121 shlokas
- 1
ततः प्रातः समं सैन्यैः स सुमेरुतपोवनात्
तस्मात्सूर्यप्रभः प्रायाच्छ्रुतशर्मजिगीषया
tataḥ prātaḥ samaṃ sainyaiḥ sa sumerutapovanāt
tasmātsūryaprabhaḥ prāyācchrutaśarmajigīṣayā
- 2
तन्निवासस्य निकटं त्रिकूटाद्रेर् अवाप्य च
आवासितो ऽभूत्तत्रस्थं बलेनोत्सार्य तद्बलम्
tannivāsasya nikaṭaṃ trikūṭādrer avāpya ca
āvāsito 'bhūttatrasthaṃ balenotsārya tadbalam
- 3
आवासिते च तत्रास्मिन्ससुमेरुमयादिके
आस्थानस्थे त्रिकूटेशसंबन्धी दूत आययौ
āvāsite ca tatrāsminsasumerumayādike
āsthānasthe trikūṭeśasaṃbandhī dūta āyayau
- 4
स चागत्य जगादैवं सुमेरुं खेचरेश्वरम्
श्रुतशर्मपिता राजा तव संदिष्टवान् इदम्
sa cāgatya jagādaivaṃ sumeruṃ khecareśvaram
śrutaśarmapitā rājā tava saṃdiṣṭavān idam
- 5
दूरस्थस्य न ते ऽस्माभिर् आचारो जातुचित्कृतः
अद्यास्मद्विषयं प्राप्तः स त्वं प्राघुणिकैः सह
dūrasthasya na te 'smābhir ācāro jātucitkṛtaḥ
adyāsmadviṣayaṃ prāptaḥ sa tvaṃ prāghuṇikaiḥ saha
- 6
तद् आतिथ्यम् इदानीं वो विधास्यामो यथोचितम्
श्रुत्वैतं शत्रुसंदेशं सुमेरुः प्रत्युवाच तम्
tad ātithyam idānīṃ vo vidhāsyāmo yathocitam
śrutvaitaṃ śatrusaṃdeśaṃ sumeruḥ pratyuvāca tam
- 7
साधु नास्मत्समं पात्रम् अतिथिं प्राप्स्यथापरम्
आतिथ्यं न परे लोके दास्यतीहैव तत्फलम्
sādhu nāsmatsamaṃ pātram atithiṃ prāpsyathāparam
ātithyaṃ na pare loke dāsyatīhaiva tatphalam
- 8
तद् इमे वयम् आतिथ्यं क्रियताम् इत्य् उदाहृते
सुमेरुणा तथैवागात्स दूतः स्वं प्रभुं प्रति
tad ime vayam ātithyaṃ kriyatām ity udāhṛte
sumeruṇā tathaivāgātsa dūtaḥ svaṃ prabhuṃ prati
- 9
अथोन्नतप्रदेशस्थास्ते तु सूर्यप्रभादयः
सैन्यानि ददृशुः स्वानि निविष्टानि पृथक्पृथक्
athonnatapradeśasthāste tu sūryaprabhādayaḥ
sainyāni dadṛśuḥ svāni niviṣṭāni pṛthakpṛthak
- 10
ततः सुनीथः पितरं स्वम् उवाच मयासुरम्
प्रविभागं रथादीनाम् अस्मत्सैन्ये ऽत्र शंस नः
tataḥ sunīthaḥ pitaraṃ svam uvāca mayāsuram
pravibhāgaṃ rathādīnām asmatsainye 'tra śaṃsa naḥ
- 11
एवं करोमि शृणुतेत्य् उक्त्वाङ्गुल्या निदर्शयन्
दानवेन्द्रः स सर्वज्ञो वक्तुम् एवं प्रचक्रमे
evaṃ karomi śṛṇutety uktvāṅgulyā nidarśayan
dānavendraḥ sa sarvajño vaktum evaṃ pracakrame
- 12
असौ सुबाहुर्निर्घातो मुष्टिको गोहरस्तथा
प्रलम्बश्च प्रमाथश्च कङ्कटः पिङ्गलो ऽपि च
asau subāhurnirghāto muṣṭiko goharastathā
pralambaśca pramāthaśca kaṅkaṭaḥ piṅgalo 'pi ca
- 13
वसुदत्तादयश्चैते राजानो ऽर्धरथा इमे
अङ्कुरी सुविशालश्च दण्डिभूषणसोमिलाः
vasudattādayaścaite rājāno 'rdharathā ime
aṅkurī suviśālaśca daṇḍibhūṣaṇasomilāḥ
- 14
उन्मत्तको देवशर्मा पितृशर्मा कुमारकः
एते सहरिदत्ताद्याः सर्वे पूर्णरथा मताः
unmattako devaśarmā pitṛśarmā kumārakaḥ
ete saharidattādyāḥ sarve pūrṇarathā matāḥ
- 15
प्रकम्पनो दर्पितश्च कुम्भीरो मातृपालितः
महाभटः सोग्रभटो वीरस्वामी सुराधरः
prakampano darpitaśca kumbhīro mātṛpālitaḥ
