12 shlokas
- 1
आ वा एते संव्वत्सरं प्याययन्ति य उत्सृजन्ति
ā vā ete saṃvvatsaraṃ pyāyayanti ya utsṛjanti
- 2
यथा वै दृतिर् आध्मात एवं संव्वत्सरो ऽनुत्सृष्टो यन्नोत्सृजेयुर् अमेहेन प्रमायुकाः स्युः
yathā vai dṛtir ādhmāta evaṃ saṃvvatsaro 'nutsṛṣṭo yannotsṛjeyur amehena pramāyukāḥ syuḥ
- 3
प्राणो वै संव्वत्सर उदाना मासा यद् उत्सृजन्ति प्राण एवोदानान्दधति यो दीक्षितः प्रमीयते या संव्वत्सरस्यानुत्सृष्टस्य शुक्सा तम् ऋच्छति
prāṇo vai saṃvvatsara udānā māsā yad utsṛjanti prāṇa evodānāndadhati yo dīkṣitaḥ pramīyate yā saṃvvatsarasyānutsṛṣṭasya śuksā tam ṛcchati
- 4
तद् आहुर् उत्सृज्या३ं नोत्सृज्या३म् इति
tad āhur utsṛjyā3ṃ notsṛjyā3m iti
- 5
यद्य् उत्सृजेयुर् उक्थान्य् उत्सृजेयुस्तद् एवोत्सृष्टं तद् अनुत्सृष्टम्
yady utsṛjeyur ukthāny utsṛjeyustad evotsṛṣṭaṃ tad anutsṛṣṭam
- 6
अथो खल्व् आहुर् एकत्रिकं कार्यं तद् एव साक्षाद् उत्सृष्टम् अभ्युत्षुण्वन्ति
atho khalv āhur ekatrikaṃ kāryaṃ tad eva sākṣād utsṛṣṭam abhyutṣuṇvanti
- 7
छिद्रो वा एतेषां संव्वत्सर इत्य् आहुर्ये स्तोमम् उत्सृजन्तीति
chidro vā eteṣāṃ saṃvvatsara ity āhurye stomam utsṛjantīti
- 8
पशुम् आलभन्ते स्तोमम् एव तद् आलभन्ते स्तोमो हि पशुः
paśum ālabhante stomam eva tad ālabhante stomo hi paśuḥ
- 9
श्व उत्सृष्टाः स्म इति वत्सान् अपाकुर्वन्ति प्रातः पशुम् आलभन्ते तस्य वपया प्रचरन्ति ततस्सवनीयेनाष्टाकपालेन तत आग्नेयेनाष्टाकपालेन ततो दध्नैन्द्रेण ततश्चरुणा वैश्वदेवेन तत्प्रातःसवनं संतिष्ठते
śva utsṛṣṭāḥ sma iti vatsān apākurvanti prātaḥ paśum ālabhante tasya vapayā pracaranti tatassavanīyenāṣṭākapālena tata āgneyenāṣṭākapālena tato dadhnaindreṇa tataścaruṇā vaiśvadevena tatprātaḥsavanaṃ saṃtiṣṭhate
- 10
ततः पशुपुरोडाशेनैकादशकपालेन ततः सवनीयेनैकादशकपालेन ततो मरुत्वतीयेनैकादशकपालेन ततश्चरुणैन्द्रेण तन्माध्यन्दिनं सवनं संतिष्ठते
tataḥ paśupuroḍāśenaikādaśakapālena tataḥ savanīyenaikādaśakapālena tato marutvatīyenaikādaśakapālena tataścaruṇaindreṇa tanmādhyandinaṃ savanaṃ saṃtiṣṭhate
- 11
पशुना प्रचरन्ति ततः सवनीयेन द्वादशकपालेन ततो वैश्वदेवेन द्वादशकपालेन ततश्चरुणाग्निमारुतेन तत्तृतीयं सवनं संतिष्ठते
paśunā pracaranti tataḥ savanīyena dvādaśakapālena tato vaiśvadevena dvādaśakapālena tataścaruṇāgnimārutena tattṛtīyaṃ savanaṃ saṃtiṣṭhate
- 12
पृषदाज्येन प्रचर्य पत्नीस्संयाजयन्ति
pṛṣadājyena pracarya patnīssaṃyājayanti

