14 shlokas
- 1
एकाष्टकायां दीक्षेरन्
ekāṣṭakāyāṃ dīkṣeran
- 2
एषा वै संव्वत्सरस्य पत्नी यद् एकाष्टकैतस्यां वा एतां रात्रिं वसति साक्षाद् एव तत्संव्वत्सरम् आरभ्य दीक्षन्ते
eṣā vai saṃvvatsarasya patnī yad ekāṣṭakaitasyāṃ vā etāṃ rātriṃ vasati sākṣād eva tatsaṃvvatsaram ārabhya dīkṣante
- 3
तस्य सा निर्या यद् अपो ऽनभिनन्दन्तो ऽभ्यवयन्ति
tasya sā niryā yad apo 'nabhinandanto 'bhyavayanti
- 4
विच्छिन्नं वा एते संव्वत्सरस्याभिदीक्षन्ते य एकाष्टकायां दीक्षन्ते ऽन्तनामानाव् ऋतू भवेते
vicchinnaṃ vā ete saṃvvatsarasyābhidīkṣante ya ekāṣṭakāyāṃ dīkṣante 'ntanāmānāv ṛtū bhavete
- 5
आर्तं वा एते संव्वत्सरस्याभिदीक्षन्ते ये ऽन्तनामानाव् ऋतू अभिदीक्षन्ते
ārtaṃ vā ete saṃvvatsarasyābhidīkṣante ye 'ntanāmānāv ṛtū abhidīkṣante
- 6
तस्माद् एकाष्टकायां न दीक्ष्यम्
tasmād ekāṣṭakāyāṃ na dīkṣyam
- 7
फाल्गुने दीक्षेरन्
phālgune dīkṣeran
- 8
मुखं वा एतत्संव्वत्सरस्य यत्फाल्गुनो मुखत एव तत्संव्वत्सरम् आरभ्य दीक्षन्ते
mukhaṃ vā etatsaṃvvatsarasya yatphālguno mukhata eva tatsaṃvvatsaram ārabhya dīkṣante
- 9
तस्य सा निर्या यत्संमेघे विषुवान्सम्पद्यते
tasya sā niryā yatsaṃmeghe viṣuvānsampadyate
- 10
चित्रापूर्णमासे दीक्षेरन्
citrāpūrṇamāse dīkṣeran
- 11
चक्षुर्वा एतत्संव्वत्सरस्य यच्चित्रापूर्णमासो मुखतो वै चक्षुर्मुखत एव तत्संव्वत्सरम् आरभ्य दीक्षन्ते तस्य न निर्यास्ति
cakṣurvā etatsaṃvvatsarasya yaccitrāpūrṇamāso mukhato vai cakṣurmukhata eva tatsaṃvvatsaram ārabhya dīkṣante tasya na niryāsti
- 12
चतुरहे पुरस्तात्पौर्णमास्या दीक्षेरन्
caturahe purastātpaurṇamāsyā dīkṣeran
- 13
तेषाम् एकाष्टकायां क्रयः सम्पद्यते तेनैकाष्टकां न संवट्कुर्वन्ति
teṣām ekāṣṭakāyāṃ krayaḥ sampadyate tenaikāṣṭakāṃ na saṃvaṭkurvanti
- 14
तेषां पूर्वपक्षे सुत्या सम्पद्यते पूर्वपक्षे मासाः संतिष्ठमाना यन्ति पूर्वपक्ष उत्तिष्ठन्ति तान् उत्तिष्ठतः पशव ओषधयो ऽनूत्तिष्ठन्ति तान्कल्याणी वाग् अभिवदत्य् अरात्सुर् इमे सत्त्रिण इति ते राध्नुवन्ति
teṣāṃ pūrvapakṣe sutyā sampadyate pūrvapakṣe māsāḥ saṃtiṣṭhamānā yanti pūrvapakṣa uttiṣṭhanti tān uttiṣṭhataḥ paśava oṣadhayo 'nūttiṣṭhanti tānkalyāṇī vāg abhivadaty arātsur ime sattriṇa iti te rādhnuvanti