mahābhaṭaḥ sograbhaṭo vīrasvāmī surādharaḥ
- 16
भण्डीरः सिंहदत्तश्च गुणवर्मा सकीटकः
भीमो भयंकरश्चेति सर्वे ऽमी द्विगुणा रथाः
bhaṇḍīraḥ siṃhadattaśca guṇavarmā sakīṭakaḥ
bhīmo bhayaṃkaraśceti sarve 'mī dviguṇā rathāḥ
- 17
विरोचनो वीरसेनो यज्ञसेनो ऽथ खुज्जरः
इन्द्रवर्मा शबरकः क्रूरकर्मा निरासकः
virocano vīraseno yajñaseno 'tha khujjaraḥ
indravarmā śabarakaḥ krūrakarmā nirāsakaḥ
- 18
भवेयुस्त्रिगुणा एते रथा राजसुताः सुत
सुशर्मा बाहुशाली च विशाखः क्रोधनो ऽप्य् अयम्
bhaveyustriguṇā ete rathā rājasutāḥ suta
suśarmā bāhuśālī ca viśākhaḥ krodhano 'py ayam
- 19
प्रचण्डश्चेत्य् अमी राजपुत्रा रथचतुर्गुणाः
जुञ्जरी वीरवर्मा च प्रवीरवर एव च
pracaṇḍaścety amī rājaputrā rathacaturguṇāḥ
juñjarī vīravarmā ca pravīravara eva ca
- 20
सुप्रतिज्ञो ऽमरारामश्चण्डदत्तो ऽथ जालिकः
त्रयः सिंहभटव्याघ्रभटशत्रुभटा अपि
supratijño 'marārāmaścaṇḍadatto 'tha jālikaḥ
trayaḥ siṃhabhaṭavyāghrabhaṭaśatrubhaṭā api
- 21
राजानो राजपुत्राश्च रथाः पञ्चगुणा अमी
उग्रवर्मा त्व् अयं राजपुत्रः स्यात्षड्गुणो रथः
rājāno rājaputrāśca rathāḥ pañcaguṇā amī
ugravarmā tv ayaṃ rājaputraḥ syātṣaḍguṇo rathaḥ
- 22
राजपुत्रो विशाखश्च सुतन्तुः सुगमो ऽपि च
नरेन्द्रशर्मा चेत्य् एते रथाः सप्तगुणा मताः
rājaputro viśākhaśca sutantuḥ sugamo 'pi ca
narendraśarmā cety ete rathāḥ saptaguṇā matāḥ
- 23
महारथः पुनर् अयं सहस्रायुनृपात्मजः
महारथानां यूथस्य शतानीकस्त्व् अयं पतिः
mahārathaḥ punar ayaṃ sahasrāyunṛpātmajaḥ
mahārathānāṃ yūthasya śatānīkastv ayaṃ patiḥ
- 24
सुभासहर्षविमलाः सूर्यप्रभवयस्यकाः
महाबुद्ध्यचलाख्यौ च प्रियंकरशुभंकरौ
subhāsaharṣavimalāḥ sūryaprabhavayasyakāḥ
mahābuddhyacalākhyau ca priyaṃkaraśubhaṃkarau
- 25
एते महारथा यज्ञरुचिधर्मरुची तथा
एवं विश्वरुचिर्भासः सिद्धार्थश्चेत्य् अमी त्रयः
ete mahārathā yajñarucidharmarucī tathā
evaṃ viśvarucirbhāsaḥ siddhārthaścety amī trayaḥ
- 26
सूर्यप्रभस्य सचिवाः स्युर्महारथयूथपाः
प्रहस्तश्च महार्थश्च तस्यातिरथयूथपौ
sūryaprabhasya sacivāḥ syurmahārathayūthapāḥ
prahastaśca mahārthaśca tasyātirathayūthapau
- 27
यूथपौ रथयूथानां प्रज्ञाढ्यस्थिरबुद्धिकौ
दानवः सर्वदमनस्तथा प्रमथनो ऽप्य् असौ
yūthapau rathayūthānāṃ prajñāḍhyasthirabuddhikau
dānavaḥ sarvadamanastathā pramathano 'py asau
- 28
धूमकेतुः प्रवहणो वज्रपञ्जर एव च
कालचक्रो मरुद्वेगो रथातिरथपा अमी
dhūmaketuḥ pravahaṇo vajrapañjara eva ca
kālacakro marudvego rathātirathapā amī
- 29
प्रकम्पनः सिंहनादो रथातिरथयूथपौ
महामायः काम्बलिकः कालकम्पनको ऽप्य् अयम्
prakampanaḥ siṃhanādo rathātirathayūthapau
mahāmāyaḥ kāmbalikaḥ kālakampanako 'py ayam
- 30
प्रहृष्टरोमा चेत्य् एते चत्वारो ऽप्य् असुराधिपाः
पुत्रातिरथयूथाधिपतीनाम् अधिपा इमे
prahṛṣṭaromā cety ete catvāro 'py asurādhipāḥ
putrātirathayūthādhipatīnām adhipā ime

