13 shlokas
- 1
वामदेव्यं महाव्रतं कार्यं तस्य गायत्रं शिरो बृहद्रथन्तरे पक्षौ यज्ञायज्ञीयं पुच्छम्
vāmadevyaṃ mahāvrataṃ kāryaṃ tasya gāyatraṃ śiro bṛhadrathantare pakṣau yajñāyajñīyaṃ puccham
- 2
यो वै महाव्रते सहस्रं प्रोतं वेद प्र सहस्रं पशून् आप्नोति
yo vai mahāvrate sahasraṃ protaṃ veda pra sahasraṃ paśūn āpnoti
- 3
तस्य प्राची दिक्शिरस्तच्छन्दोभिः सहस्रम् असाव् अन्यतरः पक्षः स नक्षत्रैः साहस्रो ऽयम् अन्यतरः पक्षः स ओषधिभिश्च वनस्पतिभिश्च साहस्रो ऽन्तरिक्षम् आत्मा तद्वयोभिः साहस्रं प्रतीची दिक्पुच्छं तद् अग्निभिश्च रश्मिभिश्च साहस्रं प्र सहस्रं पशून् आप्नोति य एवं वेद
tasya prācī dikśirastacchandobhiḥ sahasram asāv anyataraḥ pakṣaḥ sa nakṣatraiḥ sāhasro 'yam anyataraḥ pakṣaḥ sa oṣadhibhiśca vanaspatibhiśca sāhasro 'ntarikṣam ātmā tadvayobhiḥ sāhasraṃ pratīcī dikpucchaṃ tad agnibhiśca raśmibhiśca sāhasraṃ pra sahasraṃ paśūn āpnoti ya evaṃ veda
- 4
तद् आहुर् अपृष्ठं वै वामदेव्यम् अनिधनं हीति
tad āhur apṛṣṭhaṃ vai vāmadevyam anidhanaṃ hīti
- 5
अनायतनं वा एतत्साम यद् अनिधनम्
anāyatanaṃ vā etatsāma yad anidhanam
- 6
राजनं महाव्रतं कार्यम्
rājanaṃ mahāvrataṃ kāryam
- 7
एतद्वै साक्षाद् अन्नं यद्राजनं पञ्चविधं भवति पाङ्क्तं ह्य् अन्नम्
etadvai sākṣād annaṃ yadrājanaṃ pañcavidhaṃ bhavati pāṅktaṃ hy annam
- 8
हिङ्कारवद्भवति तेन वामदेव्यस्य रूपम्
hiṅkāravadbhavati tena vāmadevyasya rūpam
- 9
निधनवद्भवति तेन पृष्ठस्य रूपम्
nidhanavadbhavati tena pṛṣṭhasya rūpam
- 10
अतिच्छन्दःसु पञ्चनिधनं वामदेव्यं ब्रह्मसाम कार्यम्
aticchandaḥsu pañcanidhanaṃ vāmadevyaṃ brahmasāma kāryam
- 11
अति वा एषान्यानि छन्दांसि यद् अतिच्छन्दा अत्य् एतद् अन्यान्य् अहान्य् अहर्यन्महाव्रतम्
ati vā eṣānyāni chandāṃsi yad aticchandā aty etad anyāny ahāny aharyanmahāvratam
- 12
ब्रह्मसाम्नैव तद् अन्यान्य् अहान्य् अतिमेदयति
brahmasāmnaiva tad anyāny ahāny atimedayati
- 13
पञ्चनिधनं भवति पाङ्क्तं ह्य् अन्नम्
pañcanidhanaṃ bhavati pāṅktaṃ hy annam

