तयति
औदुम्बर्यां शाखायाम् उद्वासयेत्
ऊर्ग्वा उदुम्बरः
अन्नं प्राणः
शुग्घर्मः
yaṃ dviṣyāt
yatra sa syāt
tasyāṃ diśy udvāsayet
eṣa vā agnirvaiśvānaraḥ
yatpravargyaḥ
agninaivainaṃ vaiśvānareṇābhipravartayati
audumbaryāṃ śākhāyām udvāsayet
ūrgvā udumbaraḥ
annaṃ prāṇaḥ
śuggharmaḥ
- 6
इदम् अहम् अमुष्यामुष्यायणस्य शुचा प्राणम् अपिदहामीत्य् आह
शुचैवास्य प्राणम् अपिदहति
ताजग् आर्तिम् आर्च्छति
यत्र दर्भा उपदीकसंतताः स्युः
तद् उद्वासयेद्वृष्टिकामस्य
एता वा अपाम् अनूज्जावर्यो नाम
यद्दर्भाः
असौ खलु वा आदित्य इतो वृष्टिम् उदीरयति
असाव् एवास्मा आदित्यो वृष्टिं नियच्छति
ता आपो नियता धन्वना यन्ति
idam aham amuṣyāmuṣyāyaṇasya śucā prāṇam apidahāmīty āha
śucaivāsya prāṇam apidahati
tājag ārtim ārcchati
yatra darbhā upadīkasaṃtatāḥ syuḥ
tad udvāsayedvṛṣṭikāmasya
etā vā apām anūjjāvaryo nāma
yaddarbhāḥ
asau khalu vā āditya ito vṛṣṭim udīrayati
asāv evāsmā ādityo vṛṣṭiṃ niyacchati
tā āpo niyatā dhanvanā yanti

